ចិនប្រាប់អាមេរិកឲ្យឈប់ភាន់ច្រឡំតទៅទៀត ពាក់ព័ន្ធនឹងរឿងកោះតៃវ៉ាន់

ត្រូវបានចោទសួរដោយអ្នកកាសែត នៅក្នុងសន្និសីទប្រចាំខែមួយនៃក្រសួងការពារជាតិចិនកាលពីថ្ងៃព្រហស្បតិ៍ លោក វ៉ូ ឈៀន (Wu Qian) អ្នកនាំពាក្យក្រសួងការពារជាតិចិនបាននិយាយថា ការដែលចិននិងអាមេរិក មានទំនាក់ទំនងដែលមានស្ថិរភាពមួយជាមួយគ្នា គែជារឿងល្អសម្រាប់ភាគីទាំងសងខាង ក៏ដូចជាពិភពលោកទាំងមូល។

លោកបន្តថា ចិនចិញ្ចឹមចិត្តចង់រក្សាទំនាក់ទំនង ការដោះដូរ និងកិច្ចសហប្រតិបត្តិការជាមួយអាមេរិករហូត ប៉ុន្តែមានពេលខ្លះ សហរដ្ឋអាមេរិកបាននិយាយស្តីដោយគ្មានទំនួលខុសត្រូវ និង បានបង្កភាពចម្រូងចម្រាស់ជាច្រើនផងដែរ មិនថាតែលើករណីរឿងកោះតៃវ៉ាន់ ឬសមុទ្រចិនខាងត្បូងនោះទេ។

អ្នកនាំពាក្យក្រសួងការពារជាតិចិនរូបនេះ បានស្នើចំៗឲ្យអាមេរិកឈប់យល់ច្រឡំ ឬស្រមើស្រមៃ​ចំពោះរឿងតៃវ៉ាន់នេះទៀតទៅ ចិនពុំមានភាពចាំបាច់អ្វីឲ្យអាមេរិក មកជួយសម្របសម្រួល ឬនិយាយឲ្យស្រួលស្តាប់ ឲ្យអាមេរិកឈប់មកលូកដៃ ក្នុងរឿងតៃវ៉ាន់។

ផ្ទុយស្រឡះពីអ្វីដែលចិនបានស្នើ សហរដ្ឋអាមេរិក ក្រោមរដ្ឋបាលលោកចូ បៃឌិន កាលពីពេលកន្លងទៅ បានស្វែងរកការគាំទ្រឲ្យតៃវ៉ាន់ក្លាយជាសមាជិកពេញសិទ្ធិរបស់ UN។ ប៉ុន្តែដោយមិនអាចធ្វើទៅរួច អាមេរិកបានងាកទៅបង្កើតកិច្ចប្រជុំមួយ ដែលមានឈ្មោះថា កិច្ចប្រជុំកំពូលដើម្បីលទ្ធិប្រជាធិបតេយ្យ នៅខែធ្នូនេះ ដោយបានអញ្ជើញប្រទេសនានាឲ្យចូលរួមជាង១០០ប្រទេស ហើយបានអូសកោះតៃវ៉ាន់ឲ្យមកចូលរួម ក្នុងកិច្ចប្រជុំអន្តរជាតិនេះដែរ ប៉ុន្តែអាមេរិកមិនបានអញ្ជើញចិនឲ្យចូលរួមទេ។

លើសពីនេះទៀត កាលពីល្ងាចថ្ងៃព្រហស្បតិ៍ សមាជិកសភាអាមេរិក៥រូបទៀតហើយ បានទៅដល់ទឹកដីកោះតៃវ៉ាន់ជាលើកទី២ក្នុងខែវិច្ឆិកានេះ ដើម្បីបំពេញទស្សនកិច្ចការងារនៅទីនោះ។  យ៉ាងណាមិញ ទស្សនកិច្ចលើកនេះ គឺធ្វើឡើងក្នុងពេលខ្លីមួយប៉ុណ្ណោះ ដោយអ្នកទាំង៥គ្រោងចាកចេញពីកោះតៃវ៉ាន់វិញ នៅថ្ងៃសុក្រ។

គួរជម្រាបថា បើតាមប្រព័ន្ធក្នុងស្រុកកោះតៃវ៉ាន់ ប្រតិភូអាមេរិកធ្វើទស្សនកិច្ចដោយពិភាក្សាផ្តោតសំខាន់ លើវិស័យការពារជាតិ ព្រមទាំងជួបជាមួយថ្នាក់ដឹកនាំកំពូលកោះតៃវ៉ាន់ លោកស្រី សៃ អ៊ីងហ្វិនផងដែរ៕