អគារសាងសង់ដោយជនជាតិចិន ដែលបានបាក់សង្កត់កម្មករខ្មែរ នៅក្រុងព្រះសីហនុ តាំងតែពីព្រលឹមថ្ងៃទី ២២ ខែមិថុនា ដែលគិតមកទល់ពេលនេះ គឺមានរយៈពេលជាងថ្ងៃទៅហើយខណៈដែលចំនួនអ្នកស្លាប់ និងរបួសបានបន្តរកឃើញកើនឡើងជាបន្តបន្ទាប់។ ពោលគឺ គិតមកទល់រសៀលថ្ងៃទី ២៣ មិថុនានេះ របាយការណ៍ចុងក្រោយបង្ហាញថា ចំនួនអ្នកស្លាប់បានកើនឡើងដល់ ១៨ នាក់ និងអ្នករបួសមាន២៤នាក់។
ក្រោយពីរឿងនេះ កើតឡើងភ្លាមៗ រាជរដ្ឋាភិបាលកម្ពុជា រួមទាំងថ្នាក់ដឹកនាំកំពូលមួយចំនួនផង បានចេញនូវសេចក្ដីថ្លែងការណ៍និងចូលរួមសោកស្ដាយជាពន់ពេក អំពីឧបទ្ទវហេតុដ៏រន្ធត់នេះ។ ប៉ុន្ដែ អ្វីដែល គេចាប់អារម្មណ៍ គឺមកដល់រសៀលថ្ងៃទី២៣ មិថុនានេះ គេមិនទាន់ឃើញប្រតិកម្ម ឬការចេញនូវសេចក្ដីថ្លែងការណ៍ណាមួយចេញពីសំណាក់ស្ថានទូតចិនប្រចាំកម្ពុជានោះទេ ខណៈដែលករណីអគាររលំបាក់សង្កត់កម្មករខ្មែររាប់សិបនាក់នេះ ខាងសមត្ថកិច្ចក៏បានឃាត់ខ្លួនជនជាតិចិនដែលជាប់ពាក់ព័ន្ធនឹងការសាងសង់អគារនេះ ចំនួន៣នាក់ ដែលរូមមាន ម្ចាស់ការដ្ឋានសំណង់ ថៅកែម៉ៅការសាងសង់ និង អ្នកម៉ៅការបូកជញ្ជាំងអគារ។
ទិដ្ឋភាពអាជ្ញាធរ និងមន្ត្រីជំនាញកំពុងសង្គ្រោះអ្នកជាប់ក្នុងគំនរអគារបាក់សង្កត់ (រូបភាព៖ ខេមបូណូមីស)
អត្ថបទទាក់ទង!
និយាយប្រាប់អ្នកសារព័ត៌មាន នៅក្នុងហេតុការណ៍សង្គ្រោះមនុស្សដែលជាប់ក្នុងគំនរអគារបាក់សង្កត់នេះ លោក យន្ដ មីន អភិបាលខេត្តព្រះសីហនុ បានឲ្យដឹងថា អគារនេះ គឺសាងសង់មិនមានច្បាប់អនុញ្ញាតពីអាជ្ញាធរនោះទេ ហើយខាងអាជ្ញាធរក៏បានចុះមកហាមឃាត់ចំនួន២លើករួចមកហើយ ប៉ុន្ដែ ម្ចាស់អគារនេះ នៅតែស្ដាប់ និងសហការជាមួយខាងអាជ្ញាធរនោះឡើយ។
តាមប្រភពព័ត៌មាន ក្នុងហេតុការណ៍នេះ បានបញ្ជាក់ថា តាមពិតអគារនេះ សាងសង់ទើបតែបាន ៧០ ទៅ៨០ ភាគរយប៉ុណ្ណោះ មិនទាន់រួចរាល់ទាំងស្រុងទេ ប៉ុន្ដែវាត្រូវបានអនុញ្ញាតឲ្យកម្មករខ្មែររាប់សិបនាក់ស្នាក់នៅទីនោះ។
