លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុនអចលនទ្រព្យ ស៊ីភីអិល បានថ្លែងបញ្ជាក់ប្រាប់សារព័ត៌មាន ខេមបូណូមីស ថា នៅឆ្នាំ២០១៧កន្លងទៅ វិស័យអចលនទ្រព្យនៅកម្ពុជាមានដំណើរការល្អ ដែលធ្វើឲ្យអ្នកវិនិយោគមានជំនឿលើវិស័យនេះ។
លោកឧកញ៉ាបញ្ជាក់យ៉ាងដូច្នេះថា៖ «វិស័យអចលនវត្ថុនៅឆ្នាំ២០១៧ មានដំណើរការល្អ ព្រោះ ទាំងអ្នកវិនិយោគ និងម្ចាស់អចលនវត្ថុ ពួកគាត់មានជំនឿលើវិស័យអចលនវត្ថុយើង។ ហើយការទិញការលក់ ការជួល និងវិស័យសំណង់ គឺអត់មានធ្លាក់ចុះនោះទេ»។
លោកឧកញ៉ាបន្តថា ការកើនឡើងនូវតម្លៃអចលនទ្រព្យលេចធ្លោជាងគេនៅឆ្នាំ២០១៧ គឺនៅខេត្តព្រះសីហនុ ដោយសារតែវិនិយោគិនចិនបានសម្រុកមកបោះទុនវិនិយោគនៅទីនោះ។ លើសពីនេះ កំណើនតម្លៃអចលនទ្រព្យនេះ បានធ្វើឲ្យពលរដ្ឋបារម្ភជុំវិញកំណើនតម្លៃសេវាផ្សេងៗនៅទីក្រុងទេសចរណ៍មាត់សមុទ្រមួយនេះ។
តើអ្នកបានអានអត្ថបទនេះ ឬនៅ?
លោកឧកញ៉ាអត្ថាធិប្បាយថា៖ «ការរីកលូតលាស់នៃវិស័យសំណង់ គឺក្រុងព្រះសីហនុលេចធ្លោជាងគេនៅឆ្នាំ២០១៧ ដែលធ្វើតម្លៃអចលនទ្រព្យមានការកើនឡើងមិនគួរឲ្យជឿ ហើយធ្វើឲ្យទាំងអ្នកលក់និងអ្នកទិញ បារម្ភថា ថ្ងៃក្រោយ លំបាកទៅកម្សាន្ដនៅខេត្តព្រះសីហនុ ដោយសារតែវិនិយោគិនចិនច្រើនពេក»។
តាមពិតទៅ ចិនគឺជាវិនិយោគិនធំជាងគេបំផុតក្នុងវិស័យសំណង់នៅកម្ពុជាក្នុងរយៈពេល១៧ឆ្នាំមកនេះ ពោល គឺមានគម្រោងជាង ១២១គម្រោង ដែលគិតជាទឹកប្រាក់មានប្រមាណជិត ២ពាន់លានដុល្លារអាមេរិក។
លោក ង៉ែត ជូ អ្នកជំនាញសេដ្ឋកិច្ច បានអត្ថាធិប្បាយថា ការរីកលូតលាស់នៃវិស័យសំណង់របស់ចិននៅកម្ពុជា ដូចជា អគារខ្ពស់ បុរី ខុនដូ និងហេដ្ឋារចនាសម្ព័ន្ធទាំងនៅរាជធានីភ្នំពេញ និងខេត្តព្រះសីហនុ បានបង្កើតការងារដល់កម្មករខ្មែរប្រមាណពីជាង ២៥ម៉ឺនក្នុងមួយថ្ងៃ។ យ៉ាងនេះក្តី ការវិនិយោគរបស់ចិន ក៏បានផ្តល់ផលអវិជ្ជមានមួយចំនួនផងដែរ។
តើអ្នកបានអានអត្ថបទនេះឬនៅ?
លោក ង៉ែត ជូ បានពន្យល់ថា៖ «ការវិនិយោគរបស់ចិន មានរូបភាពពីរ គឺការអភិវឌ្ឍគម្រោងបែបឯកជន ដូចជា អគារខុនដូ ជាដើម និងការវិនិយោគផ្នែកសាធារណៈ ដូចជា ផ្លូវ ថ្នល់ ស្ពាន ដែលរដ្ឋាភិបាលកម្ពុជាទទួលបានកម្ចីភាគច្រើនពីប្រទេសចិន។ ការវិនិយោគទាំងពីររូបភាពនេះ មានលក្ខណៈប្រហាក់ប្រហែលគ្នា ត្រង់ថា រៀងរាល់ក្រុមហ៊ុនសាងសង់ អ្នកជំនាញការ ភាគច្រើន គឺមកពីប្រទេសចិន ហើយវត្ថុធាតុដើមភាគច្រើន ដូចជា សម្ភារៈសំណង់ផ្សេងៗ គឺបាននាំមកពីប្រទេសចិន។ នេះជាផលអវិជ្ជមាន ព្រោះ យើងអត់សូវបានប្រើវត្ថុធាតុដើមក្នុងស្រុក ដែលធ្វើឲ្យលុយត្រូវហូរចេញទៅក្រៅប្រទេសវិញ»។
ក្រៅពីលំហូរសាច់ប្រាក់ចេញទៅក្រៅប្រទេសវិញ គុណភាពសំណង់របស់ចិនក៏បានក្លាយជាការព្រួយបារម្ភចំពោះអ្នកជំនាញរូបនេះផងដែរ។
លោក ង៉ែត ជូ បន្ថែមថា៖ «នៅកម្ពុជាយើងមិនទាន់មានច្បាប់ស្ដង់ដារសំណង់ ហើយដោយសារក្រុមហ៊ុនចិនផ្តោតលើការសាងសង់ដោយមានថ្លៃដើមទាប និងមានការសន្សំសំចៃខ្លាំងពេក នេះជាការព្រួយបារម្ភធំមែនទែន។ ការព្រួយបារម្ភលើគុណភាពនិងសុវត្ថិភាពនៃអគារ ទាក់ទងនឹងបរិស្ថាននៃការរស់នៅ ឧទាហរណ៍ ថា ខុនដូមួយ តើកន្លែងណាទៅជាប្រព័ន្ធសុវត្ថិភាព? ពេលមានភ្លើងឆេះ ត្រូវចេញតាមផ្លូវណា? អាហ្នឹងយើងមានការបារម្ភមែនទែន»។
លោកបន្តថា៖ «ទោះបីសំណង់ចិនមានផលអវិជ្ជមានខ្លះមែន តែផលវិជ្ជមានក៏មានដែរ គឺការរីកចម្រើននៃសំណង់ចិន បានបង្ហាញថា កម្ពុជាបានបង្ហាញប្រាប់ពិភពលោកថា កម្ពុជាកំពុងមានការអភិវឌ្ឍ ដោយយើងបានទទួលបានហេដ្ឋារចនាសម្ព័ន្ធរូបវ័ន្ត មានន័យថា ស្ពាន ថ្នល់ ដែលបានសម្រួលដល់ការអភិវឌ្ឍសេដ្ឋកិច្ច»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
