តាមរយៈឯកអគ្គរដ្ឋទូតចិនក្នុងប្រទេសឥណ្ឌាបានឲ្យដឹងថា កន្លងមករដ្ឋាភិបាលចិនបានផ្តល់ម៉ាស៊ីនផលិតខ្យល់អុកស៊ីហ្សែនចំនួន ១០០គ្រឿង ម៉ាស៊ីនជំនួយដង្ហើម៤០គ្រឿង និងថវិកាចំនួន ១លានដុល្លារផ្សេងទៀតផ្តល់ទៅឲ្យឥណ្ឌា នៅអំឡុងដែលក្បែរខាងចិនមួយនេះ កំពុងដុនដាបខ្លាំងដោយសារកូវីដ-១៩រាតត្បាត។
ក្រៅពីនេះ រដ្ឋាភិបាលក្រុងប៉េកាំងបានលើកទឹកចិត្តគ្រប់ក្រុមហ៊ុនឯកជនចិនទាំងអស់ ឲ្យជួយពន្លឿនការផ្គត់ផ្គង់ទៅតាមតម្រូវការបញ្ជាទិញពីឥណ្ដាឲ្យបានឆាប់រហ័ស។
ជាក់ស្តែង តាមការចុះផ្សាយដោយព័ត៌មានក្នុងស្រុកឥណ្ឌាឲ្យដឹងថា ក្រុមហ៊ុន និងរោងចក្រផលិតឧបករណ៍ពេទ្យរបស់ចិន បានទទួលការបញ្ជាទិញ ម៉ាស៊ីនផលិតអុកស៊ីហ្សែនពីឥណ្ឌាគិតត្រឹមដើមខែឧសភានេះមានចំនួន ៦ម៉ឺនគ្រឿងហើយ។ ប្រការនេះត្រូវបានគេជឿថា ការនាំចូលបរិក្ខារពេទ្យពីចិនទៅឥណ្ឌា បានកើនឡើងដល់ទៅ៦ដង គិតចាប់តាំងពីពាក់កណ្តាលខែមេសាមក។
ទោះបី ប្រទេសចិនជាប្រទេសអ្នកផលិតអុកស៊ីហ្សែនធំជាងគេមួយលើពិភពលោកក៏ដោយ ប៉ុន្តែមានរោងចក្រខ្លះក្នុងប្រទេសមួយនេះ បានត្អូញត្អែរពីកង្វះខាតវត្ថុធាតុដើមក្នុងការផលិត ក្រោយតម្រូវការហក់ឡើងខ្លាំងពេក សឹងតែធ្វើមិនទាន់។ ប្រការនេះ ត្រូវបានរោងចក្រអះអាងថា ធ្វើឲ្យតម្លៃខ្យល់អុកស៊ីហ្សែនឡើងថ្លៃខុសពីធម្មតា។
អត្ថបទទាក់ទង
គួររំឭកថា កាលពីចុងខែមេសាកន្លងទៅ គ្រាដែលឥណ្ឌាកំពុងមានអ្នកឆ្លងកូវីដ១៩កើនឡើងយ៉ាងគំហក ប្រធានាធិបតីចិនលោក ស៊ី ជីងពីងបាននិយាយថា «រដ្ឋាភិបាលចិនព្រួយបារម្ភពីស្ថានការណ៍ដ៏អាក្រក់នៅក្នុងប្រទេសឥណ្ឌា ហើយលោកថែមទាំងបានសន្យាថា និងរឹតចំណងកិច្ចសហប្រតិបត្តិការជាមួយឥណ្ឌា ប្រយុទ្ធនឹងកូវីដ-១៩តាមរយៈការផ្តល់ជាជំនួយនានា។»
ជាក់ស្តែង គេឃើញមានជំនួយជាសម្ភារបរិក្ខារពេទ្យជាច្រើនត្រូវបានដឹកជញ្ជូនពីប្រទេសចិនទៅឥណ្ឌាជាបន្តបន្ទាប់។ ក្រោពីចិន ប្រទេសជាច្រើនទៀត ដូចជាសហភាពអឺរ៉ុប អង់គ្លេស និងអាមេរិកជាដើម ក៏បានផ្ដល់ជំនួយសម្ភារបរិក្ខាពេទ្យ និងវ៉ាក់សាំងកូវីដ-១៩ មួយចំនួនសម្រាប់ឥណ្ឌាផងដែរ។
គួរជម្រាបជូនថា រដ្ឋធានីញូដេលី និងរដ្ឋមួយចំនួនទៀតរបស់ឥណ្ឌាបានឈានចូលដល់សប្តាហ៍ទី៤នៃការបិទខ្ទប់ហើយ ក្រោយពីរលកឆ្លងកូវីដ-១៩មិនបានបង្ហាញពីសញ្ញាថមថយនោះទេ ពោលគឺអ្នកឆ្លងថ្មីមានមិនក្រោមពី ៣៥ម៉ឺននាក់ឡើយក្នុងមួយថ្ងៃ ខណៈអ្នកស្លាប់មានរាប់ពាន់នាក់ ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
