លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងនៃរាជ្យបណ្ឌិតសភាកម្ពុជា បានគូសបញ្ជាក់ថា បើទោះបីជាបច្ចុប្បន្នស្ថានភាពពិភពលោក ប្រឈមនឹងបញ្ហាអតិផរណា តម្លៃទំនិញនៅលើទីផ្សារមានការឡើងថ្លៃក៏ពិតមែន ក៏ប៉ុន្តែវាមិនមែនជាបញ្ហាចោទ ដែលប៉ះពាល់ខ្លាំងដល់ការចំណាយរបស់ប្រជាពលរដ្ឋនៅរដូវបុណ្យភ្ជុំបិណ្ឌដែលជាប្រពៃណីរបស់ខ្មែរនោះទេ ព្រោះថានេះជាប្រពៃណីទំនៀមទម្លាប់របស់ខ្មែរតាំងពីដូនតាមក ហើយការចំណាយរបស់ប្រជាពលរដ្ឋក្នុងអំឡុងពេលភ្ជុំបិណ្ឌនេះ គឺប្រជាពលរដ្ឋម្នាក់ៗមានការចំណាយខុសៗគ្នា ទៅតាមសម្ថតភាព លទ្ធភាពជាក់ស្តែងរបស់ពួកគាត់ផ្ទាល់។ លោកបណ្ឌិត ហុង វណ្ណៈ បានបញ្ជាក់បន្ថែមថា ការចំណាយរបស់ប្រជាពលរដ្ឋទៅលើម្ហូបអាហារ ផ្លែឈើ និងទំនិញផ្សេងៗជាច្រើនទៀតនៅក្នុងពិធីបុណ្យភ្ជុំបិណ្ឌរយៈពេល ១៥ ថ្ងៃ ជាពិសេសក្នុងថ្ងៃភ្ជុំធំនោះ គឺមិនមែនជាការចំណាយច្រើនដែលប៉ះពាល់ខ្លាំងដល់ជីវភាពពួកគាត់នោះទេ តែផ្ទុយទៅវិញការចំណាយទាំងនេះបានរួមចំណែកក្នុងចរន្តសេដ្ឋកិច្ចជាតិទៅវិញ តាមរយៈការទិញលក់ដោះដូរទំនិញនានា។
អត្ថបទគួរអាន
ពាន់ព័ន្ធនឹងទីផ្សារ និងតម្រូវការផ្គត់ផ្គង់សាច់ក្នុងរដូវបុណ្យភ្ជុំបិណ្ឌនេះដែរ លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា មើលឃើញថា តម្រូវការសាច់ដូចជា សាច់ជ្រូក សាច់មាន់ នៅក្នុងអំឡុងពេលរដូវបុណ្យភ្ជុំបិណ្ឌនេះ ហាក់មិនមានការប្រែប្រួលច្រើននោះទេ មិនតែប៉ុណ្ណោះ ការផ្គត់ផ្គង់សាច់ជ្រូក សាច់មាន់ សម្រាប់តម្រូវការទីផ្សារក៏មិនមានការខ្វះខាតនោះដែរ ពោលគឺពេលបច្ចុប្បន្ននេះ វិស័យចិញ្ចឹមសត្វនៅក្នុងស្រុកគឺមានការកើនឡើងខ្ពស់គួរឲ្យកត់សម្គាល់ ឬអាចមានដល់ហួសលើសតម្រូវការផងដែរ។ កត្តានេះហើយធ្វើឲ្យតម្លៃសាច់ ជ្រូក សាច់មាន់ លក់នៅលើទីផ្សារមិនមានការឡើងថ្លៃនោះឡើយ។
លោក ស៊្រុន ពៅ បានបញ្ជាក់ឲ្យដឹងដែរថា តម្លៃសាច់ជ្រូករស់ នៅពេលបច្ចុប្បន្នអាចលក់បានក្នុងតម្លៃចន្លោះពី ៨ពាន់ ទៅ ៩ពាន់រៀលក្នុងមួយគីឡូក្រាម ទៅតាមតំបន់នីមួយៗ ហើយចំពោះនៅរាជធានីភ្នំពេញ តម្លៃសាច់ជ្រូករស់ មានតម្លៃជាង ៩ពាន់ ទៅ ១ម៉ឺនរៀលក្នុងមួយគីឡូក្រាម ដោយឡែកចំពោះសាច់មាន់វិញ អាចលក់បានក្នុងតម្លៃប្រមាណ ៧ពាន់រៀលក្នុងមួយគីឡូក្រាមផងដែរ៕
