ក្រសួងសុខាភិបាលឥណ្ឌាបានឲ្យដឹងថា ខ្លួនបានប្រើប្រាស់វ៉ាក់សាំងសម្រាប់ពលរដ្ឋអស់ចំនួន ១ពាន់លានដូសហើយ ប្រការនេះហើយធ្វើឲ្យឥណ្ឌាក្លាយជាប្រទេសទី២ ក្នុងលោកដែលបានចាក់វ៉ាក់សាំងកូវីដ១៩ ក្នុងចំនួនដ៏ច្រើន បន្ទាប់ពីប្រទេសចិន ដែលបានចាក់វ៉ាក់សាំងដល់ប្រជាជនខ្លួនចំនួន ២ពាន់៣រយលានដូស។
ឥណ្ឌាពេលនេះចាក់វ៉ាក់សាំងបានក្នុងយ៉ាងល្បឿន ៨លានដូសក្នុងមួយថ្ងៃ បន្ទាប់ពីមានយុទ្ធនាការចាក់ថ្នាំបង្ការយឺតយ៉ាវខ្លាំងនៅពេលចាប់ផ្តើមដំបូងកាលពីខែមករា គួបផ្សំនឹងកង្វះខាតវ៉ាក់សាំងខ្លាំងផងនោះ។
នាយករដ្ឋមន្ត្រីឥណ្ឌាបាននិយាយទទួលស្គាល់ថា ការងើបឡើងវិញចេញពីវិបត្តិបានយ៉ាងល្អ ពិសេសសេដ្ឋកិច្ចឥណ្ឌា ដែលកំពុងមានកំណើនល្អជាងកម្រិតមុនពេលមានកូវីដ១៩ទៅទៀតនោះ គឺបានរួមចំណែកពីការចាក់វ៉ាក់សាំងក្នុងចំនួនដ៏ច្រើនដូចបច្ចុប្បន្ន។
អត្ថបទទាក់ទង!
គួរកត់សម្គាល់ថា វ៉ាក់សាំងជាង៩០%ដែលឥណ្ឌាបានប្រើប្រាស់សម្រាប់ចាក់ជូនពលរដ្ឋរហូតមកទល់នឹងពេលនេះ គឺបានមកពីវិទ្យាស្ថានសេរ៉ូម ជាស្ថាប័នដែលទទួលបានសិទ្ធិផលិត វ៉ាក់សាំង AstraZeneca នៅក្នុងប្រទេសឥណ្ឌា។
សូមរំឭកថា កាលពីខែមេសានិងឧសភាកន្លងទៅ ឥណ្ឌារងការរាតត្បាតពីកូវីដ១៩យ៉ាងខ្លាំងក្លា ដោយមានករណីឆ្លងថ្មីជាង៤០ម៉ឺន និងស្លាប់ជាងបួនពាន់ក្នុងមួយថ្ងៃៗ។ មន្ទីរពេទ្យ ណែនតាន់តាប់ដោយអ្នកជំងឺ ខ្វះខាតអុកស៊ីហ្សែនសម្រាប់សង្គ្រោះព្យាបាលអ្នកជំងឺ និងសូម្បីកន្លែងបូជាសពក៏សឹងតែរៀបចំមិនទាន់ដែរ។ ប៉ុន្ដែ បច្ចុប្បន្នតួលេខអ្នកឆ្លងថ្មីប្រចាំថ្ងៃនៅឥណ្ឌាមានត្រឹមតែជាង ១ម៉ឺន៥ពាន់នាក់ប៉ុណ្ណោះ ក្នុងមួយថ្ងៃ។ គិតមកទល់ពេលនេះឥណ្ឌាមានអ្នកឆ្លងកូវីដ១៩សរុបចំនួន៣៤លាននាក់ និង ស្លាប់ជាង៤៥ម៉ឺននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
