ឧកញ៉ា កែវ មុំ៖ ខ្ញុំខ្វះទុន ខ្វះចំណេះ តែខ្ញុំមិនខ្វះគំនិតទេ!

“ខ្ញុំមិនមានទុនច្រើនទេ ហើយក៏រៀនមិនបានច្រើនដែរ តែខ្ញុំមិនខ្លាចក្នុងការគិតចំពោះការរកស៊ីនោះទេ ហើយគំនិតនេះហើយ គឺជាកម្លាំងមួយដ៏ខ្លាំងក្លាជំរុញឲ្យខ្ញុំបានមកដល់ទីនេះ” នេះគឺជាប្រសាសន៍របស់ឧកញ៉ា កែវ មុំ ម្ចាស់ក្រុមហ៊ុនផលិតនំស្រួយ លីលី ដែលបានបង្ហើបប្រាប់ ខេមបូណូមីស។

ឧកញ៉ា កែវ មុំ ម្ចាស់ក្រុមហ៊ុនផលិតនំស្រួយ លីលី។ រូបភាព៖ ខេមបូណូមីស

គិតមកទល់ពេលនេះ ក្រុមហ៊ុនផលិតនំស្រួយ លីលី មានអាយុកាល១៥ឆ្នាំហើយ ដែលអាចនិយាយបានថា ជាសហគ្រាសមួយលេចធ្លោដែរ ក្នុងវិស័យឧស្សាហកម្មនៅកម្ពុជា។ ប៉ុន្ដែ ទម្រាំអាចឈរជើងមកដល់ចំណុចនេះ អាជីវកម្មមួយនេះក៏ធ្លាប់បានហែលឆ្លងកាត់នូវការលំបាកមិនតិចនោះដែរ។

ឧកញ៉ា កែវ មុំ ដែលជាស្ត្រីមួយរូបនៅពីក្រោយការរីកលូតលាស់របស់ក្រុមហ៊ុនផលិតនំស្រួយ លីលី នេះ បានលើកឡើងថា ការដើរមកដល់បច្ចុប្បន្ននេះមិនមែនជារឿងចៃដន្យនោះទេ ប៉ុន្ដែ វាបានមកពីការតស៊ូ និងខិតខំប្រឹងប្រែងយ៉ាងសស្រាក់សស្រាំពីថ្នាក់ដឹកនាំ និងបុគ្គលិកទាំងអស់។

កើតនៅលើទឹកដីខេត្តកំពង់ស្ពឺ ដោយបានឆ្លងកាត់នូវរបបជូរចត់ដូចប្រជាជនខ្មែរទូទៅដែរ ឧកញ៉ា កែវ មុំ បានលើកឡើងថា ការចាប់ផ្ដើមជីវិតក្នុងវិថីអាជីវកម្មរបស់គាត់ គឺផ្ដើមឡើងពីបាតដៃទទេដូចគេឯងក្នុងសម័យនោះដែរ។

ក្រោយពីបានរំដោះពីរបបខ្មែរក្រហម ឪពុកម្ដាយឧកញ៉ា កែវ មុំ បានប្រកបរបររកស៊ីជាអ្នកលក់ដូរភេសជ្ជៈធម្មតាប៉ុណ្ណោះ ហើយនៅអំឡុងពេលនោះ គាត់មិនសូវជាមានពេលវេលារៀនសូត្រដិតដល់នោះទេ ដោយសារតែត្រូវជួយលក់ដូរឪពុកម្ដាយ ព្រោះពួកគាត់មានបញ្ហាសុខភាព។ លុះក្រោយមក ឧកញ៉ា កែវ មុំ បានជួបនឹងថៅកែជនជាតិសាំងហ្គាពួរម្នាក់ ដោយថៅកែនោះបានប្រាប់ថា បើចង់ក្លាយជាអ្នកមាន ឬអ្នកជំនួញជោគជ័យ គាត់មិនអាចនៅតែបន្តលក់ដូរតាមផ្ទះបែបនេះបានទេ គាត់ត្រូវមានរបរមួយក្នុងដៃជាក់លាក់ជាងនេះ នោះគឺការនាំចូលផលិតផលមកលក់ផ្ដាច់មុខ ខណៈដែលកាលពីសម័យនោះ ទីផ្សារកម្ពុជាមានតម្រូវការនាំចូលទំនិញប្រើប្រាស់ស្ទើរតែគ្រប់មុខ។

