អ្នកជំនាញ អចលនទ្រព្យ មួយចំនួន បានះអាងថា ក្រោយពីមានការឈប់ផ្ដល់អាជ្ញាបណ្ណដល់អាជីវកម្ម ល្បែងភ្នាល់តាមអនឡាញ រួចមក វាបាននិងកំពុងធ្វើឲ្យស្ថានភាពវិស័យដីធ្លី នៅខេត្តព្រះសីហនុ ដែលជាខេត្តមាត់សមុទ្រពោរពេញទៅដោយការវិនិយោគយ៉ាងសន្ធឹកសន្ធាប់ ពីសំណាក់វិនិយោគិនចិននោះ កំពុងស្ថិតនៅក្នុងស្ថានភាពមិនច្បាស់លាស់ ដោយសារតែបច្ចុប្បន្នតម្លៃអចលនទ្រព្យហាក់មានការធ្លាក់ចុះគួរឲ្យកត់សម្គាល់។
លោកគីម ហ៊ាង ប្រធានក្រុមហ៊ុនខ្មែររៀលអេស្ទេតបានបញ្ជាក់ ថា ទីផ្សារអចលនទ្រព្យ នៅខេត្តព្រះសីហនុបច្ចុប្បន្ន ចាប់ផ្តើមធ្លាក់ចុះជាបណ្តើរៗហើយ ចាប់តាំងពីអំឡុងពាក់កណ្តាលឆ្នាំ២០១៩ នេះ បន្ទាប់ពីមានការចាកចេញរបស់ជនជាតិចិន។ លោកបន្តថា ការដែលរដ្ឋាភិបាលសម្រេចថាបិទអាជីវកម្មអនឡាញនៅកម្ពុជាក៏នឹងជះឥទ្ធិពលមិនត្រឹមតែទីផ្សារអចលនទ្រព្យនៅខេត្តព្រះសីហនុប៉ុណ្ណោះទេ នៅតាមបណ្តាខេត្តជាប់ព្រំដែនផ្សេងទៀតដូចជានៅព្រំដែនបាវិត ប៉ោយប៉ែត និងរួមទាំងភ្នំពេញផងនោះ តម្លៃអចលនទ្រព្យក៏នឹងធ្លាក់ថ្លៃទៅតាមគ្នាដែរ ដែលនេះគឺជារឿងពិត។
អត្ថបទទាក់ទង!
ជាមួយគ្នានេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានឲ្យដឹងថា រដ្ឋាភិបាលកម្ពុជាតែងតែបើកចំហរជើងមេឃដើម្បីស្វាគមន៍វិនិយោគិនបរទេស មិនថាជនជាតិ ចិន ឬប្រជាជនអឺរ៉ុប ឬក៏ប្រទេសណាមួយផ្សេងទៀតនោះទេ។
លោកបញ្ជាក់ថា ការប្រកាសបិទអាជីវកម្មល្បែងអនឡាញពិតណាស់វានឹងមានផលរំខានខ្លះៗចំពោះវិនិយោគចិន ប៉ុន្តែនេះជាការបង្ការការពារទុកជាមុន ដើម្បីទប់ទាល់ទៅនឹងការរងឥទ្ធិពលធំនៅថ្ងៃខាងមុខ។
យ៉ាងណាក៏ដោយចុះ លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានលើកឡើងថា ការធ្វើឲ្យប្រទេសមានស្ថិរភាព និងការវិនិយោគ វាមិនស្ថិតនៅលើវិស័យល្បែងនោះទេ។
លោកឧកញ៉ា ចេង ខេង បានគូសបញ្ជាក់ទៀតថា ទោះបីជាមានការធ្លាក់ បន្តិចបន្ដួចចំពោះ ទីផ្សារវិស័យអចលនទ្រព្យនៅខេត្តព្រះសីហនុក៏ដោយចុះ ប៉ុន្ដែ វាមិនបានចោទជាបញ្ហាដែលអាចធ្វើឲ្យវិស័យអចលនទ្រព្យកម្ពុជាមានភាពផុយស្រួយនោះទេ ដូច្នេះ អ្នកវិនិយោគ និងសាធារណជនទូទៅ សូមកុំមានការបារម្ភខ្លាំងពេក។
