សេចក្ដីប្រកាសព័ត៌មានពីគណៈកម្មការអឺរ៉ុបដែលបានចេញផ្សាយនៅថ្ងៃទី ០២ កក្កដានេះបានឲ្យដឹងថា ក្រោយពីបានធ្វើការងារជាមួយគ្នា និងចរចាអស់រយៈពេល៨ឆ្នាំ កិច្ចព្រមព្រៀងពាណិជ្ជកម្មសេរីអឺរ៉ុប និងវៀតណាម នឹងត្រូវចូលធរមានចាប់ពីថ្ងៃទី ០១ ខែសីហា តទៅ ដោយវានឹងលុបបំបាត់ពន្ធគយរហូតដល់ ៩៩% នៃទំនិញនាំចូលពី អឺរ៉ុប នៅរយៈពេល ១០ឆ្នាំ ហើយអឺរ៉ុប នឹងលុបបំបាត់ពន្ធគយនាំចូលទំនិញពី វៀតណាមជាង ៩៩% នៅរយៈពេល ៧ឆ្នាំ។
រាជរដ្ឋាភិបាលវៀតណាម បានបញ្ជាក់ថា ក្រុមហ៊ុនវៀតណាមជាច្រើនអាចនឹងមានឱកាស ចាប់យកចំណែកទីផ្សារអឺរ៉ុប តាមរយៈកិច្ចព្រមព្រៀងនេះ ហើយវានឹងជួយធានាបាននូវសន្តិសុខសេដ្ឋកិច្ចសម្រាប់ប្រទេសវៀតណាមផងដែរ។ លើសពីនេះ រដ្ឋាភិបាលរំពឹងថា កិច្ចព្រមព្រៀងនេះ នឹងជួយជំរុញឲ្យ GDP របស់វៀតណាម កើនឡើង ២.៤% ហើយការនាំចេញរបស់វៀតណាម កើនឡើង ១២%បន្ថែមទៀត នៅត្រឹមឆ្នាំ ២០៣០ខាងមុខ។
អត្ថបទទាក់ទង!
យ៉ាងណាក៏ដោយចុះ អនុរដ្ឋមន្រ្តីក្រសួងឧស្សាហកម្ម និងពាណិជ្ជកម្មវៀតណាម ធ្លាប់បានព្រមានរួចហើយថា បើទោះបីជា កិច្ចព្រមព្រៀងពាណិជ្ជកម្មសេរីជាមួយអឺរ៉ុប ដែលជាដំណឹងដ៏ល្អមួយសម្រាប់ក្រុមហ៊ុន សហគ្រាសវៀតណាមក៏ពិតមែន ប៉ុន្ដែពួកគេពុំគួរ រំពឹងខ្លាំងពេកនោះទេ ព្រោះថា វិបត្តិកូវីដ១៩ នៅតែបន្តកើនឡើងនៅក្នុងប៉ែកអឺរ៉ុប ដែលនឹងអាចប៉ះពាល់ដល់ ចរន្តសេដ្ឋកិច្ចយ៉ាងពិតប្រាកដ។
សូមជម្រាបដែរថា ទីផ្សារសហភាពអឺរ៉ុប ដែលមានប្រជាជនជាង ៥០០លាននាក់ គឺជាបណ្តុំអ្នកនាំចូលធំជាង លំដាប់ទី ២ លើសកលលោក ហើយមុខទំនិញសំខាន់ៗដែល វៀតណាម គ្រោងនឹងនាំចេញទៅកាន់ទីនោះ រួមមាន ផលិតផលវាយនភណ្ឌ បន្លែផ្លែឈើ អាហារសមុទ្រ គ្រឿងឈើ និងប្លាស្ទិចជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
