យោងតាមរបាយការណ៍របស់ ធនាគារពិភពលោក បានបង្ហាញថា ប្រទេសកម្ពុជា កំពុងស្ថិតនៅក្នុងចំណោមប្រទេសមានប្រាក់ចំណូលមធ្យមទាំង ១០ នៅអាស៊ីបូព៌ា។
លោកបណ្ឌិតអ៊ិន ចាន់នី បានបន្តថា ក្នុងឆ្នាំ ២០១៨កន្លងទៅ សេដ្ឋកិច្ចកម្ពុជាមានកម្លាំងលូតលាស់ខ្លាំង ហើយភាពខ្លាំងនេះ នឹងជំរុញឲ្យកម្ពុជាសម្រេចគោលដៅជាប្រទេស ដែលមានសេដ្ឋកិច្ចរឹងមាំ ហើយក្លាយជាប្រទេស ដែលមានចំណូលមធ្យមកម្រិតខ្ពស់បានជាក់ជាពុំខាន។
អត្ថបទទាក់ទង!
ម្យ៉ាងវិញទៀត នៅពេលដែលក្លាយជាប្រទេស មានចំណូលមធ្យមកម្រិតខ្ពស់ហើយនោះ អ្នកជំនាញសេដ្ឋកិច្ចហិរញ្ញវត្ថុរូបនេះ បានបញ្ជាក់ថា ជាស្វ័យប្រវត្តិគឺកម្ពុជាយើងនឹងលែងត្រូវការ ភាពអនុគ្រោះពន្ធពីបណ្តាប្រទេសទាំងនោះទៀតហើយ ព្រោះការអុគ្រោះពន្ធ ការលើកលែងពន្ធផ្សេងៗ ទាំងនោះ សម្រាប់តែប្រទេសដែល មានសេដ្ឋកិច្ចខ្សោយតែប៉ុណ្ណោះ ។ ដូចនេះ បើយើងមានសេដ្ឋកិច្ចរឹងមាំ ហើយ យើងគួរគិតពីផលិតភាព និងការបណ្តុះបណ្តាលធនធានមនុស្សនៅក្នុងក្រុមហ៊ុន ក៏ដូចជា ការរៀបចំ ឲ្យមានហេដ្ឋារចនាសម្ព័ន្ទ ដែលអាចបង្កលក្ខណៈងាយស្រួលដល់សង្វាក់ផលិតកម្ម ដើម្បីបង្កើនបរិមាណ និងគុណភាពវិញទើបប្រសើរ។
អគ្គនាយកប្រតិបត្តិធនាគារអេស៊ីលីដារូបនេះ បានបន្ថែមទៀតថា ការបណ្តុះបណ្តាលនៅទីនេះ ចង់បញ្ជាក់ថា ចំនួនមនុស្សធ្វើការតិចតួច តែមានសមត្ថភាពធ្វើការងារខ្ពស់ ដោយយើង ត្រូវមានឧបករណ៍ប្រើប្រាស់ទំនើបទាន់សម័យ ហើយមនុស្សដែលយើងបានបណ្តុះបណ្តាលនោះ មានសមត្ថភាពគ្រប់គ្រងវាបាន មានន័យថា ប្រើមនុស្សតិច តែទទួលបានទិន្នផលច្រើន ដែលអាចប្រកួតប្រជែង ក្នុងទីផ្សារពិភពលោកបាន ដោយមិនចាំបាច់គិតថា អនុគ្រោះពន្ធ ឬរួចពន្ធអ្វីទៀតនោះទេ។
ក្នុងនាមអគ្គនាយកធនាគារក្នុងស្រុកដែលឈានមុខគេមួយនៅកម្ពុជា លោកបណ្ឌិត អ៊ិន ចាន់នី បានបញ្ជាក់ថា មុននឹង បោះទីតាំងអាជីវកម្មក្នុងប្រទេសណាមួយនោះ យើងទាំងអស់គ្នាមិនចាំបាច់គិតថា ប្រទេស នោះមានអំណោយផលលើការរួចពន្ធ ឬក៏អត់នោះទេ តែគេត្រូវមើលលើហេដ្ឋរចនាសម្ព័ន្ធបែបណា ហើយត្រូវមាន ស្ថិរភាពអ្វីខ្លះ ។ យ៉ាងណាមិញ កម្ពុជាយើង កំពុងតែឈានទៅរកផ្លូវនោះហើយ ព្រោះកម្លាំងសេដ្ឋកិច្ច ក្នុងស្រុកខ្លាំង។ ដូចនេះ ដល់ពេលដែល យើងត្រូវគិតពីការណ្តុះបណ្តាលធនធានមនុស្ស ការបង្កើនគុណភាព និងបរិមាណនៃការផលិតក្នុងស្រុកឲ្យបានល្អប្រសើរហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
