ថ្លែងនៅចំពោះមុខរដ្ឋមន្ត្រីក្រសួងកសិកម្មកម្ពុជា លោក ZHAO Bo នាយកគ្រប់គ្រងទូទៅក្រុមហ៊ុន Coconut Palm Group បានលើកឡើងថា គោលបំណងនៃដំណើរទស្សនកិច្ចមកកម្ពុជានាពេលនេះគឺទី១- ស្វែងយល់បន្ថែមពីសក្តានុពលដំណាំដូងដើម្បីធ្វើការវិនិយោគ និងទី២- សិក្សាលម្អិតអំពីសេចក្តីត្រូវការ លទ្ធភាពផ្គត់ផ្គង់ផ្លែងដូង និងទីផ្សារដើម្បីបង្កើតរោងចក្រកែច្នៃទឹកដូង ផ្គត់ផ្គង់ឲ្យទីផ្សារក្នុងស្រុក និងនាំចេញទៅកាន់ទីផ្សារអន្តរជាតិ ជាពិសេសទីផ្សារចិន។
លោក ZHAO Bo បានបន្តថាទៀតថា ក្រុមហ៊ុន Coconut Palm Group គឹជាក្រុមហ៊ុនធំជាងគេនៅប្រទេសចិន មានទីតាំងនៅខេត្តហាយណាន ក្នុងមួយឆ្នាំអាចរកចំណូលបាន ៤០០លានដុល្លារពីផលិតផលដូង ក្នុងមួយថ្ងៃប្រើប្រាស់ដូង ៦០ម៉ឺនផ្លែ ប្រើនិយោជិក ៦ពាន់នាក់ បាននាំចេញផលិតផលដូងទៅកាន់ទីផ្សារ៣៨ ប្រទេស។ ក្រុមហ៊ុនសម្រេចចិត្តមកសិក្សាលម្អិតបន្ថែមដើម្បីធ្វើការវិនិយោគលើដំណាំនេះនៅកម្ពុជា ដែលទាមទារត្រូវការដីចំនួន ១៤ពានហិកតា។
អត្ថបទទាក់ទង!
តំណាងក្រុមហ៊ុនចិនរូបនេះបានបញ្ជាក់ទៀតថា នឹងរៀបចំក្រុម ការងារបច្ចេកទេសមកកម្ពុជាម្តងទៀតក្នុងពេលឆាប់ៗដើម្បីសិក្សាដី បរិស្ថាន សក្តានុពលនៅតាមតំបន់ ទីផ្សារ និងច្រកនាំចេញជាដើម។
ឯកឧត្តម វេង សាខុន រដ្ឋមន្ត្រីក្រសួងកសិកម្ម បានអះអាងដែរថា លោកគាំទ្រចំពោះឆន្ទៈវិនិយោគលើដំណាំដូង និងបង្កើតរោងចក្រកែច្នៃដូងនៅកម្ពុជានេះ។ ឯកឧត្តម ជឿជាក់ថា ប្រសិនបើកម្ពុជាយើងបញ្ចូលបច្ចេកទេសដាំដុះសមស្របមួយឲ្យអ្នកផលិត និងរៀបចំ ឬសហគមន៍ផលិត នោះផលិតផលដូងនឹងមានតម្លៃបន្ថែមខ្ពស់ ដោយសារតែមានតម្រូវការទីផ្សារ។
តាមការគូសបញ្ជាក់របស់ឯកឧត្តមរដ្ឋមន្ត្រី ក្រុមហ៊ុនចិននេះ អាចចាប់ផ្ដើមបានឆាប់ជាពិសេសជាមួយ កសិករនៅខេត្តកំពត តាកែវ កោះកុង និងខេត្តព្រះសីហនុ ដែលសុទ្ធតែជាតំបន់មានសក្តានុពល។
លោក ZHAO Bo តំណាងក្រុមហ៊ុនចិន (ឆ្វេង) ជួបជាមួយនឹងរដ្ឋមន្ត្រីក្រសួងកសិកម្មកម្ពុជា (ស្ដាំ)
(រូបភាព៖ ហ្វេសបុកក្រសួងកសិកម្ម)
គួរបញ្ជាក់ថា បច្ចុប្បន្ន ប្រទេសចិន បានទិញផលិតកសិកម្មពីកម្ពុជាទៅមានដូចជា អង្ករ ដំឡុងមី ស្វាយចន្ទី និងចេក។ ហើយថ្មីនេះដែរ រដ្ឋាភិបាលប្រទេសទាំងពិរ ក៏បានប្រកាសពីការជំរុញឲ្យមានការចុះកិច្ចព្រមព្រៀងលើការនាំចេញផ្លែស្វាយពីកម្ពុជាទៅកាន់ប្រទេសចិនផងដែរ។ ក្រៅពីនេះ ក្រសួងកសិកម្មក៏សង្ឃឹមដែរថា ភាគិចិននឹងបន្តបើកផ្លូវសម្រាប់ផលិតផលរបស់កម្ពុជាជាច្រើនមុខទៀតចូលទៅកាន់ទិផ្សារប្រទេសចិន ដូចជា ផ្លែតាង៉ែន ម្រេច ស្រការនាគ ទឹកមាត់ត្រចៀកកាំ និងផ្លែដូងក្រអូប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
