លោក យក់ ចំរើនប្ញទ្ធិ អគ្គនាយកក្រុមហ៊ុនធានារ៉ាប់រង Forte បានឲ្យដឹងថា ក្នុងរយៈពេលបីខែដើមឆ្នាំ២០២០ ដំណើរការផ្តល់សេវាធានារ៉ាប់រងនៅរក្សាបានកំណើនមួយខ្ពស់ជុំវិញ ២០ភាគរយ។ ប៉ុន្តែ ចូលមកដល់ខែទី៤ និងទី៥កំណើននេះ បានបន្តធ្លាក់ចុះទៅវិញជាបន្តបន្ទាប់ពី ១៥ភាគរយ មកនៅត្រឹម ៧ភាគរយ និងអាចបន្តធ្លាក់ចុះតទៅទៀតសម្រាប់ខែកក្កដានេះ ក៏ដូចជាខែសីហាខាងមុខនេះ។
លោកបន្តថា ដោយសារតែមើលឃើញពីសញ្ញានៃការធ្លាក់ចុះនេះ បានជំរុញឲ្យក្រុមអ្នកជំនួញនៅក្នុងវិស័យធានារ៉ាប់រង និងវិស័យផ្សេងៗបានផ្លាស់ប្តូរយុទ្ធសាស្រ្តរបស់ខ្លួនដោយខ្លះបានបង្កើតផលិតផលថ្មីបន្ថែមដែលតម្រូវទៅតាមស្ថានភាពនៃវិបត្តិកូវីដ-១៩ និងពិសេសគឺពង្រីកយុទ្ធសាស្រ្តទីផ្សារអនឡាញ។
អត្ថបទទាក់ទង!
អ្នកជំនាញក្នុងវិស័យធានារ៉ាប់រងរូបនេះ បានបញ្ជាក់បន្ថែមថា នៅក្នុងវិបត្តិ គឺតែងតែមានឱកាសដូច្នេះ យើងចាំបាច់ត្រូវចេះចាប់យកឱកាសដោយបានកែប្រែយុទ្ធសាស្រ្តស្របតាមស្ថានភាពដូចជាបង្កើតនូវផលិតផលថ្មីៗបន្ថែមរួមមាន ផលិតផលធានារ៉ាប់រងលើកូវីដ-១៩ សម្រាប់អ្នកវិនិយោគបរទេសស្របតាមការចង្អុលបង្ហាញរបស់រាជរដ្ឋាភិបាល តាមរយៈក្រសួងសុខាភិបាល និងក្រសួងសេដ្ឋកិច្ច។
លោកចំរើនឫទ្ធិ បានបន្តឲ្យដឹងទៀតថា ស្ថិតនៅក្នុងដំណាក់កាលនៃវិបត្តិកូវីដ-១៩ នេះ ផលប៉ះពាល់សម្រាប់សេដ្ឋកិច្ចសកល គឺមានសម្ពាធខ្លាំង ខណៈមើលឃើញថា ប្រទេសមួយចំនួននៅបន្តបិទទ្វារ និងបើទោះបី បើកទ្វារក៏មិនទាន់សកម្មភាពសេដ្ឋកិច្ចល្អនៅឡើយ ហើយស្ថិតនៅក្នុងដំណាក់កាលនេះដែរ អ្នកវិនិយោគមួយចំនួនក៏កំពុងតែពិចារណាឡើងវិញអំពីគោលនយោបាយវិនិយោគរបស់ពួកគាត់ថា តើនឹងត្រូវចាប់យកវិស័យណាមកជំនួស និងក៏សង្ឃឹមផងដែរថាវិស័យថ្មីដែលអ្នកវិនិយោគទាំងនោះ នឹងច្បាមយកពេលនេះ គឺវិស័យឌីជីថលនឹងមានការរីកចម្រើនខ្លាំង។
របាយការណ៍សមាគមធានារ៉ាប់រងកម្ពុជា បានបង្ហាញថា ក្នុងរយៈពេលបីខែដំបូងដើមឆ្នាំ២០២០ នេះ ទាំងធានារ៉ាប់រងទូទៅ និងធានារ៉ាប់រងអាយុជីវិតនៅតែរក្សាបានកំណើនល្អដដែល ក្នុងនោះ បុព្វលាភសរុបរបស់ធានារ៉ាប់រងទូទៅមានចំនួនប្រមាណ ៤២,៨ លានដុល្លារអាមេរិក កើនឡើងជាង ២១ ភាគរយ ធានារ៉ាប់រងអាយុជីវិតទទួលបានបុព្វលាភសរុបមានប្រមាណ ៣៧,៦លានដុល្លារ កើនឡើងជាង ១៨ភាគរយផងដែរ។
លោក យក់ ចំរើនប្ញទ្ធិ បានឲ្យដឹងទៀតថា វិស័យធានារ៉ាប់រងនៅកម្ពុជានឹងនៅតែបន្តរងផលប៉ះពាល់ខ្លាំងដោយសារជំងឺកូវីដ-១៩ ហើយក៏នឹងធ្វើឲ្យប៉ះពាល់ខ្លាំងទៅដល់ចំណូល ដែលនឹងធ្វើឲ្យចំណូលធ្លាក់ចុះបន្តទៀត ខណៈចំណូលបានមកវិស័យដឹកជញ្ជូន ចំណូលបានមកពីវិស័យអចលនទ្រព្យ និងចំណូលនៃអាជីវកម្មផ្សេងៗកំពុងត្រូវបានធ្លាក់ចុះផងនោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
