លោក ហ៊ឹម ប៊ុនថន កសិករនៅស្រុកមុខកំពូល ខេត្តកណ្តាល បានប្រាប់ Newsroom Cambodia កាលពីថ្ងៃអាទិត្យថា លោកបានដាំត្រសក់អស់រយៈពេល៣ ទៅ ៤ឆ្នាំ ហើយ ។ លោកថា កាលពីប៉ុន្មានខែមុន ត្រសក់មានតម្លៃប្រហែល ១៣០០រៀលក្នុងមួយគីឡូ ប៉ុន្តែលោកថា ចាប់ពីដើមខែធ្នូនេះ តម្លៃត្រសក់បានត្រឹមតែ ៥០០រៀល ក្នុងមួយគីឡូ ។
លោកបានបន្តថា «ប្រសិនបើនៅថ្ងៃខាងមុខ បានតម្លៃប៉ុណ្ណឹងទៀត ខ្ញុំនឹងឈប់ដាំត្រសក់ ពីព្រោះតម្លៃហ្នឹងមិនអាចរួចថ្លៃដើមផង» ។
ចំណែកអ្នកស្រី ម៉ៅ រ៉ា អាយុ ២៩ឆ្នាំ ដែលជាកសិករនៅក្នុងស្រុកមុខកំពូលដែរ បាននិយាយថា អ្នកស្រីបានប្រកបរបរដាំត្រសក់ជិតមួយឆ្នាំហើយ ។ កាលពីមុន តម្លៃត្រសក់មានតម្លៃ ១៥០០ ដល់ ២០០០រៀល ក្នុងមួយគីឡូ បន្ទាប់មកធ្លាក់ចុះសល់ត្រឹម ៥០០រៀល ក្នុងមួយគីឡូ ។
អត្ថបទទាក់ទង
អ្នកស្រីបន្ថែមថា៖ «ខ្ញុំនិយាយតាមត្រង់ ខ្ញុំលក់ម៉ូតូខ្លួនឯងដើម្បីធ្វើសោហ៊ុយហ្នឹង ខ្ញុំកំពុងតែពិបាកចិត្តជាមួយប្ដី ថា ខំលក់ម៉ូតូមួយធ្វើសោហ៊ុយ ក្រែងលោបានម៉ូតូមកវិញ ហើយសល់លុយតិចតួចបន្ថែមដើមទុនរកស៊ី តែឥលូវមិនដឹងថាបានម៉ូតូវិញអត់ទេ បើតម្លៃចុះយ៉ាងហ្នឹង»។
លោក ឆន ឈៀន អាយុ ៤៦ឆ្នាំ ជាកសិករ និងឈ្មួញត្រសក់នៅស្រុកមុខកំពូល ខេត្តកណ្ដាលដែរនោះ បាននិយាយថា ត្រសក់ដែលលោកទិញពីអ្នកភូមិយកទៅលក់នៅផ្សារក្នុងខេត្តនោះ បានត្រឹមតែ ៥០០ ទៅ ៦០០រៀលប៉ុណ្ណោះក្នុងមួយគីឡូក្រាម ។ លោកបានបន្តថា អំឡុងខែវិច្ឆិកាមុននេះ ត្រសក់មានតម្លៃសមរម្យអាចឲ្យពួកគាត់ចំណេញបានខ្លះ ។
លោក ប៊ុន ពិសិដ្ឋ អាយុ ២៨ឆ្នាំ កសិករនៅស្រុកចម្ការលើ ខេត្តកំពង់ចាម លើកឡើងថា ឈ្មួញកណ្តាលដែលទិញយកទៅលក់បន្ត ឲ្យតម្លៃត្រសក់របស់លោកត្រឹមមួយគីឡូ ២០០រៀលប៉ុណ្ណោះ ចំណែកអ្នកដាំផ្សេងទៀត ខ្លះភ្ជួរចោល លែងថែទាំ ព្រោះតម្លៃថោកពេក មិនសមជាមួយនឹងតម្លៃពលកម្ម ។
លោកថា៖ «ឈ្មួញកណ្តាលឲ្យតម្លៃថោក ឈ្មួញគេចុះមកទិញនៅកន្លែង ហើយគេយកទៅលក់ត ហើយគេឲ្យថោក មួយគីឡូ ២០០[រៀល] ។ មានអ្នកដាំច្រើន អ្នកខ្លះភ្ជួរចោល អ្នកខ្លះលែងថែទាំលែងអី គេបេះតែបង្ហើយៗ ឈប់ថែទាំវា ថោកពេក អត់សមតម្លៃពលកម្ម» ។
