សេចក្តីណែនាំរបស់រដ្ឋអំណាចចិននេះក៏បានជំរុញឱ្យមានការព្រួយបារម្ភមួយចំនួនលើប្រព័ន្ធផ្សព្វផ្សាយ និងបណ្តាញសង្គមក្នុងស្រុករបស់ចិន ថា វាអាចបណ្តាលមកពីមានភាពតានតឹងកើនឡើងជាមួយកោះតៃវ៉ាន់ ទើបអាជ្ញាធរប្រាប់ពលរដ្ឋឲ្យត្រៀមលក្ខណបែបនេះ។
ផ្ទុយទៅវិញ កាសែត The Economic Daily ដែលគ្រប់គ្រងដោយរដ្ឋចិន បានចេញផ្សាយប្រាប់ពលរដ្ឋថា កុំឲ្យមានការព្រួយបារម្ភច្រើន ការក្រើនរំឭកនេះ គឺគ្រាន់តែដើម្បីឲ្យពលរដ្ឋត្រៀមលក្ខណៈក្រែងមានការបិទខ្ទប់ណាមួយកើតឡើង ក្នុងតំបន់របស់ពួកគេតែប៉ុណ្ណោះ។
សេចក្តីប្រកាសព័ត៌មានរបស់ចិនកាលពីថ្ងៃច័ន្ទទី០១វិច្ឆិកា ថែមទាំងបានអំពាវឲ្យអាជ្ញាធរមូលដ្ឋាន បំពេញការងារឲ្យបានល្អ ដើម្បីរក្សាស្ថិរភាពតម្លៃម្ហូបអាហារនៅលើទីផ្សារ ហើយដើម្បីផ្តល់ដំណឹងបានទាន់ពេលវេលា ក្នុងករណីការផ្គត់ផ្គង់ស្បៀងមានបញ្ហា។
គួរជម្រាបថា ទន្ទឹមនឹងការឲ្យពលរដ្ឋត្រៀមស្បៀងអាហារ និងសម្ភារៈសម្រាប់រដូវរងាខាងមុខ រដ្ឋអំណាចក្រុងប៉េកាំង ក៏កំពុងយកចិត្តទុកដាក់ត្រៀមសាច់ និងបន្លែបន្ថែមទៀត ដើម្បីទុកផ្គត់ផ្គង់ដល់ថ្ងៃបុណ្យចូលឆ្នាំប្រពៃណីចិន នៅឆ្នាំក្រោយ នាអំឡុងខែកុម្ភៈខាងមុខនេះផងដែរ។អត្ថបទគួរអាន
ប៉ុន្តែកិច្ចខិតខំប្រឹងប្រែងនេះ ទំនងជាត្រូវជួបឧបសគ្គ។ ជួបឧបសគ្គ ក៏ដោយសារតែ មានភ្លៀងធ្លាក់ខ្លាំងខុសពីធម្មតាកាលពីចុងខែកញ្ញា និងដើមខែតុលាកន្លងទៅនេះ នៅភាគខាងជើងនៃប្រទេសចិន ដោយបានជន់លិចដំណាំបន្លែបង្កា ក្នុងខេត្តសានតុង (Shandong) ដែលជាខេត្តដាំដុះបន្លែបង្កាដ៏ធំរបស់ចិន។ ជាមួយគ្នានេះ ការផ្ទុះឡើងវិញនៃករណីកូវីដ-១៩ ដែលកំពុងកើតមាននៅភាគពាយព្យទៅភាគឦសាននៃផ្ទៃប្រទេស ក៏បានគំរាមកំហែង និងរំខានដល់ការផ្គត់ផ្គង់អាហារផងដែរ។
បញ្ហាទាំងនេះ ក៏បានធ្វើឲ្យតម្លៃបន្លែនៅក្នុងខេត្តសានតុង បានហក់ឡើងខ្លាំង រហូតថ្លៃជាងតម្លៃរបស់សាច់ជ្រូកទៅទៀត។ រដ្ឋាភិបាលទីក្រុងប៉េកាំងបានឲ្យដឹងថ្មីៗនេះថា តម្លៃបន្លែលក់ដុំជាមធ្យម បានកើនឡើងជិត៤០% ចាប់តាំងពីខែមុនមក។
សូមជម្រាបថា ប្រទេសចិនគ្រោងនឹងបញ្ចេញ បន្លែបម្រុងដែលរដ្ឋបានស្តុកទុកក្នុងពេលវេលាសមស្របណាមួយ ដើម្បីទប់ទល់នឹងការកើនឡើងនៃថ្លៃខ្ពស់។ នេះបើយោងតាមរបាយការណ៍របស់ទូរទស្សន៍រដ្ឋមួយ ដែលបានផ្សាយកាលពីយប់ថ្ងៃចន្ទ។ យ៉ាងណាមិញ គេមិនច្បាស់ទេថា បន្លែនោះជាប្រភេទបន្លែអ្វី និងមានចំនួនបម្រុងប៉ុន្មាននោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
