គណៈប្រតិភូអឺរ៉ុបដែលមានសមាជិក ៤រូប និងមួយរូបទៀត គឺឯកអគ្គរដ្ឋទូតអឺរ៉ុបនៅកម្ពុជា បានជួបជាមួយរដ្ឋមន្ដ្រីក្រសួងមហាផ្ទៃ លោក ស ខេង រដ្ឋមន្ដ្រីការបរទេស លោក ប្រាក់ សុខុន និងរដ្ឋមន្ដ្រីក្រសួងពាណិជ្ជកម្ម លោក ប៉ាន សូរស័ក្ដិ នៅថ្ងៃពុធនេះ។
លោក ប្រាក់ សុខុន បានមានប្រសាសន៍ទៅកាន់ក្រុមប្រតិភូ ថា «យើងឲ្យតម្លៃនិងសូមថ្លែងអំណរគុណយ៉ាងជ្រាលជ្រៅចំពោះជំនួយរបស់សហភាពអឺរ៉ុបសម្រាប់រយៈពេល២៥ឆ្នាំចុងក្រោយនេះ រួមមាន ជំនួយនិងកិច្ចសហប្រតិបត្តិការ។»
លោក George Edgar ឯកអគ្គរដ្ឋទូតអឺរ៉ុបប្រចាំកម្ពុជា បានអរគុណលោក ប្រាក់ សុខុន និងបាននិយាយបន្តថា វាជាការល្អដែលកម្ពុជានិងអឺរ៉ុបបន្តពិភាក្សាគ្នាលើបញ្ហាផ្សេងៗ។ បន្ទាប់មក អ្នកសារព័ត៌មានត្រូវបានគេឲ្យចេញពីអង្គប្រជុំ។
តើបានអានអត្ថបទនេះ ឬនៅ?
បន្ទាប់ពីលើកឡើងពីការព្រួយបារម្ភអំពីលទ្ធិប្រជាធិបតេយ្យនិងសិទ្ធិមនុស្សនៅកម្ពុជា សហភាពអឺរ៉ុបបានប្រកាសកាលពីខែកុម្ភៈ ថា ខ្លួនចាប់ផ្តើមដំណើរការនីតិវិធីផ្អាកជាបណ្តោះអាសន្ននូវកម្មវិធីអនុគ្រោះពន្ធ EBA។
លោក កេត សោផាន់ អ្នកនាំពាក្យក្រសួងការបរទេស បានប្រាប់អ្នកសារព័ត៌មាន នៅក្រោយជំនួបរវាងលោក ប្រាក់ សុខុន និងប្រតិភូសហភាពអឺរ៉ុប ថា កិច្ចពិភាក្សាមានលក្ខណៈស្ថាបនា «មិនមានការប្រទូស្តរ៉ាយគ្នា»នោះទេ ហើយថា ភាគីទាំងពីរបានប្ដេជ្ញាថា នឹងរក្សា EBA មិនឲ្យបាត់បង់ទេ។
ជុំវិញករណីលោក កឹម សុខា អតីតមេដឹកនាំគណបក្សសង្រ្គោះជាតិ លោក កេត សោផាន់ បាននិយាយថា លោក ប្រាក់ សុខុន បានជម្រាបប្រតិភូអឺរ៉ុបថា វាជារឿងពាក់ព័ន្ធនឹង«ផ្នែកច្បាប់។»
លោក កេត សោផាន់ បាននិយាយដូច្នេះថា ៖ «មិនមានការពិភាក្សាគ្នាឈានទៅរកការឯកភាពគ្នា ឬមួយការស្នើសុំឲ្យដោះលែង ថា ត្រូវដោះ ឬយ៉ាងណានោះទេ។»
លោកអ្នកនាំពាក្យបានបន្តថា អាចនឹងមានទស្សនកិច្ចមួយផ្សេងទៀតពីអឺរ៉ុប ដើម្បីមកសន្ទនាពីបញ្ហា EBA ជាមួយកម្ពុជា នៅខែឧសភា ឬខែមិថុនា ខាងមុខ៕
