កញ្ចប់ថវិកាបន្ថែមសម្រាប់ធនាគារអភិវឌ្ឍន៍ជនបទដែលរដ្ឋាភិបាលគ្រោងបញ្ចេញសម្រាប់កសាងឡសម្ងួតនិងឃ្លាំងស្តុកនេះ គឺនឹងត្រូវយកទៅអនុវត្តក្នុងខេត្តកំពង់ធំ ព្រៃវែង និងតាកែវ ដែលមានចំនួនទឹកប្រាក់សរុប១៥លានដុល្លារ។ នេះបើតាមការឲ្យដឹងពីអគ្គនាយកធនាគារអភិវឌ្ឍន៍ជនបទនៅថ្ងៃនេះ។
ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទបានមានប្រសាសន៍ថា នេះជាផែនការវិនិយោគបន្តបន្ទាប់របស់រាជរដ្ឋាភិបាល ហើយក៏នឹងអាចពង្រីកទៅតាមតំបន់យុទ្ធសាស្រ្តនៃខេត្តផ្សេងៗទៀតជាច្រើនផងដែរ។
ឯកឧត្តមបន្ថែមថា គិតមកដល់ពេលនេះ ធនាគារអភិវឌ្ឍន៍ជនបទមានកញ្ចប់ថវិកាបម្រុងសម្រាប់សង្គ្រោះវិស័យស្រូវអង្ករសរុប ៥០លានដុល្លារ ក្នុងនោះកញ្ចប់ថវិកាពីរាជរដ្ឋាភិបាលប្រមាណ៤៣លាន និងកញ្ចប់ថវិការបស់ធនាគារអភិវឌ្ឍន៍ជនបទ ៧លាន។
តើអ្នកបានអានអត្ថបទនេះ ឬនៅ?
ឯកឧត្តមបញ្ជាក់ថា ទុន១៥លានដុល្លារដែលធនាគារអភិវឌ្ឍន៍ជនបទនឹងបញ្ចេញសម្រាប់ត្រៀមសង្គ្រោះវិស័យស្រូវអង្ករក្នុងខេត្តដែលមានសក្តានុពលនេះ វាជាការជួយបំពេញបន្ថែមនូវចំណុចខ្វះចន្លោះរបស់ម្ចាស់រោងម៉ាស៊ីនមួយចំនួន។ ជាគោលដៅយើងចង់ឲ្យតំបន់មួយៗមានឡសម្ងួតដែលមានសមត្ថភាពសម្ងួតប្រមាណ ១ពាន់៥០០តោន និងឃ្លាំងស្តុក ផ្ទុកពី ៥ម៉ឺន ទៅ ១០ម៉ឺនតោន។
គួរបញ្ជាក់ថា នៅក្នុងវិស័យកសិកម្មបច្ចុប្បន្នបាននិងកំពុងផ្តល់ការងារដល់ប្រជាពលរដ្ឋជាង៥០ភាគរយធៀបនឹងវិស័យផ្សេងៗ និង ៣០ភាគរយនៃផលទុនជាតិសរុបដែលទ្រទ្រង់ដល់កំណើនសេដ្ឋកិច្ច។ បើតាមឯកឧត្តម កៅ ថាច បញ្ជាក់ថា ក្នុងរយៈពេល២ ទៅ ៣ឆ្នាំខាងមុខ កម្ពុជានឹងប្រែក្លាយប្រទេសរបស់ខ្លួនទៅជាប្រទេសកសិកម្ម៕
