ត្រកូលគ្រួសារ Chearavanont ដែលជាម្ចាស់ក្រុមហ៊ុន CP Group នៅតែស្ថិតនៅក្នុងលំដាប់កំពូលនៅក្នុងប្រទេសថៃ ដែលជាគ្រួសារមានទ្រព្យសម្បត្តិស្ដុកស្ដម្ភបំផុតមួយ ដោយមានទ្រព្យសម្បត្តិសរុបប្រមាណ ៣០,៧ ពាន់លានដុល្លារអាមេរិក។
អាណាចក្រជំនួញរបស់ត្រកូលគ្រួសារ Chearavanont ត្រូវបានបង្កើតឡើងតាំងពីឆ្នាំ១៩២១ ហើយបច្ចុប្បន្ន មានការវិនិយោគគ្របដណ្ដប់លើវិស័យកសិកម្ម, កែច្នៃម្ហូបអាហារ, ការលក់រាយ និងវិស័យទូរគមនាគមន៍នៅទូទាំង២១ ប្រទេសនៅលើពិភពលោក។
ទន្ទឹមនឹងនេះដែរ ត្រកូលគ្រួសារដែលមានទ្រព្យសម្បត្តិច្រើនជាងបំផុតក្នុងពិភពលោក គឺនៅតែជាត្រូកូល Walton ដែលជាម្ចាស់ក្រុមហ៊ុន Walmart និងមានទ្រព្យសម្បត្តិសរុបប្រមាណ ២១៥ ពាន់លានដុល្លារអាមេរិក។
អត្ថបទទាក់ទង!
តាំងពីប្រទេសថៃត្រូវបានរងគ្រោះដោយសារតែវិបត្តិកូវីដ-១៩មក ក្រុមហ៊ុន CP Group បានបង្កើតឡើងនូវគម្រោងជាច្រើន ដើម្បីជួយដោះស្រាយបញ្ហាជាមួយនឹងរាជរដ្ឋាភិបាល ដូចជាបានបង្កើតនូវរោងចក្រផលិតម៉ាសតម្លៃ ៣លានដុល្លារអាមេរិក និងចំណាយប្រមាណ ៦លានដុល្លារអាមេរិក ទៅលើការផ្គត់ផ្គង់ចំណីអាហារ និងថ្នាំសង្កូវជួយដល់អ្នកជំងឺកូវីដ-១៩និងក្នុងយុទ្ធនាការប្រយុទ្ធប្រឆាំងមេរោគកូវីដ-១៩។
ក្រុមហ៊ុនយក្សរបស់ថៃមួយនេះ ក៏បានបរិច្ចាគប្រាក់សម្រាប់មន្ទីរពេទ្យចំនួន ៧៧ ដោយមន្ទីរពេទ្យនីមួយៗទទួលបានជាង ៣ម៉ឺនដុល្លារអាមេរិក ព្រមទាំងបានផ្ដល់ជូននូវសម្ភារជាច្រើនផ្សេងទៀតផងដែរ។
ក្រុមហ៊ុន CP Group បាននិយាយថា ក្រុមហ៊ុននឹងមិនកាត់បន្ថយបុគ្គលិករបស់ខ្លួនដែលមានជាង៤០ម៉ឺននាក់នៅទូទាំងពិភពលោកនោះទេ បើទោះបីជាកំពុងមានវិបត្តិកូវីដ-១៩ កើតឡើងក៏ដោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