ការដាស់តឿននេះ បានធ្វើឲ្យឧកញ៉ា កែវ មុំ កាន់តែចង់ចេះចង់ដឹងពីការរកស៊ីកាន់តែខ្លាំងឡើងៗ រហូតបានសម្រេចចិត្តទៅសុំការងារនៅរោងចក្ររបស់ថៅកែសាំងហ្គាពួរនោះធ្វើការ ដើម្បីស្វែងយល់ពីការធ្វើការងារ និងការគ្រប់គ្រងរបស់គេ ខណៈដែលក្រុមហ៊ុននោះមានការនាំចូលទំនិញជាច្រើនមុខមកកម្ពុជា។

ការងារជាបុគ្គលិកផ្នែកលក់ បានធ្វើឲ្យឧកញ៉ា កែវ មុំ បានយល់កាន់តែជ្រួតជ្រាបពីផលិតផល និងការការបញ្ជ្រាបផលិតផលចូលទៅកាន់ទីផ្សារ ហើយវាក៏បានធ្វើឲ្យគាត់បែកគំនិតចង់ផលិតទំនិញសម្រាប់ការលក់នៅក្នុងស្រុកវិញ ពិសេស គឺចំណីអាហារតែម្ដង ព្រោះកម្ពុជាមានវត្ថុធាតុដើមយ៉ាងល្អស្រាប់។ មិនតែប៉ុណ្ណោះ ការផលិតក្នុងស្រុក ក៏ជាផ្នែកមួយជួយអភិវឌ្ឍសេដ្ឋកិច្ចរបស់ប្រទេសជាតិ ជួយឲ្យប្រជាជនអាចទទួលទានចំណីអាហារមានសុវត្ថិភាព ផ្ដល់ការងារសម្រាប់ប្រជាជន ពិសេស ជួយដល់កសិករតាមរយៈការទិញនូវវត្ថុធាតុដើមពីពួកគាត់។

ការគិតពីចំណុចទាំងអស់នេះរាល់ថ្ងៃ បានជំរុញឲ្យទឹកចិត្ត ឧកញ៉ា កែវ មុំ កាន់តែពុះកញ្ជ្រោលខ្លាំងឡើងៗ ដើម្បីឈានទៅសម្រេចក្ដីសុបិនដ៏ធំធេងមួយនេះ ព្រមទាំងបានកំណត់ជាទស្សនៈមួយថា “គេអាចធ្វើបាន យើងក៏អាចធ្វើបានដែរ”។ ស្ត្រីឆ្នើមក្នុងវិស័យជំនួញវ័យជាង៤០ឆ្នាំរូបនេះ បានគូសបញ្ជាក់ថា មួយឃ្លានេះហើយ ដែលបានធ្វើឲ្យគាត់ធ្វើការមិនខ្លាចហត់នឿយ និងអាចអភិវឌ្ឍខ្លួនបានមកទល់ពេលនេះ។

“គេអាចធ្វើបាន យើងក៏អាចធ្វើបានដែរ”
— ឧកញ៉ា កែវ មុំ ម្ចាស់សហគ្រាសផលិតនំស្រួយ លីលី

ការចាប់ផ្ដើមសង្វាក់ផលិតកម្មលើកដំបូងត្រូវបានចាប់ផ្ដើម ជាមួយនឹងការចូលរួមជ្រោមជ្រែងពីដៃគូ ខណៈដែលពេលនោះ សហគ្រាសផលិតនំស្រួយ លីលី នេះ បានផ្ដើមឡើងជាមួយបុគ្គលិកតែជាង ២០នាក់ប៉ុណ្ណោះ បើគិតមកទល់ពេលនេះ បុគ្គលិកមានប្រមាណ ២៥០នាក់ហើយ។

នៅពេលដែលត្រូវបានចោទសួរអំពីការលំបាកក្នុងដំណើរអាជីវកម្មនេះ ឧកញ៉ា កែវ មុំ បានមានប្រសាសន៍ថា ការលំបាកមានច្រើនរាប់មិនអស់ឡើយ ដូចជា បញ្ហាហិរញ្ញវត្ថុ បច្ចេកវិទ្យាប្រើប្រាស់ និងការគ្រប់គ្រងផ្សេងៗ ជាដើម។ ប៉ុន្ដែ ការរៀនសូត្រពីការលំបាកទាំងនោះ ដើម្បីស្វែងរកដំណោះស្រាយសម្រាប់ដោះបញ្ហា នោះទើបជារឿងដ៏មានតម្លៃបំផុត។

