លោកស្រី គ្រីស្តាលីណា ចចជីវ៉ា នាយកគ្រប់គ្រងមូលនិធិរូបិយវត្ថុអន្តរជាតិ IMF បានបង្ហាញពីក្តីរំពឹងទុកថា ផលប៉ះពាល់នៃមេរោគកូរ៉ូណា នឹងកើតមានក្នុងរូបរាងជា អក្សរ V ដែលមានន័យថា សកម្មភាពឆ្លងរីករាលដាលក្នុងប្រទេសចិន នឹងធ្លាក់ចុះ ហើយការព្យាបាលបានជាសះស្បើយ នឹងបន្តកើនឡើងវិញ ពោលគឺ វានឹងជះឥទ្ធិពលស្រាល ដល់សេដ្ឋកិច្ចសកលលោក។
លោកស្រីបន្តថា ប្រទេសចិន បាននិងកំពុងធ្វើការងារយ៉ាងសកម្ម ក្នុងការគ្រប់គ្រងស្ថានការណ៍នេះ រដ្ឋាភិបាលចិន ក៏បានចាត់វិធានការគ្រប់គ្រងប្រព័ន្ធហិរញ្ញវត្ថុ បានយ៉ាងមានប្រសិទ្ធភាព ហើយសហគ្រាសជាច្រើន ក៏បើកដំណើរការរោងចក្រឡើងវិញ ដែលអាចនឹងស្រោចស្រង់ស្ថានភាពសេដ្ឋកិច្ចបានមកវិញភ្លាមៗផងដែរ។
អត្ថបទទាក់ទង!
យ៉ាងណាក៏ដោយ លោកស្រី គ្រីស្តាលីណា ព្រមានថា ការព្យាករណ៍នៅពេលនេះ ហាក់ដូចជាឆាប់រហ័សពេក ក៏ប៉ុន្តែ សេដ្ឋកិច្ចសកល នឹងមិនរងគ្រោះខ្លាំង ដូចនៅពេលដែលប្រទេសចិន មានវិបត្តិផ្ទុះមេរោគផ្តាសាយ SARS នោះទេ ពីព្រោះ សេដ្ឋកិច្ចជុំវិញសកលលោក កាន់តែរឹងមាំ។
មូលនិធិរូបិយវត្ថុអន្តរជាតិ ក៏បានព្យាករណ៍ពី កំណើនសេដ្ឋកិច្ចរបស់ចិន ថានឹងអាចសម្រេចបាន ៦% ក្នុងឆ្នាំនេះ ខណៈដែល កំណើនសេដ្ឋកិច្ចរបស់ចិន ពេលជួបនឹងបញ្ហាមេរោគ SARS អាចសម្រេចបាន ១០% ក្នុងឆ្នាំ ២០០៣។
ដោយឡែក មន្ត្រី មកពីរដ្ឋលេខាធិការ រតនាគារអាមេរិក ហាក់មិនសូវខ្វល់ខ្វាយ ក្នុងការវាយតម្លៃពីផលប៉ះពាល់ដល់ សេដ្ឋកិច្ចអាមេរិកនោះទេ ដោយគ្រាន់តែបញ្ជាក់ថា ឥទ្ធិពលនៃមេរោគកូរ៉ូណានេះ គឺមានអាយុកាលខ្លី ហើយអាចនឹងបញ្ចប់ក្នុងឆ្នាំ ២០២០នេះ។
គួររម្លឹកបន្តិចថា
មុននឹងកើតមានការផ្ទុះឡើងនៃ មេរោគកូរ៉ូណានេះ អង្គការមូលនិធិរូបិយវត្ថុអន្តរជាតិ
បានទម្លាក់ការព្យាករណ៍ពី កំណើនសេដ្ឋកិច្ចរបស់ពិភពលោក រួចម្តងទៅហើយ ថានឹងធ្លាក់ចុះមកត្រឹម
៣,៣ភាគរយ ក្នុងឆ្នាំ ២០២០ និង ៣,៤ភាគរយ ក្នុងឆ្នាំ ២០២១ ដែលការថមថយនេះ គឺដោយសារតែ
វិស័យឧស្សាហកម្ម និងការធ្វើជំនួញពាណិជ្ជកម្មទូទាំងសកលលោក គឺធ្លាក់ចុះដល់កម្រិតមួយទាបបំផុត
ហើយគោលនយោបាយរូបិយវត្ថុរបស់ បណ្តាប្រទេសសេដ្ឋកិច្ចធំៗ កាន់តែធូររលុង គួបផ្សំជាមួយ
ភាពតានតឹងនៃភូមិសាស្ត្រនយោបាយ និងភាពវឹកវរក្នុងសង្គម និងជម្លោះពាណិជ្ជកម្ម
បានធ្វើឲ្យបរិយាកាសវិនិយោគ និងពាណិជ្ជកម្ម កាន់តែចុះអន់ខ្សោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
