ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានគូសបញ្ជាក់ថា ក្រុមហ៊ុន PESTECH Cambodia បានក្លាយជាក្រុមហ៊ុនទី១៣ ដែលបានចុះបញ្ជីនៅលើ ផ្សារមូលបត្រកម្ពុជាជាផ្លូវការ ហើយអ្វីដែលទាក់ទាញ គឺក្រុមហ៊ុនថ្មីមួយនេះ មកពីវិស័យថាមពលអគ្គិសនី ដែលជាវិស័យមួយកំពុងរីកចម្រើន ប្រកបដោយសក្តានុពល និងបានក្លាយជាជម្រើសវិនិយោគថ្មីសម្រាប់ វិនិយោគិន។
ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានឲ្យដឹងដែរថា ក្រុមហ៊ុន PESTECH Cambodia ស្ថិតនៅក្រោមក្រុមហ៊ុនមេ ដែលបានចុះបញ្ជីស្រាប់ នៅលើ ទីផ្សារមូលបត្រប្រទេសម៉ាឡេស៊ី ដូច្នេះហើយ ការចូលរួមនេះ ជាការគាំទ្រដល់ វិស័យមូលបត្រនៅកម្ពុជា ដែលអាចនឹងក្លាយជាគំរូមួយ ទាក់ទាញក្រុមហ៊ុនដទៃ ឲ្យចូលមកប្រមូលទុនពី វិស័យមូលបត្រដូចគ្នាដែរ ហើយឯកឧត្តម ក៏បានបង្ហើបដែរថា នៅចុងឆ្នាំនេះ ក៏រំពឹងទទួលបានក្រុមហ៊ុនចុះបញ្ជីថ្មីចំនួន ២ បន្ថែមទៀតដែរ។
អត្ថបទទាក់ទង!
លោក Paul Lim ប្រធានក្រុមប្រឹក្សាភិបាលប្រតិបត្តិនៃ ក្រុមហ៊ុន PESTECH Cambodia បានលើកឡើងដែរថា ការចុះបញ្ជីនៅលើផ្សារមូលបត្រកម្ពុជា គឺពិតជាទទួលបានជោគជ័យ លើសពីការរំពឹងទុកដោយក្នុងនោះ ការធ្វើបរិវិសកម្ម របស់ក្រុមហ៊ុន ទទួលបានលទ្ធផលល្អ ដោយក្រុមហ៊ុនបានដាក់លក់ ១,២លានហ៊ុន អំឡុងពេលធ្វើបរិវិសកម្ម តែមានការបញ្ជាទិញដល់ទៅជាង ២លានហ៊ុន។
លោកបន្តថា ទាំងអស់នេះ បង្ហាញពីទំនុកចិត្តរបស់ វិនិយោគិនមកលើ ក្រុមហ៊ុនដែលអភិវឌ្ឍន៍លើវិស័យថាមពលអគ្គិសនីមួយនេះ ហើយនៅក្នុងចំណោមវិនិយោគិនជាង ៥០០នាក់ ដែលទទួលបានជោគជ័យ ក្នុងការទិញភាគហ៊ុនរបស់ PESTECH Cambodia គឺមានជាង ៨០% ជាជនជាតិខ្មែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
