លោកស្រី រៃមុនដូ បានប្រាប់សន្និសីទសារព័ត៌មានបន្ទាប់ពីកិច្ចប្រជុំថ្នាក់រដ្ឋមន្ត្រីនៅទីក្រុង ឌីត្រយ (Detroit) ថា កិច្ចព្រមព្រៀងដំបូងនេះនឹងតម្រូវឱ្យប្រទេសនានាបង្កើតក្រុមប្រឹក្សាមួយដើម្បីសម្របសម្រួលសកម្មភាពខ្សែចង្វាក់ផ្គត់ផ្គង់ និងបង្កើតបណ្តាញឆ្លើយតបវិបត្តិ ដើម្បីផ្តល់ការព្រមានបឋមដល់ប្រទេសសមាជិក IPEF អំពីការរំខានការផ្គត់ផ្គង់ដែលអាចកើតមានក្នុងពេលណាមួយ។
កិច្ចព្រមព្រៀងថ្មីនេះបង្កើតបណ្តាញទំនាក់ទំនងបន្ទាន់សម្រាប់បណ្តាប្រទេសសមាជិក IPEF ដើម្បីស្វែងរកការគាំទ្រក្នុងអំឡុងពេលមានការរំខានដល់ខ្សែចង្វាក់ផ្គត់ផ្គង់, ដើម្បីសម្របសម្រួលឱ្យកាន់តែជិតស្និទ្ធក្នុងអំឡុងពេលមានវិបត្តិ និងដើម្បីធ្វើឱ្យមានការងើបឡើងវិញបានលឿនជាងមុន។
រដ្ឋមន្ត្រីពាណិជ្ជកម្មអាមេរិករូបនេះបានលើកឡើងថា កង្វះខាតបន្ទះឈីបក្នុងអំឡុងពេលជំងឺរាតត្បាតកូវីដ១៩កាលពីពេលកន្លងទៅ បានធ្វើឱ្យរោងចក្រផលិតរថយន្តនៅសហរដ្ឋអាមេរិកបិទទ្វារ និងបានបណ្តាលឱ្យកម្មករអត់ការងារធ្វើជាច្រើនពាន់នាក់។ ដូច្នេះហើយលោកស្រី វៃមុនដូ បានគូសបញ្ជាក់ថា ប្រសិនបើមានបណ្តាញឆ្លើយតបវិបត្តិបែបនេះកាលនោះ វាទំនងជាបានជួយធានាការងាររបស់ប្រជាជនអាមេរិក ហើយរក្សាខ្សែសង្វាក់ផ្គត់ផ្គង់ឱ្យនៅមានដំណើរការ។
អត្ថបទគួរអាន
ក្រសួងពាណិជ្ជកម្មសហរដ្ឋអាមេរិកបាននិយាយថា កិច្ចព្រមព្រៀងស្ដីពីខ្សែសង្វាក់ផ្គត់ផ្គង់ក៏រួមបញ្ចូលផងដែរនូវក្រុមប្រឹក្សាភិបាលសិទ្ធិការងារថ្មីដែលមានគោលបំណងបង្កើនស្តង់ដារការងារនៅក្នុងខ្សែសង្វាក់ផ្គត់ផ្គង់។ ក្នុងក្រុមប្រឹក្សាភិបាលនេះមានតំណាងរដ្ឋាភិបាល តំណាងកម្មករ និងតំណាងនិយោជក។
មែនទែនទៅ កិច្ចព្រមព្រៀងរក្សាខ្សែសង្វាក់ផ្គត់ផ្គង់រវាងប្រទេសនឹងប្រទេសក្នុងក្របខ័ណ្ឌសេដ្ឋកិច្ចតំបន់ឥណ្ឌូប៉ាស៊ីហ្វិក ដែលផ្តួចផ្តើមដោយក្រសួងពាណិជ្ជកម្មអាមេរិកនេះ ចាត់ទុកថាជាលទ្ធផលជាក់ស្តែងដំបូងបង្អស់បន្ទាប់ពីមានការពិភាក្សាគ្នារយៈពេលមួយឆ្នាំកន្លងទៅ។ ប៉ុន្តែវាគ្រាន់តែជា«សសរស្តម្ភ»មួយក្នុងចំណោមសរសរស្ដម្ភចំនួន ៤ ក្នុងក្របខណ្ឌសេដ្ឋកិច្ចនេះប៉ុណ្ណោះ។ និយាយឱ្យចំ ក្រៅពីខ្សែចង្វាក់ផ្គត់ផ្គង់ នៅមានពាណិជ្ជកម្ម, បម្រែបម្រួលអាកាសធាតុ, ព្រមទាំងការងារនិងបរិយាប័ន្នទៀត។
សូមជម្រាបថា ក្របខ័ណ្ឌសេដ្ឋកិច្ចតំបន់ឥណ្ឌូប៉ាស៊ីហ្វិកមានសមាជិកស្ថាបនិកចំនួន ១៤ ប្រទេស ក្នុងចំណោមនោះរួមមានសហរដ្ឋអាមេរិក ជប៉ុន អូស្ត្រាលី នូវែលសេឡង់ កូរ៉េខាងត្បូង ឥណ្ឌា ហ្វីជី និងប្រទេសអាស៊ានចំនួនប្រាំពីរដូចជាប្រុយណេ ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម៕
