ថ្លែងតាមរយៈហ្វេកប៊ុករបស់លោក កាលពីថ្ងៃទី២៥ ខែតុលា លោក ផៃ ស៊ីផាន បានសរសេរដូច្នេះថា «កម្ពុជាចាំបាច់ត្រូវត្រៀមខ្លួន និងពង្រឹងសមត្ថភាពផ្ទៃក្នុងឲ្យបានល្អ ដើម្បីទប់ទល់បញ្ហាប្រឈម និងហានិភ័យ ទាំងខាងក្នុង និងខាងក្រៅ... ព្រមទាំងត្រូវធ្វើការវះកាត់ដោះស្រាយបញ្ហា ជារចនាសម្ព័ន្ធរ៉ាំរ៉ៃមួយចំនួន ដើម្បីលើកកម្ពស់ភាពប្រកួតប្រជែង និងធ្វើពិពិធកម្មសេដ្ឋកិច្ចឲ្យកាន់តែខ្លាំងក្លា និងដើម្បីអាចឈរដោយខ្លួនឯង ដោយមិនចាំបាច់ពឹងផ្អែកទៅលើប្រព័ន្ធអនុគ្រោះពន្ធ ពីប្រទេសផ្សេងៗទាំងក្នុង ពេលបច្ចុប្បន្ន និងអនាគត។»
គួររំឭកថា សហភាពអឺរ៉ុបបានប្រកាសកាលពីខែកុម្ភៈ ថា ខ្លួនបានចាប់ផ្តើមដំណើរការនីតិវិធីផ្អាកជាបណ្តោះអាសន្ន នូវប្រព័ន្ធអនុគ្រោះពន្ធ EBA បន្ទាប់ពីបានលើកឡើងពីការព្រួយបារម្ភអំពីលទ្ធិប្រជាធិបតេយ្យ សិទ្ធិមនុស្ស និងសិទ្ធិនយោបាយ នៅកម្ពុជា។
ធនាគារពិភពលោក កាលពីខែឧសភា បានចេញរបាយការណ៍មួយ ដោយបានប៉ាន់ប្រមាណថា កម្ពុជាអាចនឹងធ្លាក់ចុះចំណូលពីការនាំចេញប្រហែលជាង ៦៥០លានដុល្លារអាមេរិក ប្រសិនបើសហភាពអឺរ៉ុប ពិតជាសម្រេចព្យួរប្រព័ន្ធអនុគ្រោះពន្ធ EBA ពីកម្ពុជាមែននោះ។
អត្ថបទទាក់ទង
នាយករដ្ឋមន្រ្តី សម្តេច ហ៊ុន សែន កាលពីថ្ងៃទី៨ ខែតុលាកន្លងទៅ ក៏បានអំពាវនាវសូមឲ្យក្រុមហ៊ុនចិន ដែលកំពុងដាក់ទុនវិនិយោគនៅកម្ពុជា បន្តវិនិយោគរបស់ខ្លួន បើទោះបីជាមានបញ្ហាអ្វីក៏ដោយ ជាពិសេស បើសិនជាមានការដក EBA ចេញពីកម្ពុជា ក៏ដោយ។ តំណាងសមាគមរោងចក្រកាត់ដេរនៅកម្ពុជាក៏បាន ជួបជាមួយសមាជិកសភាអឺរ៉ុបផងដែរ កាលពីថ្ងៃទី៥ ខែតុលា ដើម្បីពិភាក្សាអំពីបញ្ហា EBA នេះ។
លោក ផៃ ស៊ីផាន បាននិយាយផងដែរ ថា កម្ពុជាមានសេដ្ឋកិច្ចបើកចំហខ្លាំង ហើយក្បាលម៉ាស៊ីនអូសកំណើនសេដ្ឋកិច្ច ពឹងផ្អែកច្រើនលើកត្តាខាងក្រៅដែលអាចនឹងទទួលរងនូវឥទ្ធិពលអវិជ្ជមានពីហានិភ័យខាងក្រៅ ដោយមិនទាន់គិតទៅដល់ផលប៉ះពាល់បណ្ដាលមកពីភាពមិនច្បាស់លាស់ ពាក់ព័ន្ធនឹងប្រព័ន្ធអនុគ្រោះពាណិជ្ជកម្ម ជាមួយដៃគូមួយចំនួន ក៏ដូចជាហានិភ័យខាងក្នុងប្រទេសមួយចំនួនទៀត។
លោក ផៃ ស៊ីផាន បាននិយាយដូច្នេះថា «ទន្ទឹមនេះ កម្ពុជាក៏ត្រូវខិតខំទ្វេដងក្នុងការទាក់ទាញការវិនិយោគ និងធុរកិច្ច ដែលអាចនឹងហូរចូលកម្ពុជា ដោយសារសង្គ្រាមពាណិជ្ជកម្ម និងត្រូវក្ដាប់យកនូវកាលានុវត្ដភាពពីបដិវត្ដន៍ឧស្សាហកម្មទី៤ និងសេដ្ឋកិច្ចឌីជីថល ព្រមទាំងត្រូវសម្របខ្លួនទៅនឹងការប្រែប្រួលអាកាសធាតុផងដែរ។»
លោកបានបន្តថា លើសពីនេះទៅទៀត កម្ពុជាត្រូវកសាងនូវប្រព័ន្ធរដ្ឋបាលសាធារណៈមួយ ដែលកាន់តែស្អាតស្អំ ឆ្លាតវៃ និងមានសមត្ថភាពខ្លាំងពូកែ ដើម្បីអាចគ្រប់គ្រងនិងដោះស្រាយបញ្ហាសង្គមនិងសេដ្ឋកិច្ច ដែលកាន់តែធំនិងស្មុគស្មាញជាងមុន។
ក្នុងថ្ងៃទី២៥ ខែតុលានេះដែរ ធនាគារអភិវឌ្ឍន៍អាស៊ី ក៏បាននិយាយថា បើទោះបីជាកម្ពុជាជាប្រទេសមួយដែលស្ថិតក្នុងចំណោមប្រទេសដែលមានកំណើនសេដ្ឋកិច្ចខ្ពស់បំផុតនៅលើពិភពលោកក៏ដោយ ក៏នៅតែមានបញ្ហាប្រឈមដែរ។
បញ្ហាប្រឈមទាំងនោះ យោងតាមធនាគារអភិវឌ្ឍន៍អាស៊ី គឺភាពក្រីក្រក្នុងចំណោមគ្រួសារដែលមានស្ត្រីជាមេគ្រួសារ ដោយសារតែពួកគាត់មានភាពងាយរងគ្រោះចំពោះការងារដែលគ្មានសុវត្ថិភាព។ ធនាគារអភិវឌ្ឍន៍អាស៊ី បានអះអាងបន្តថា កិច្ចគាំពារសង្គមនៅមានកម្រិត ហើយការទទួលបាននូវគុណភាពសុខភាពនិងការអប់រំនៅតែមានភាពផុយស្រួយ៕
