លោក ស សម្បូរណ៍ ជាកសិករដាំមៀនប៉ៃលិនមួយរូប ក្នុងចំណោមកសិករជាច្រើននាក់ទៀត ដែលកំពុងជួបបញ្ហាគ្មានទីផ្សារនេះ។ លោកបានបង្ហោះសារដ៏ក្រៀមក្រំមួយនៅក្នុងបណ្តាញសង្គមហ្វេសបុករបស់លោកថា «តាង៉ែនឫមៀនប៉ៃលិនឆ្នាំនេះគ្មានទីផ្សារហើយមិនមានអ្នកទិញ RIP longan.» ព្រមជាមួយនឹងការបង្ហាញនូវរូបភាពចម្ការរបស់ខ្លួន ដែលមានទីតាំងនៅក្នុងភូមិផ្សារព្រំ ឃុំស្ទឺងកាច់ ស្រុកសាលាក្រៅ ខេត្តប៉ៃលិន។
ចំពោះការលើកឡើងរបស់កសិករដាំមៀនប៉ៃលិននេះ ត្រូវបានលោក សួស ស៊ីយ៉ាត ប្រធានសហគមន៍មៀនប៉ៃលិន បញ្ជាក់ថា បញ្ហានេះមានមែន តែមិនទាំងស្រុងនោះទេ។ លោកថា «នៅមានឈ្មួញខ្មែរដើរទិញតិចតួច ដោយសារឈ្មួញថៃក៏មានតិចតួចដែរ ព្រោះឈ្មួញអះអាងថា នៅចិនមានបញ្ហាវីរុសកូរ៉ូណាខ្លាំង ទើបថៃមិនហ៊ានទទួលទិញមៀនពីកម្ពុជាច្រើននោះទេ។ មួយវិញទៀត បញ្ហាកង្វះទឹកស្រោចស្រពផង ធ្វើមៀនប៉ៃលិនលូតលាស់មិនបានល្អ ទើបធ្វើឲ្យតម្លៃកាន់ទាបទៀតតែម្តងទៅ»។
ប្រធានសហគមន៍មៀនប៉ៃលិនបានប្រាប់បន្តថា នៅព្រឹកនេះ លោកទើបតែប្រជុំជាមួយនឹងអភិបាលខេត្ត មន្ទីរកសិកម្ម និងភាគីពាក់ព័ន្ធមួយចំនួនទៀត ដើម្បីរកដំណោះស្រាយលើបញ្ហាប្រព័ន្ធធារាសាស្ត្រនេះដែរ តែមិនទាន់ទទួលបានការដោះស្រាយសមស្របនៅឡើយនោះទេ។
អត្ថបទទាក់ទង
ទោះយ៉ាងណា ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានអះអាងប្រាប់ខេមបូណូមីសតាមរយៈបណ្ដាញ Telegram ថា «រឿងបញ្ហាទីផ្សារមៀនប៉ៃលិននេះ មិនមែនជារឿងថ្មីនោះទេ ហើយក៏មិនមែនមកពីបញ្ហាវីរុសកូរ៉ណាអ្វីនោះដែរ ពោលគឺទីផ្សារបិទបើក បើកបិទ ស្រេចតែភាគីថៃ ដោយសារតែកម្ពុជាយើងមិនទាន់មានការនាំចេញត្រង់ទៅកាន់ប្រទេសចិន»។ ឯកឧត្តមបានបន្តថា «ក្រសួងកសិកម្មបានខិតខំទាក់ទងផ្ទាល់ជាមួយភាគីចិនដែរ ក្នុងការនាំចេញមៀនប៉ៃលិននេះ តែនៅមិនទាន់ទទួលបានការយល់ព្រមពីភាគីចិននៅឡើយ គឺមានការយឺតយ៉ាវ។ ការយឺតយ៉ាវនេះដោយសារ សហគមន៍មៀនប៉ៃលិន មិនទាន់បានរៀបចំខ្លួនរួចរាល់ ពោលគឺមិនទាន់អាចរៀបចំបានទៅតាមស្តង់ដា ដែលភាគីចិនចង់បាននៅឡើយ ទើបនៅតែបន្តការពឹងផ្អែកលើទីផ្សារថៃយ៉ាងដូច្នេះ»។បែបនេះក្តីទាំងលោក សួស ស៊ីយ៉ាត ប្រធានសហគមន៍មៀនប៉ៃលិន និងលោក សម្បូរណ៍ ជាកសិករផ្ទាល់ ស្នើដល់ក្រសួងកសិកម្ម និងស្ថាប័នពាក់ព័ន្ធទាំងអស់ ដោះស្រាយរកទីផ្សារសម្រាប់កសិករឲ្យបានឆាប់ផង ព្រោះថា កសិករខ្លះខ្ចីលុយពីស្ថាប័នមីក្រូហិរញ្ញវត្ថុដើម្បីធ្វើដើមទុនទេ បើបន្តការខាតបែបនេះទៀត អាចនឹងត្រូវចំណាកស្រុកមិនខាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