ជាការពិតណាស់ ក្រុងព្រះសីហនុ មានការវិនិយោគកើនឡើងយ៉ាងគំហុកនៅមួយរយៈចុងក្រោយនេះ ខណៈដែលហេដ្ឋារចនាសម្ព័ន្ធដូចជាផ្លូវថ្នល់បញ្ហាសន្ដិសុខសវុត្ថិភាព និងការអភិវឌ្ឍផ្ទះតម្លៃទាបសម្រាប់ប្រជាពលរដ្ឋស្នាក់នៅ ហាក់បីដូចជា នៅមិនទាន់អាចឆ្លើយតបគ្រប់គ្រាន់ទៅនឹងកំណើនអភិវឌ្ឍន៍នៅឡើយទេ។ ដូច្នេះ វានៅមានបញ្ហាជាច្រើនសម្រាប់រាជរដ្ឋាភិបាលត្រូវរៀបចំដោះស្រាយ។ ទីក្រុងព្រះសីហនុ គឺជាទីក្រុងដ៏មានសក្ដានុពល ដូច្នេះ រាជរដ្ឋាភិបាលមិនចង់ឲ្យទីក្រុងនេះ ទៅជាទីក្រុងខ្មោចនៅពេលអនាគតនោះទេ។ នេះបើតាមការបញ្ជាក់ របស់លោកឧកញ៉ា ចេង ខេង។
របាយការណ៍ពីក្រុមប្រឹក្សាអភិវឌ្ឍន៍កម្ពុជា ឲ្យដឹងថា បើគិតចាប់ពីឆ្នាំ២០១៦ មកទល់នឹងខែសីហា ឆ្នាំ២០១៩ ខេត្តព្រះសីហនុ ទទួលបានទុនវិនិយោគពីប្រទេសចិន ២ពាន់លានដុល្លារអាមេរិក ស្មើនឹង៨,៩% នៃទុនវិនិយោគសរុប។
បើតាមរបាយការណ៍ ស្នងការខេត្តព្រះសីហនុ លោក ជួន ណារិន្ទ ដែលបានផ្សព្វផ្សាយ កាលពីខែកក្កដា ឆ្នាំ២០១៩ ថា អាជីវកម្មស្ទើរ ៩០ភាគរយ នៅក្នុង ខេត្តព្រះសីហនុ រាប់ចាប់តាំងពីផ្ទះសំណាក់ សណ្ឋាគារ ហាងម៉ាស្សា ភោជនីយដ្ឋាន និងកាស៊ីណូជាដើម ត្រូវគ្រប់គ្រងដោយជនជាតិចិន។
របាយការណ៍ របស់អាជ្ញាធរខេត្តព្រះសីហនុនេះ បានបញ្ជាក់ទៀតថា សណ្ឋាគារ និងផ្ទះសំណាក់នៅខេត្តព្រះសីហនុ មានចំនួនជាង ១៥០ កន្លែង ក្នុងនោះ គ្រប់គ្រងដោយចិន មានជាង៩០% ខណៈដែលកាស៊ីណូវិញ មាន៦២ កន្លែង គ្រប់គ្រងដោយចិន មាន៧៧%។
អត្ថបទគួរឲ្យចាប់អារម្មណ៍
កំណើននៃវិស័យល្បែងកាស៊ីណូ នៅកម្ពុជា ត្រូវបានគេមើលឃើញថា គឺដើរស្របគ្នាទៅនឹងកំណើននៃលំហូរទេសចរជនជាតិចិនមកកម្ពុជា។ តួយ៉ាង នៅ៨ខែឆ្នាំ២០១៩ កម្ពុជាទទួលបានទេសចរអន្តរជាតិ ជាង៤លាន ៣សែននាក់ កើនឡើង១០,៤% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ទេសចរជនជាតិចិន មាន១លាន៧សែននាក់ កើនឡើង៣៣% និងមានចំណែកប្រមាណ ៣៩% នៃចំនួនភ្ញៀវទេសចរអន្តរជាតិសរុប។
យោងតាមរបាយការណ៍ពីក្រសួងសេដ្ឋកិច្ច និង ហិរញ្ញវត្ថុ បានបង្ហាញថា នៅក្នុងឆ្នាំ២០១៨ កន្លងមកកម្ពុជាបានប្រមូលប្រាក់ចំណូលពីវិស័យកាស៊ីណូប្រមាណ ៤៦ លានដុល្លារអាមេរិក និង សម្រាប់ផែនការឆ្នាំ២០១៩ រំពឹងថា នឹងអាចប្រមូលបានរហូតដល់ ៥៦ លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
