មិនមែនជារឿងងាយ ព្រោះថាពេលខ្លះ អ្នករៀនចប់ពីសាលាផ្នែកគ្រប់គ្រងពាណិជ្ជកម្មទៅហើយនោះ តែពេលចាប់ផ្ដើមអាជីវកម្មខ្លួនឯងក៏ត្រូវបរាជ័យក៏មានដែរ។ តាមរយៈខេមបូណូមីស ស្ថាបនិកសាលារៀនវេសឡាញស៍ លោក ប៉ិច បូឡែន បានចែករំលែកនូវគំនិតអាជីវកម្មមួយចំនួន សម្រាប់អ្នកចង់ចាប់ផ្ដើមអាជីវកម្មសម្រាប់យកទៅពិចារណា។
នៅក្នុងបទសម្ភាសន៍ជាមួយអ្នកសារព័ត៌មានខេមបូណូមីសកាលពីពេលកន្លងទៅ លោក ប៉ិច បូឡែន ស្ថាបនិកសាលារៀនវេសឡាញស៍ ដែលជាសហគ្រិនបានចូលប្រឡូកក្នុងវិស័យជំនួញច្រើនឆ្នាំដែរ នោះ បានផ្តល់យោបល់ថា សហគ្រិនថ្មីថ្មោង (Startup) គួរតែរៀនចេះមើលបរិយាកាស ខាងក្រៅឲ្យបានច្បាស់ជៀសវាងការបរាជ័យទាំងមិនទាន់បានប្រកួតប្រជែង។
លោក ប៉ិច បូឡែន បានបញ្ជាក់ថា « ខ្ញុំមើលឃើញកន្លែងមួយដែលថា ជាកត្តាជោគជ័យឬមិនជោគជ័យ សម្រាប់ Startup ត្រង់ថា គាត់អត់មានបានគិតទៅលើបរិបទឲ្យទូលាយជាងហ្នឹងបន្តិច ទូលាយជាងហ្នឹងមានន័យថាម៉េច? គឺគាត់ត្រូវមើលថា ឥឡូវអាជីវកម្មដែលគាត់បើកហ្នឹង វាមានទិដ្ឋភាពអ្វីដែលមានហានិភ័យ មើលអត់ទាន់អស់ ហានិភ័យ គម្រោមកំហែងដល់គាត់ ឧទាហរណ៍អាជីវកម្មដែលមកពីក្រៅស្រុក ដែលមានវិស័យដូចគ្នា ស្រដៀងគ្នា ម៉ូដែលដូចគ្នាគេនឹងមក ព្រោះរឿងអាជីវកម្ម គេក៏អាចមកយើង យើងក៏អាចទៅគេ ដែលនេះជាសិទ្ធិសេរីភាពដ៏ល្អឯកមួយរបស់អាស៊ាន អញ្ចឹងប្រយ័ត្នថា បើកអាជីវកម្មមិនទាន់ដឹងអីផងគេមក»។
អត្ថបទគួរអាន
បើតាមការគូសបញ្ជាក់ របស់លោក ប៉ិច បូឡែន សម្រាប់សម័យឧស្សាហកម្មទី៤នេះ ការចាប់ផ្ដើមអាជីវកម្មទាំងអស់ក៏ត្រូវចេះស្វែងយល់ពីការប្រើប្រាស់បច្ចេកវិទ្យា និងធ្វើយ៉ាងណាទាញវាមកប្រើឲ្យអស់សក្ដាលនុពលសម្រាប់អាជីវកម្ម។ មួយវិញទៀតនោះ ត្រូវចេះរកស៊ីចូលគ្នា ដើតួជាអ្នកបំពេញបន្ថែមក្នុងខ្សែច្រវាក់ផលិតកម្មជាជាងបើកអាជីវកម្មប្រជែងគ្នាស្លាប់រស់។
លោក បូឡែន បានពន្យល់ថា ការចូលខ្លួនជាអ្នកបំពេញបន្ថែមក្នុងខ្សែច្រវាក់ផលិតកម្ម គឺមានន័យថា គឺត្រូវចេះមើលពីស្ថានភាពទីផ្សារ។ឧតទាហរណ៍ បើគេបើជាក្រុមហ៊ុនធំនាំចេញសាច់មាន់ យើងអ្នកជាចាប់ផ្ដើមអាជីវកម្មថ្មោងថ្មី គួរតែបើកការចិញ្ចឹមមាន់ ឬផលិតសម្ភារវេចខ្ចប់សាច់មាន់ ដើម្បីផ្គត់ផ្គង់ទៅឲ្យក្រុមហ៊ុនធំដែលនាំចេញនោះវិញទើបជារឿងល្អប្រសើរ។
អ្វីដែលសំខាន់ជាងនេះទៀតនោះ គឺត្រូវមានគំរូអាជីវកម្ម ត្រូវដឹងច្បាស់ពីប្រភេទអាជីវកម្មរបស់ខ្លួន ភាពឆ្នើមរបស់អាជីវកម្មខ្លួន ដឹងច្បាស់ពីទីផ្សារ ផលិតផល និងចេះស្វែងរកដៃគូសម្រាប់ការសហការវិនិយោគ ដើម្បីភាពរីកចម្រើនយូរអង្វែងទៅថ្ងៃអនាគត។ លោក បូឡែនបន្ថែមទៀតថា សហគ្រិនថ្មីថ្មោង គួរតែផ្ដោតលើការចាប់យកឱកាសអាជីវកម្មបែបនេះ ព្រោះតាមបទពិសោធន៍នៃបណ្ដាប្រទេស ដែលមានភាពជោគជ័យលើវិស័យសហគ្រាសធុនតូច និងមធ្យម គេក៏ដើរតាមគំរូអាជីវកម្មបែបនេះដែរ។
ស្ថាបនិកសាលារៀនវេសឡាញស៍ គូសបញ្ជាក់យ៉ាងដូច្នេះថា« សហគ្រិនពិតប្រាកដ គេមានគំនិតច្នៃប្រឌិត និងគំនិតនវានុវត្តន៍ ហើយចំណុចមួយទៀត បើយើងជាក្រុមហ៊ុនតូច ទើបតែចាប់ផ្តើមអាជីវកម្ម គួរតែចូលខ្លួនទៅបំពេញគេ មិនគួរណាប្រកួតប្រជែងជាមួយគេធំៗនោះទេ ឧទាហរណ៍ថា បើយើងជាទូកតូចមួយ កុំថាឡើងទៅប្រណាំងជាមួយគេដែលជានាវាធំមួយ គ្រាន់តែត្រូវរលកគេច្រានបន្តិចហ្នឹង ក៏លិចបាត់ដែរ អញ្ចឹងហើយទើបខ្ញុំថា ត្រូវរៀនមើលបរិយាកាស មើលទិសរបស់ខ្យល់ឲ្យបានច្បាស់លាស់សិន»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
