ការដាក់ទណ្ឌកម្មតបវិញរបស់ចិន ធ្វើឡើងបន្ទាប់ពីរដ្ឋាភិបាលក្រុងប៉េងកាំងបានអនុម័តច្បាប់មួយប្រឆាំងនឹងការទណ្ឌកម្មរបស់បរទេស ។ នេះបើតាមការចុះផ្សាយរបស់សារព័ត៌មាន ស៊ីអិនប៊ីស៊ី ។
ថ្មីៗនេះ រដ្ឋាភិបាលអាមេរិកក្នុងអាណត្តិលោក ចូ បៃដិន បានដាក់ទណ្ឌកម្មលើមន្ត្រីជាន់ខ្ពស់ចិនមួយចំនួន ដែលអាមេរិកចោទប្រកាន់ថា ជាប់ពាក់ព័ន្ធក្នុងការបង្ក្រាបលើលទ្ធិប្រជាធិបតេយ្យនៅទីក្រុងហុងកុង ហើយក្រោយមកទៀត លោកប្រធានាធិបតី ចូ បៃដិន បានព្រមានក្រុមហ៊ុនអាមេរិកទាំងឡាយ អំពីផលវិបាកនៃការរកស៊ីនៅទីក្រុងហុងកុង និងតំបន់ស៊ិនជាំង ប្រទេសចិន ដែលនាំឲ្យចិនខឹងសម្បារ និងប្រតិកម្មតបជាមួយនឹងទណ្ឌកម្មជាការសងសឹកវិញ ។
អត្ថបទទាក់ទង
ទំនាក់ទំនងរវាងចិននិងអាមេរិកបានចាប់ផ្ដើមល្អក់កករនឹងគ្នានៅក្រោមរដ្ឋការលោក ដូណាល់ ត្រាំ ដែលបានបញ្ឆេះនូវសង្គ្រាមពាណិជ្ជកម្ម រវាងមហាយក្សសេដ្ឋកិច្ចទាំងពីរនេះ ។
នៅពេលលោក ចូ បៃដិន បានឈ្នះឆ្នោតក្លាយជាប្រធានាធិបតីអាមេរិក លោក បៃដិន បាននិយាយថា លោកនឹងប្រើយុទ្ធសាស្ត្រចំពោះចិន ខុសពីលោក ដូណាល់ ត្រាំ ដោយនិយាយថា លោកនឹងធ្វើការជិតស្និទ្ធជាមួយសម្ព័ន្ធមិត្តរបស់អាមេរិក ដើម្បីរុញច្រានឥទ្ធិពលចិន ៕
(ប្រភព ៖ CNBC)