ឧកញ៉ា កែវ មុំ បានអះអាងថា វាមានតម្លៃ គឺដោយសារតែគាត់បានចាត់ទុកបញ្ហា គឺជាឱកាសសម្រាប់ការលូតលាស់ កាលណាយើងអាចរកដំណោះស្រាយបានសម្រាប់ដោះបញ្ហាបានកាន់តែច្រើន នោះឱកាសអភិវឌ្ឍខ្លួនរបស់យើងក៏មានកាន់តែច្រើនដែរ ហើយត្រូវចងចាំដែរថា បញ្ហា គឺមានមិនចេះចប់នោះទេ។

ជុំវិញយុទ្ធសាស្ត្រក្នុងការគ្រប់គ្រងជំនួញវិញ សហគ្រិនស្ត្រីដែលកំពុងមានឈ្មោះបោះសំឡេងរូបនេះ បានគូសបញ្ជាក់ថា ការផ្ដោតលើការផលិតនូវផលិតផល ឬសេវាកម្ម ដែលមានគុណភាពខ្ពស់ តាមស្ដង់ដារ និងតម្រូវការ គឺជាកត្តាស្លាប់រស់នៅក្នុងការប្រកួតប្រជែងទីផ្សារ។

នៅក្នុងគោលការណ៍ជំនួញរបស់ឧកញ៉ា កែវ មុំ គុណភាពផលិតផលជារឿងសំខាន់បំផុតទី១ រីឯ ប្រាក់ចំណេញ គឺជារឿងបន្ទាប់។ នៅពេលដែល សហគ្រិនយកចិត្តទុកដាក់ចំពោះប្រាក់ចំណេញជាធំ នោះមិនថា ការផលិតផលិតផល ឬការគ្រប់គ្រងធនធានមនុស្សនោះទេ រមែងនឹងត្រូវប្រឈមនឹងបញ្ហាច្រើន និងលំបាកក្នុងការប្រកួតប្រជែង។ ដូច្នេះហើយ ទើបការផលិតរបស់ក្រុមហ៊ុនផលិតនំស្រួយ លីលី ផ្តោតការយកចិត្តទុកដាក់លើគុណភាព និងអនាម័យជាចម្បង តួយ៉ាង ការគ្រប់គ្រងប្រតិបត្តិការមានបែងចែកទៅតាមផ្នែកផ្សេងគ្នា ដូចជាផ្នែកត្រួតពិនិត្យគុណភាព និងផ្នែកស្រាវជ្រាវ និងអភិវឌ្ឍ ជាដើម។

គិតមកទល់ពេលនេះ ក្រុមហ៊ុនផលិតនំស្រួយ លីលី មានផលិតទំនិញជាង៣០មុខ និងបានធ្វើការនាំចេញទៅកាន់ទីផ្សារជាង ១០ប្រទេស ហើយនៅឆ្នាំ២០១៨នេះទៀតសោត ក្រុមហ៊ុននេះក៏គ្រោងនឹងពង្រីកសមត្ថភាពរោងចក្រថ្មីបន្ថែមទៀត ដើម្បីជំរុញឲ្យការផលិតមានកាន់តែធំជាងមុន ពោលគឺនឹងកើនឡើង៣ដង នៃសមត្ថភាពផលិតនាពេលបច្ចុប្បន្ន។ មិនតែប៉ុណ្ណោះ ក្រុមហ៊ុនក្នុងស្រុកមួយនេះ ក៏គ្រោងនឹងបន្ថែមការផលិតផលិតផលថ្មី គឺដំណាប់ផ្លែឈើក្រៀមសម្រាប់នាំចេញផងដែរ ដែលវានឹងក្លាយជាផ្នែកមួយជួយឲ្យទីផ្សារកសិផលក្នុងស្រុកកាន់តែមានភាពល្អប្រសើរផងដែរ។

ជាទិសដៅនៅថ្ងៃអនាគត ឧកញ៉ា កែវ មុំ បានគូសបញ្ជាក់ប្រាប់ ខេមបូណូមីស ថា នឹងជំរុញពង្រីកសមត្ថភាពផលិតរបស់រោងចក្រនំស្រួយ លីលី នេះ ឲ្យកាន់តែមានវិសាលភាពធំជាងនេះថែមទៀត និងមានចក្ខុវិស័យចង់ក្លាយខ្លួនជាក្រុមហ៊ុន ក៏ដូចជាសហគ្រាសក្នុងស្រុកគំរូមួយ សម្រាប់សហគ្រាសផ្សេងទៀត អាចរៀនសូត្រតាម តាមរយៈការផលិតនូវផលិតផលដែលមានគុណភាពខ្ពស់ ស្របទៅតាមស្ដង់ដារ និងអនាម័យ៕