ឆ្នាំ២០២០មានអ្នកបម្រើការក្នុងវិស័យទេសចរណ៍ជាង ៧០ម៉ឺនរងផលប៉ះពាល់ពីកូវីដ១៩

បើតាមលោក ហូ វណ្ណឌី ទិន្នន័យរបស់ក្រសួងទេសចរណ៍បង្ហាញថា អ្នកដែលបម្រើការងារក្នុងវិស័យទេសចរណ៍មានចំនួនពី ៥០ម៉ឺនទៅ៧០ម៉ឺននាក់ និងអ្នកបម្រើការដោយប្រយោលជាង១លាននាក់ផ្សេងទៀត ដែលអ្នកទាំងនោះសុទ្ធតែរងផលប៉ះពាល់ដោយខ្លះបានបាត់បង់ការងារ និងចំណូលរបស់ខ្លួនទាំងស្រុង។

ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍នៅក្នុងអង្គពិធីនោះដែរថា វិស័យទេសចរណ៍បានរួមចំណែកជាង ១៣%នៃ GDP សរុបរបស់កម្ពុជាជារៀងរាល់ឆ្នាំ។ ហើយវិស័យនេះ រងផលប៉ះពាល់ខ្លាំងជាងវិស័យផ្សេងៗរបស់កម្ពុជា ប៉ុន្តែលោកបានកត់សម្គាល់ថា មិនមែនមានតែកម្ពុជាទេ ដែលរងផលប៉ះពាល់ ពោលគឺវាប៉ះពាល់នៅទូទាំងពិភពលោក។

ឯកឧត្តម វង្សី វិស្សុត បានបន្ថែមថា សម្រាប់អ្នកដែលបម្រើការក្នុងវិស័យនេះអាចពិចារណាផ្លាស់ប្តូរឬអភិវឌ្ឍជំនាញរបស់ខ្លួន ដើម្បីអាចមានលទ្ធភាពប្រកបការងារក្នុងវិស័យផ្សេងបាន ទំរាំការធ្វើដំណើរក្នុងវិស័យទេសចរណ៍អាចវិលមករកសភាពដើមវិញ។ 

តាមការគូសបញ្ជាក់ របស់ ឯកឧត្តម វង្សី វិស្សុត ដើម្បីអាចជួយសង្រ្គោះវិស័យនេះឲ្យប្រសើរឡើងវិញបាន គឺត្រូវចំណាយពេលយូរដើម្បីអាចជំរុញទេសចរណ៍ក្នុងស្រុក និងទេសចរណ៍ទៅប្រទេសក្បែរខាងដែលមានសុវត្ថិភាពក្នុងការធ្វើដំណើរ។

លោកស្រី ឆាយ សៀវលីន ប្រធានសមាគមទេសចរណ៍កម្ពុជាធ្លាប់ បានគូសបញ្ចាក់ថា កន្លងថាកន្លងមក អ្នកដែលបាត់បង់ការងារក្នុងវិស័យទេសចរណ៍មួយចំនួនធំ បានប្តូរទៅធ្វើការក្នុងវិស័យផ្សេងៗខុសពីជំនាញរបស់ពួកគេ ដូចជា ដឹកជញ្ជូន និងលក់នំ ជាដើម។

សូមបញ្ចាក់ថា ស្ថិតិរបស់ក្រសួងទេសចរណ៍ នៅឆ្នាំ២០២០ ចំនួនភ្ញៀវទេសចរអន្តរជាតិតាមការប៉ាន់ស្មានបានធ្លាក់ចុះដល់ទៅ ៨០% ធៀបនឹងឆ្នាំ២០១៩៕