សេចក្តីប្រកាសព័ត៌មានដែលបានចុះផ្សាយនៅលើទំព័រហ្វេសប៊ុកផ្លួវការរបស់ស្ថានទូតចិនប្រចាំនៅកម្ពុជា នាព្រឹកថ្ងៃទី១ ខែមិនា ឆ្នាំ២០២១ បានឲ្យដឹងថារដ្ឋាភិបាលចិនសម្រេចផ្តល់ក្នុងជំហានទី២ នូវវ៉ាក់សាំងកូវីដ-១៩ចំនួន ៤០ម៉ឺនដូសទៀតដល់ភាគីកម្ពុជា។
សេចក្តីប្រកាសព័ត៌មានដដែលបានសរសេរក្នុងន័យដើមទាំងស្រុងថា៖«ដើម្បីជួយដល់ប្រជាពលរដ្ឋកម្ពុជាដែលជាបងប្អូនរបស់ចិនក្នុងការទប់ស្កាត់នឹងជំងឺវីរុសកូវីដ-១៩ រដ្ឋាភិបាលចិនសម្រេចផ្តល់ជំនួយឥតសំណងជំហានទី២ជាវ៉ាក់សាំងកូវីដ-១៩ចំនួន ៤០ ម៉ឺនដូសជូនដល់ភាគីកម្ពុជា»
អត្ថបទទាក់ទង
សូមរំឭកថា កម្ពុជាបានទទួលវ៉ាក់សាំងកូវីដបង្ការកូវីដ១៩ពីប្រទេសចិនក្នុងជំហានទី១ចំនួន៦០ម៉ឺនដូសកាលពីថ្ងៃទី៧ខែកុម្ភៈឆ្នាំ២០២១ ហើយបើតាមក្រសួងសុខាភិបាល អ្នកដែលបានស្ម័គ្រចិត្តមកចាក់វ៉ាក់សាំងកូវីដ-១៩ Sinopharm គិតពីថ្ងៃទី១០ដល់ថ្ងៃទី២៦ខែកុម្ភ:ឆ្នាំ២០២១មានសរុប ២០០៤១នាក់ ក្នុងនោះអ្នកបានចាក់រួចមានចំនួន ១៦៣៩០នាក់ និងដែលអ្នកដែលគ្រូពេទ្យមិនអនុញ្ញាតឲ្យចាក់មានចំនួន ៣៦៥១នាក់។
បន្ថែមពីលើនេះ ក្រសួងសុខាភិបានបានពង្រីកកម្មវិធីចាក់វ៉ាក់សាំងកូវីដ-១៩ បន្តចាប់ពីថ្ងៃទី០១ ខែមីនាឆ្នាំ២០២១ ដោយបានបង្កើនទីតាំងចាក់នៅតាមបណ្តាខេត្តចំនួន ១៥ បន្ថែមទៀត។
រដ្ឋាភិបាលកម្ពុជាកាលពីពេលថ្មីៗនេះបានសម្រេចរៀបចំកម្មវិធីចាក់វ៉ាក់សាំងនេះ ជូនដល់កម្មករប្រមូលសំរាម អ្នករត់តាក់ស៊ី ម៉ូតូកង់បី និងម៉ូតូឌុប ប៉ុន្តែ មិនទាន់ដឹងថានឹងប្រព្រឹត្តទៅនៅពេលណា និងនៅកន្លែងណានៅឡើយទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
