រយៈពេលកំណត់នៃការតម្រូវឲ្យចុះបញ្ជីដ្រូន ដែលជាបទបញ្ជាពីគណៈកម្មការជាតិប្រព័ន្ធផ្សព្វផ្សាយនិងទូរគមនាគមន៍របស់ថៃ គឺត្រឹម ៩០ថ្ងៃប៉ុណ្ណោះ។
នេះបើតាមការចុះផ្សាយរបស់កាសែត បាងកកប៉ុស្តិ៍។
យោងតាមអាជ្ញាធរថៃ នៅក្នុងទូទាំងប្រទេសថៃ មានយន្តហោះដ្រូនប្រហែល ៥ម៉ឺនគ្រឿង ខណៈដែលឧបករណ៍បច្ចេកវិទ្យាទំនើបនេះ បាននិងកំពុងក្លាយជាមធ្យោបាយដ៏ពេញនិយមសម្រាប់ការបម្រើសេវា និងសកម្មភាពនានា។
ប៉ុន្តែ កន្លងមក ដ្រូនដែលបានចុះបញ្ជីរួចមានចំនួនតែ ៣៥០គ្រឿងប៉ុណ្ណោះ ដែលនេះជាហេតុនាំឲ្យអាជ្ញាធរព្រួយបារម្ភ។ ម្ចាស់ដ្រូនទាំងអស់ត្រូវផ្ដល់ព័ត៌មានលម្អិត ដូចជា អត្តសញ្ញាណប័ណ្ណម្ចាស់ លេខស៊េរី និងរូបភាពរបស់ឧបករណ៍។
អាជ្ញាធរថៃក៏បាននិយាយផងដែរថា នៅពេលផុតរយៈពេលចុះបញ្ជី ជនណាដែលមានបំណងនាំចូលឧបករណ៍ដ្រូន គឺត្រូវតែសុំការអនុញ្ញាតពីគណៈកម្មការជាតិប្រព័ន្ធផ្សព្វផ្សាយនិងទូរគមនាគមន៍ជាមុនសិន៕
