ប្រទេសប៉ាគីស្ថានបានស្នើសុំកម្ចីពីអង្គការមូលនិធិរូបិយវត្ថុអន្តរជាតិ បន្ថែម៦ពាន់លានដុល្លារ ប៉ុន្ដែ ក្រោយពេលបានពិនិត្យលើកំណែទម្រង់ពីកម្មវិធីឥណទានរបស់ប្រទេសនេះរហូតដល់៦លើក នៅទីបំផុត នៅថ្ងៃទី ២ ខែកុម្ភៈ ស្ថាប័ន IMF បានសម្រេចនឹងផ្ដល់កម្ចីទៅឲ្យប្រទេសនេះត្រឹម១ពាន់លានដុល្លារ។
មែនទែនទៅ ប្រទេសប៉ាគីស្ថានកន្លងមកក៏ទទួលបានកម្ចីពីកម្មវិធីផ្ដល់មូលនិធិបន្ថែម (Extended Fund Facility program) ពី IMF រាប់ពាន់លានដុល្លាររួចហើយដែរ ពោលគឺសរុបទាំងការអនុម័តកម្ចីពីមុន បូករួមទាំងការអនុម័តកម្ចីចុងក្រោយនេះ ថវិកាកម្ចីដែលប៉ាគីស្ថានទទួលបានពី IMF មានប្រហែល ៣ ពាន់លានដុល្លារហើយ ខណៈការអនុម័តជាលើកដំបូងគឺនៅក្នុងខែកក្កដា ឆ្នាំ ២០១៩។
អង្គការមូលនិធិរូបិយវត្ថុអន្តរជាតិ បានឲ្យដឹងថា កម្មវិធីផ្ដល់មូលនិធិបន្ថែមនេះ បានចូលរួមចំណែកពង្រឹងប្រព័ន្ធសារពើពន្ធរបស់ប្រទេសប៉ាគីស្ថាន មុនពេលមានជំងឺរាតត្បាត COVID-19 ហើយការស្ទុះងើបសេដ្ឋកិច្ចដ៏រឹងមាំបានកើនឡើងចាប់តាំងពីអំឡុងរដូវក្ដៅនៃឆ្នាំ២០២០។ ក៏ប៉ុន្តែបញ្ហាឱនភាពគណនីចរន្តដែលកំពុងកើនឡើង និង ការធ្លាក់ថ្លៃរូបិយប័ណ្ណបានធ្វើឱ្យសម្ពាធតម្លៃក្នុងស្រុកមានការកើនឡើងកាន់តែធ្ងន់ធ្ងរ។អត្ថបទគួរអាន
ជាក់ស្តែងកំណើន GDP របស់ប្រទេសប៉ាគីស្ថានត្រូវបានគេរំពឹងថានឹងឈានដល់ ៤% នៅឆ្នាំនេះ ប៉ុន្តែសេដ្ឋកិច្ចរបស់ប្រទេសនេះ នៅតែងាយរងគ្រោះទៅនឹងការផ្ទុះឡើងនៃ ជំងឺកូវីដ១៩ ស្របពេលដែល លក្ខខណ្ឌហិរញ្ញវត្ថុអន្តរជាតិកាន់តែតឹងតែង និង ការកើនឡើងនៃភាពតានតឹងភូមិសាស្ត្រនយោបាយ និងការពន្យារពេលការអនុវត្តកំណែទម្រង់រចនាសម្ព័ន្ធ។
អ្នកជំនាញពីស្ថាប័ន IMF អះអាងដែរថា សេដ្ឋកិច្ចប៉ាគីស្ថាន នៅតែបន្ដងើបឡើង បើទោះបីជាមានកត្តាប្រឈមពីវិបត្តិកូវីដ១៩ក្ដី ប៉ុន្ដែ បញ្ហាអតុល្យភាពសេដ្ឋកិច្ច និងហានិភ័យនៅតែមានធំ។ ជាមួយគ្នានេះ IMF ស្វាគមន៍ចំពោះកិច្ចខិតខំប្រឹងប្រែងផ្នែកគោលនយោបាយថ្មីៗរបស់អាជ្ញាធរប៉ាគីស្ថាន ក្នុងការពង្រឹងនូវភាពធន់សម្រាប់សេដ្ឋកិច្ច។
របាយការណ៍ពីធនាគារកណ្ដាលប៉ាគីស្ថានបានឲ្យដឹងថា បំណុលរបស់ប៉ាគីស្ថានដែលជំពាក់បរទេស គិតត្រឹមខែតុលាឆ្នាំ២០២១ មានប្រមាណ ១៣០ពាន់លានដុល្លារ ឬស្មើនឹងជិត៧៥% នៃទំហំ GDPរបស់ប្រទេសនេះ។ ប៉ុន្ដែ អត្រានេះ បានធ្លាក់ចុះទាបជាងមុន បើធៀបនឹងរយៈពេលដូចគ្នាកាលពីឆ្នាំ២០២០ ដែលមានដល់ទៅជាង ៨៤%នៃ GDP៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
