យោងតាមកាសែត បាងកកប៉ុស្តិ៍ របស់ថៃ ដែលចុះផ្សាយកាលពីថ្ងៃទី៦ មីនា ២០២០, លោក ថានិន និយាយថា រោងចក្រដែលក្រុមហ៊ុន CP កំពុងសាងសង់ឡើងនេះ មានសមត្ថភាពផលិតម៉ាស់មុខបានប្រហែល ៣លានម៉ាស់ ក្នុងមួយខែ និងថា រោងចក្រនេះ អាចនឹងដំណើរការក្នុងពេល ៥សប្ដាហ៍ខាងមុខ។
ម៉ាស់ទាំងនេះ នឹងត្រូវផ្គត់ផ្គង់ដោយឥតគិតថ្លៃទៅដល់មន្ទីរពេទ្យ និងបុគ្គលិកពេទ្យ ដែលប្រយុទ្ធប្រឆាំងនឹងវីរុស Covid-19 ព្រមទាំងប្រជាជនដែលខ្វះលទ្ធភាពទិញម៉ាស់។
អត្ថបទទាក់ទង
បើតាមប្រធានជាន់ខ្ពស់របស់ CP, រោងចក្រផលិតម៉ាស់របស់ក្រុមហ៊ុន CP នេះ នឹងបន្តប្រតិបត្តិការ ទោះបីការរាតត្បាតនៃវីរុស Covid-19 ស្ងប់ស្ងាត់ទៅវិញក្ដី ហើយរាល់ប្រាក់ចំណេញ បន្ទាប់ពីដកការចំណាយចេញ នឹងបរិច្ចាគទៅឲ្យមជ្ឈមណ្ឌលបេះដូងរបស់មន្ទីរពេទ្យព្រះបាទជូឡាឡុងកន។
ជាមួយគ្នានេះដែរ ក្រុមហ៊ុនបុត្រសម្ព័ន្ធរបស់ CP គឺ CPF ក៏បានចាប់ផ្ដើមផ្ដល់អាហារដោយឥតគិតថ្លៃ ដល់បុគ្គលិកពេទ្យ និងប្រជាជនដែលស្ថិតក្រោមការដាក់ឲ្យរស់នៅដាច់ឡែក នៅទូទាំងប្រទេស ផងដែរ ដើម្បីចូលរួមចំណែកសម្រាលបន្ទុករបស់រដ្ឋាភិបាល ក្នុងការប្រយុទ្ធប្រឆាំងនឹងវីរុស Covid-19៕