លោក ប៊ុន ពិសិដ្ឋ បន្ថែមថា តម្លៃត្រសក់ចុះថ្លៃបែបនេះ ព្រោះអំឡុងពេលមានជំងឺកូវីដ១៩ មិនសូវមានកម្មវិធីជួបជុំ និងការនាំចូលបន្លែច្រើនពីបរទេស ។ លោក ពិសិដ្ឋ និយាយដូច្នេះថា ៖ «ខ្ញុំយល់ថា ដោយសារឥឡូវគេជួបបញ្ហា ហើយណាមួយ វាអត់សូវមានពិធីការ ពិធីអីចឹង អាហ្នឹងគឺយើងអត់ដឹង ហើយក្រែងលោបន្លែនាំចូលមកច្រើនចឹង អាហ្នឹងវាជាបញ្ហាប្រឈមមួយដែរ »។
លោក ហុង រដ្ឋា ជាមន្ត្រីអនុវត្តគម្រោងរបស់អង្គការក្រុមអភិវឌ្ឍន៍ជនបទកម្ពុជា នៅខេត្តតាកែវ ប្រាប់ Newsroom Cambodia តាមរយៈទូរស័ព្ទថា លោកក៏ធ្លាប់បានសិក្សាពីបញ្ហានេះដែរ។ លោកបានបញ្ជាក់ថា ជារៀងរាល់ឆ្នាំ ក្នុងខែ ១១-១២ កសិករតែងតែត្អូញត្អែរអំពីតម្លៃធ្លាក់នៃបន្លែសឹ្លក និងត្រសក់ ដោយសារតែអាកាសធាតុខែនេះសមស្របដែលអាចប្រមូលផលបានច្រើន។ លោកថា នៅពេលដែលលើសតម្រូវការ នោះតម្លៃប្រាកដជាធ្លាក់ចុះ ។
លោក ហុង រដ្ឋា បន្តថា ៖ «កសិករមិនទាន់ស្វែងយល់ពីទីផ្សារទេ ពួកគាត់តែងតែដាំអ្វីតាមចិត្តចង់ ។ មួយវិញទៀត កសិករដែលដាំបន្លែតែមួយមុខ ពួកគាត់តែងតែជួបបញ្ហាខ្វះទីផ្សារ និងតម្លៃចុះថោក។ នៅពេលដែលពួកឈ្មួញកណ្ដាលចុះទិញ ពួកគេចង់បានបន្លែច្រើនមុខ ដូច្នេះពួកគេទៅរកអ្នកដែលដាំបន្លែដែលមានគ្រប់ មុខហើយ អីចឹងហើយអ្នកដាំបន្លែច្រើនមុខមិនសូវជួបបញ្ហាទេ» ។
រដ្ឋមន្ត្រីក្រសួងកសិកម្ម លោក វេង សាខុន បានប្រាប់តាមរយៈទូរសព្ទថា នៅក្នុងខែនេះ ជារដូវដែលប្រមូលផលបានច្រើន ទាំងបន្លែ ទាំងការនេសាទជាដើម ដូច្នេះហើយទើបក្រសួងបានណែនាំឲ្យចងជាបណ្តុំកសិករដើម្បីកំណត់ចំនួនជាក់លាក់នៃការដាំ និងការដាំបណ្តាក់គ្នាកុំឲ្យប្រមូលផលស្របគ្នា ព្រមទាំងមានកិច្ចសន្យាច្បាស់លាស់ ។
លោករដ្ឋមន្ត្រីបានលើកឡើងថា ៖ « ឮក្រសួងបានណែនាំទៅដល់កសិករទាំងអស់ ឲ្យចងជាបណ្តុំកសិករ ថា គួរយើងធ្វើអីមួយ កសិករណាដាំត្រសក់មុនប៉ុន្មានថ្ងៃ ហើយកសិករបន្ទាប់ទៀត ចង់ដាំប៉ុន្មានថ្ងៃ ដើម្បីឲ្យការផ្គត់ផ្គង់ហ្នឹងគឺថេរ ហើយមានកិច្ចសន្យាច្បាស់លាស់» ។
លោករដ្ឋមន្ត្រីកសិកម្មបន្តថា ក្រសួងបានណែនាំទៅដល់កសិករពីរបីឆ្នាំហើយ ប៉ុន្តែ កសិករហាក់មិនស្តាប់ ៖ «យើងបានណែនាំពីរបីឆ្នាំហើយ ប៉ុន្តែ កសិករមិនស្តាប់ »។
លោកថា បើសិនជាកសិករណាបានចងគ្នាជាបណ្ដុំហើយ ការដោះស្រាយមិនបានទូលំទូលាយ លោកនឹងចាត់ការទៅលើរឿងនោះ ៖ «បើសិនជាកសិករណា វាមានបណ្តុំ ចូលក្នុងបណ្តុំ ហើយបើការដោះស្រាយរបស់បណ្តុំហ្នឹងមិនបានទូលំទូលាយ គឺខ្ញុំនឹងចាត់ការរឿងហ្នឹង» ៕