ទិដ្ឋភាពអាជ្ញាធរ និងមន្ត្រីជំនាញកំពុងសង្គ្រោះអ្នកជាប់ក្នុងគំនរអគារបាក់សង្កត់ (រូបភាព៖ ខេមបូណូមីស)
ជាមួយគ្នានេះដែរ នៅយប់ថ្ងៃទី២២ ខែមិថុនា ឆ្នាំ២០១៩នេះ សម្តេច ហ៊ុន សែន ដែលកំពុងចូលរួមកិច្ចប្រជុំកំពូលអាស៊ាននៅប្រទេសថៃ បានប្រកាសសម្រេចយកថវិកាជាតិ ឧបត្ថម្ភដល់ជនរងគ្រោះក្នុងសោកនាដកម្មដ៏រន្ធត់នេះ ដោយ អ្នកស្លាប់ទទួលបាន ៤០លានរៀល ឬស្មើនឹងមួយម៉ឺនដុល្លារអាមេរិក និងអ្នករងរបួសទទួលបាន ៥លានរៀល និងទទួលការព្យាបាលដោយឥតគិតថ្លៃ។
ទិដ្ឋភាពអាជ្ញាធរ និងមន្ត្រីជំនាញកំពុងសង្គ្រោះអ្នកជាប់ក្នុងគំនរអគារបាក់សង្កត់ (រូបភាព៖ ខេមបូណូមីស)
នៅក្នុងបណ្ដាញសង្គមហ្វេសបុកឯណោះវិញតាំងពីថ្ងៃកើតហេតុមកទល់នេះ អ្នកលេងបណ្ដាញសង្គមនៅតែបន្តរិះគន់យ៉ាងចាស់ដៃ ទៅលើការធ្វេសប្រហែស របស់អាជ្ញាធរខេត្តព្រះសីហុន ដែលបណ្ដែតបណ្ដោយឲ្យសំណង់ដែលចិនគ្មានគុណភាព និងច្បាប់អនុញ្ញាតនេះ ឲ្យបន្ដសាងសង់ និងបានរលំបាក់សង្កត់មនុស្សរាប់សិបនាក់ស្លាប់ និងរបួស។ អ្នកលេងបណ្ដាញសង្គមហ្វេសប៊ុក មួយចំនួន ក៏បានរិះគន់ និងស្នើឲ្យរដ្ឋភិបាល សម្រេចដកអភិបាលខេត្តព្រះសីហនុ ចេញពីតំណែង និងដកមន្ត្រីពាក់ព័ន្ធផ្សេងទៀតផងដែរ។
ទោះយ៉ាងណា នៅក្នុងការឆ្លើយតប Comment នៅលើហ្វេសប៊ុក សម្តេចតេជោ បញ្ជាក់ថា “សូមកុំទាន់និយាយដល់រឿងដកឬតែងតាំងតែត្រូវផ្តោតការយកចិត្តទុកដាក់លើការរុករក និងសង្រ្គាះជាមុនសិន។ សុំការយោគយល់ពីបងប្អូនជនរួមជាតិពីកន្លែងប្រជុំអាស៊ាននៅបាងកកព្រះរាជាណាចក្រថៃ”។
នៅក្នុង ហេតុការណ៍បាក់អគារសង្កត់កម្មករខ្មែរ រាប់សិបនាក់នេះដែរ គេសង្កេតឃើញថា ខាងអាជ្ញាធរ ខេត្តព្រះសីហនុ ក៏បានខិតខំខ្នះខ្នែងខ្លាំងណាស់ដែរ ដើម្បីសង្គ្រោះជីវិតកម្មករដែលរករបួស និងស្វែងរកសាកសពអ្នកដែលបានស្លាប់បាត់បង់ជីវិត។ ក្នុងនោះ មានការចូលរួមពីកម្លាំងសមត្ថកិច្ចចម្រុះ និងមានការចុះជួយពីអ្នកជំនាញជនជាតិចិនមួយចំនួនផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
