ការប្រជុំគ្នារបស់រដ្ឋមន្ត្រីហិរញ្ញវត្ថុនិងទេសាភិបាលធនាគារកណ្តាលនៃប្រទេសឧស្សាហកម្មជឿនលឿនទាំង ៧ នៅប្រទេសជប៉ុន បានកើតឡើងអំឡុងពេលមិនទៀងនៃដំណើរសេដ្ឋកិច្ចពិភពលោក។ ការដួលរលំជាបន្តបន្ទាប់នៃធនាគារថ្នាក់តំបន់របស់សហរដ្ឋអាមេរិក បានបង្កើនការរង្គោះរង្គើទីផ្សារកាន់តែខ្លាំង ដោយសារការរឹតបន្តឹងវិធានការរូបិយវត្ថុដោយធនាគារកណ្តាលសំខាន់ៗ និងបានបង្កើតការព្រួយបារម្ភអំពីឱនភាពសេដ្ឋកិច្ច។
ប្រទេសជប៉ុនដែលកាន់តំណែងជាប្រធានឆ្លាស់វេននៃកិច្ចប្រជុំកំពូលក្រុមប្រទេសជី៧ (G-7) នៅឆ្នាំនេះ សង្ឃឹមថា ប្រទេសទាំងនេះនឹងបង្ហាញឱ្យឃើញនូវរណសិរ្សរួមមួយក្នុងការប្រឈមមុខនឹងហានិភ័យទាំងឡាយដែលបង្កឡើងដោយប្រទេសរុស្ស៊ីនិងប្រទេសចិន។
អ្វីដែលគួរឱ្យចម្លែកនិងកម្រទៀតនោះគឺថា ប្រទេសក្រៅក្រុមជី៧មួយចំនួន ដូចជាប្រេស៊ីល ឥណ្ឌា ឥណ្ឌូនេស៊ី កូរ៉េខាងត្បូង សិង្ហបុរី និងកូម៉ូរ៉ូ ត្រូវបានអញ្ជើញឱ្យចូលរួមក្នុងផ្នែកនៃកិច្ចប្រជុំជី៧នេះដែរ ដើម្បីពិភាក្សាអំពីបញ្ហាប្រឈមជាសកល រួមទាំងបញ្ហាបំណុលដែលប៉ះពាល់ដល់ប្រទេសចំណូលទាបនិងប្រទេសចំណូលមធ្យម។
អត្ថបទគួរអាន
លោក សឺហ្គី ម៉ាឆេនកូ (Sergii Marchenko) រដ្ឋមន្ត្រីក្រសួងហិរញ្ញវត្ថុអ៊ុយក្រែន ត្រូវបានគេអញ្ជើញឱ្យចូលរួមក្នុងសម័យប្រជុំនេះ តាមរយៈវីដេអូពីចម្ងាយ ដើម្បីបង្ហាញពីការគាំទ្រ«មិនងាករេ»របស់ក្រុមប្រទេសជី៧ ចំពោះប្រទេសអ៊ុយក្រែនផងដែរ។
ប្រធានបទសំខាន់មួយទៀតដែលក្រុមជី៧លើកមកពិភាក្សាគឺការធ្វើឱ្យប្រព័ន្ធផ្គត់ផ្គង់សកលនៃផលិតផលសំខាន់ៗដូចជាគ្រឿងចម្លងអគ្គិសនីល្អិតៗទំនើបៗជាដើម អាចធន់នឹងហានិភ័យនាពេលអនាគត ទន្ទឹមនឹងការកសាងឱកាសឆ្ពោះទៅរកការកាត់បន្ថយឧស្ម័នផ្ទះកញ្ចក់ដើម្បីដោះស្រាយបញ្ហាបម្រែបម្រួលអាកាសធាតុដោយប្រើបច្ចេកវិទ្យាបៃតង។
ប្រធានស្ថាប័នហិរញ្ញវត្ថុរបស់ក្រុមប្រទេសជី៧ក៏ត្រូវពិភាក្សាអំពីមធ្យោបាយដើម្បីធានាស្ថិរភាពហិរញ្ញវត្ថុដែរ បន្ទាប់ពីមានការដួលរលំធនាគារជាច្រើននៅសហរដ្ឋអាមេរិកដែលបានធ្វើឱ្យទីផ្សារហិរញ្ញវត្ថុរង្គោះរង្គើកាន់តែខ្លាំងឡើង៕
