ថ្លែងនៅក្នុងសេចក្តីថ្លែងការណ៍ ចុះថ្ងៃទី២៥ ខែតុលា ២០១៩ គបម បាននិយាយថា ខ្លួនទាមទារឱ្យផ្សព្វផ្សាយ មុននឹងយកសេចក្តីព្រាងថវិកាជាតិនេះទៅអនុម័តនៅរដ្ឋសភា ហើយការទាមទារនេះធ្វើឡើងក្នុងនាមជាប្រជាជនម្ចាស់ថវិកា។
គបម បាននិយាយដូច្នេះថា «គណបក្សប្រជាធិបតេយ្យមូលដ្ឋាន ទាមទារ ១. ឱ្យ រដ្ឋាភិបាល គប្បីផ្សព្វផ្សាយជាសាធារណៈ នូវគម្រោងថវិកាជាតិឆ្នាំ២០២០ និងធ្វើរបាយការណ៍អំពីការប្រើប្រាស់ថវិកាជាតិនាឆ្នាំកន្លងមក។ »
យោងតាម គបម ថវិកាជាតិឆ្នាំ២០២០ ដែលមានចំនួនសរុបប្រមាណ ៧៧០០លានដុល្លារនេះ គឺមានការកើនឡើងប្រហែលជា ១៣ភាគរយ បើប្រៀបធៀបនឹងឆ្នាំ២០១៩។
គបម ក៏បានភ្ជាប់នូវការទាមទារពីរផ្សេងទៀតផងដែរ រួមមាន ការរៀបចំពិគ្រោះយោបល់អំពីគម្រោងថវិកាជាតិនេះ ជាមួយក្រសួងពាក់ព័ន្ធសំខាន់ៗទាំងអស់ និងបែកចែកថវិកាជាតិ ២៥ភាគរយ ដើម្បីយកទៅអភិវឌ្ឍមូលដ្ឋានដែលមានទឹកប្រាក់ ១លានដុល្លារក្នុង១ឃុំ-សង្កាត់ ដើម្បីធានាថា មានផ្លូវល្អ មន្ទីរពេទ្យល្អ សាលារៀនល្អ និងគ្រូកសិកម្មល្អ។
អត្ថបទទាក់ទង
ក៏ប៉ុន្តែ បើយោងតាមសារព័ត៌មាន Fresh News ដែលស្និទ្ធនឹងរដ្ឋាភិបាល បានរាយការណ៍ថា រដ្ឋាភិបាលគ្រោងនឹងចំណាយថវិកាសរុបប្រមាណជា ៨.២២៣លានដុល្លារ ដែលនឹងកើនឡើង ២២,៧ភាគរយ បើធៀបនឹងឆ្នាំ២០១៩។
លោក ផៃ ស៊ីផាន អ្នកនាំពាក្យរដ្ឋាភិបាល បាននិយាយថា ថវិកាជាតិឆ្នាំ២០២០ ត្រូវបានរៀបចំដើម្បីអនុវត្ដសកម្មភាពអាទិភាព រួមមាន ការអភិវឌ្ឍធនធានមនុស្ស ការកសាងហេដ្ឋារចនាសម្ព័ន្ធ និងបង្កើតតម្លៃបន្ថែមនៃវិស័យកសិកម្ម ការលើកកម្ពស់គុណភាពនៃការផ្ដល់សេវាសាធារណៈ ប្រព័ន្ធអប់រំកាន់តែមានគុណភាពខ្ពស់, ការអនុវត្ដកម្មវិធីកែទម្រង់ស៊ីជម្រៅ និងពង្រឹងស្ថាប័នថ្នាក់ជាតិ និងថ្នាក់ក្រោមជាតិ។
លោក ផៃ ស៊ីផាន បានសរសេរតាមហ្វេសប៊ុករបស់លោកដូច្នេះថា «បង្កើតការងារឲ្យបានកាន់តែច្រើន ទាំងបរិមាណ និងគុណភាព ជូនដល់ប្រជាជនកម្ពុជា ពិសេស សម្រាប់ស្រទាប់យុវជន តាមរយៈការផ្ដល់ជំនាញ ព័ត៌មានទីផ្សារការងារ ការកែលម្អលក្ខខណ្ឌការងារ ការលើកកម្ពស់សកម្មភាពធុរកិច្ច និងការជំរុញការវិនិយោគ ទាំងក្នុងប្រទេស និងក្រៅប្រទេស»៕
