ចិនចេញមុខប្រាប់មេដឹកនាំតៃវ៉ាន់ កុំឲ្យប្រដូចស្ថានការណ៍នៅអ៊ុយក្រែន ជាមួយនឹងស្ថានការណ៍នៅកោះតៃវ៉ាន់

អ្នកនាំពាក្យរូបនេះបានច្រានចោលរាល់ទំនាក់ទំនងរវាងបញ្ហាអ៊ុយក្រែន និងតៃវ៉ាន់ ដោយបានសង្កត់ធ្ងន់ថា «តៃវ៉ាន់មិនមែនជាអ៊ុយក្រែនទេ តៃវ៉ាន់តែងតែជាផ្នែកដែលមិនអាចកាត់ផ្តាច់ពីប្រទេសចិនបាន នេះជាការពិតទាំងផ្នែកច្បាប់និងប្រវត្តិសាស្ត្រ ដែលមិនអាចប្រកែកបាន»។

លោកស្រី ឈុនយ៊ីងបន្តថា បញ្ហាតៃវ៉ាន់ជាបញ្ហាមួយដែលនៅសេសសល់ពីសង្គ្រាមស៊ីវិលកាលពីអតីតកាល ប៉ុន្តែបញ្ហាបូរណភាពរបស់ចិនមិនគួរត្រូវបានគេលូកដៃនោះទេ។ ការលើកឡើងបែបនេះ ទំនងជាបានឆ្លើយតបទៅនាយករដ្ឋមន្ត្រីអង់គ្លេសបូរីស ចនសុន ដែលធ្លាប់បានព្រមានពីស្ថានការណ៍តៃវ៉ាន់ ដូចនឹងអ្វីដែលកំពុងកើតឡើងនៅអ៊ុយក្រែនដែរ។ 

លោក ប៊ូរីស ចនសុន នៅសប្តាហ៍មុនបានគូសបញ្ជាក់ថា ប្រសិនបើអ៊ុយក្រែនមានគ្រោះថ្នាក់មែននោះ ក្តីបារម្ភនឹងរាលដាលដល់តំបន់អាស៊ីខាងកើត រួមទាំងកោះតៃវ៉ាន់ដែលកំពុងរងការគំរាមកំហែងពីទីក្រុងប៉េកាំងស្រាប់ទៅហើយផងដែរ។ 

គួរជម្រាបថា ការចេញមកប្រតិកម្មរបស់ប៉េកាំងដូចនេះដែរ ធ្វើឡើងនៅមួយថ្ងៃ បន្ទាប់ពីប្រមុខដឹកនាំកោះតៃវ៉ាន់ លោកស្រី សៃ អ៊ីងវិន បានសម្តែងការភ័យខ្លាចថា ទីក្រុងប៉េកាំងអាចទាញយកផលប្រយោជន៍ ពេលដែលលោកខាងលិចកំពុងជាប់ដៃ នឹងវិបត្តិនៅអ៊ុយក្រែន ដោយឆ្លៀតឱកាសវាយប្រហារ ឬដើម្បីបង្កើនសម្ពាធលើកោះកោះតៃវ៉ាន់។ យ៉ាងណាមិញ តៃវ៉ាន់បានបង្កើតឡើងនូវក្រុមតាមដានមួយក្រុម ដើម្បីអង្កេតស្ថានការណ៍នៅអ៊ុយក្រែន សម្រាប់សុវត្ថិភាពដែនកោះរបស់ខ្លួនថែមទៀត។

គួរកត់សម្គាល់ថា ចិនបានប្រកាន់ជំហរប្រុងប្រយ័ត្នណាស់ដោយមិនសូវជាមានប្រតិកម្មអ្វីច្រើននោះទេ ជុំវិញវិបត្តិនៅអ៊ុយក្រែន ប៉ុន្តែប៉េកាំងបានផ្តល់ការគាំទ្រច្រើនឡើងៗដល់ប្រធានាធិបតីរុស្ស៊ី លោកវ៉្លាឌីមៀ ពូទីន។ ចិនជារឿយៗបានបង្ហាញការគាំទ្រដល់រុស្ស៊ី ក្នុងសំណុំរឿងអ៊ុយក្រែន ដោយបន្ទោសក្រុមលោកខាងលិចថាចង់បង្កើតសង្គ្រាមត្រជាក់ជាថ្មី និងអំពាវនាវឱ្យណាតូគោរពក្តីព្រួយបារម្ភចំពោះបញ្ហាសន្តិសុខជាតិរបស់រុស្ស៊ី។ 

យ៉ាងណាក៏ដោយ ពេលនេះអ៊ុយក្រែនកំពុងស្ថិតក្រោមភាពអាសន្នហើយ ក្រោយរុស្សីប្រកាសបើកប្រតិបត្តិការយោធាជាផ្លូវការ។ តើកោះតៃវ៉ាន់ពិតជាមានគ្រោះថ្នាក់ ដូចអ្វីដែលគេព្រួយបារម្ភមែន ឬមួយការអះអាងពីក្រុងប៉េកាំងជាការពិត? យើងនឹងរងចាំតាមដានបន្តទៀត!