បើយោងតាមការរាយការណ៍របស់សារព័ត៌មាន Bloomberg និង ប្រព័ន្ធផ្សព្វផ្សាយក្នុងស្រុកបានចុះផ្សាយថា សហស្ថាបនិកក្រុមហ៊ុន Alibaba Group Holding លោក Jack Ma វ័យ ៥៧ ឆ្នាំរូបនេះបានបង្ហាញខ្លួននៅភោជនីយដ្ឋានក្នុងប្រទេសអូទ្រីស ហើយបានធ្វើដំណើរទៅកាន់សាកលវិទ្យាល័យមួយក្នុងប្រទេសហូឡង់ និងបានទៅកាន់កោះ Mallorca របស់ប្រទេសអេស្ប៉ាញ។ មែនទែនទៅ នេះមិនមែនជាការធ្វើដំណើរលើកដំបូងរបស់លោក Jack Ma ទៅក្រៅប្រទេសចិននោះទេ បើគិតចាប់តាំងពីលោកបានរិះគន់មន្ត្រីបក្សកុម្មុយនិស្តចិនក្នុងឆ្នាំ ២០២០ ជុំវិញបទប្បញ្ញត្តិរបស់ទីក្រុងប៉េកាំងលើក្រុមហ៊ុន Fintech និង ក្រុមហ៊ុនយក្ស Ant Group។ ជោគវាសនារបស់មហាសេដ្ឋីរូបនេះបានផ្លាស់ប្តូរបន្ទាប់ពីបានបង្កើតការរិះគន់របស់ខ្លួនលើរដ្ឋាភិបាលចិនរួចមក ដោយកន្លងមក រដ្ឋអំណាចទីក្រុងប៉េកាំងបានណែនាំមិនឱ្យលោកចាកចេញពីប្រទេសនោះឡើយ ហើយភាគហ៊ុនរបស់ Alibaba បានខាតបង់ត្រឹមក្នុងរយៈពេលខ្លីចំនួនជាង ២៦ ពាន់លានដុល្លារ បន្ទាប់ពីប្រព័ន្ធផ្សព្វផ្សាយរដ្ឋរាយការណ៍ថាអាជ្ញាធរបានដាក់ការហាមឃាត់លើរូបលោក។
ក្រុមហ៊ុន Ant Group ដែលមានលោក Jack Ma ជាស្ថាបនិក កាលពីឆ្នាំ ២០២០ ក្រុមហ៊ុននេះបានទទួលរងនូវសម្ពាធពីនិយតករទីក្រុងប៉េកាំងជាខ្លាំងក្នុងការកែលម្អប្រតិបត្តិការ ដើម្បីអនុលោមតាមការត្រួតពិនិត្យកាន់តែតឹងរ៉ឹង ហើយបានពិភាក្សាជាទៀងទាត់ជាមួយធនាគារកណ្តាលរបស់ប្រទេសអំពីរបៀបនៃកែតម្រូវប្រតិបត្តិការរបស់ខ្លួន។
អត្ថបទគួរអាន
ដើម្បីគេចចេញពីសម្ពាធនេះ ក្រុមហ៊ុន Ant Group បានផ្តល់សញ្ញាដោយផ្ទាល់ដល់និយតករថា លោក Jack Ma មានបំណងដកខ្លួនចេញពីការគ្រប់គ្រងរបស់លោកលើក្រុមហ៊ុននេះ។ ប្រភពព័ត៌មានបាននិយាយថា សំណើរមួយកំពុងស្ថិតក្រោមការពិចារណាទាក់ទងនឹងការផ្ទេរភាគហ៊ុនរបស់លោក Jack Ma ទៅឱ្យនាយកប្រតិបត្តិផ្សេងទៀត។ ទន្ទឹមនឹងនោះ នៅក្នុងឯកសារមួយក្នុងសប្តាហ៍នេះ ក្រុមហ៊ុន Alibaba បានរំលឹកឡើងវិញថា លោក Jack Ma មានបំណងកាត់បន្ថយអំណាចនៃការគ្រប់គ្រងរបស់ខ្លួន ហើយកំពុងកំណត់ការគ្រប់គ្រងភាគហ៊ុនដោយផ្ទាល់ និង ដោយប្រយោលរបស់លោកនៅក្នុងក្រុមហ៊ុន Ant Group មិនលើសពី ៨,៨% ដែលបច្ចុប្បន្នលោកមានសិទ្ធិលើការបោះឆ្នោតជាង ៥០% នៅក្រុមហ៊ុន Ant Group។
លោក Justin Tang ប្រធានផ្នែកស្រាវជ្រាវអាស៊ី បាននិយាយថា ហានិភ័យដ៏ធំនឹងត្រូវដកចេញពីក្រុមហ៊ុន Ant Group ប្រសិនបើមហាសេដ្ឋី Jack Ma បោះបង់ការគ្រប់គ្រងរបស់ខ្លួន។
កាសែត Wall Street Journal បានរាយការណ៍មុននេះថា ក្រុមហ៊ុន Ant Group បានប្រាប់និយតករចិនថា លោក Jack Ma មានបំណងបោះបង់ការគ្រប់គ្រង ហើយអាចផ្ទេរអំណាចបោះឆ្នោតក្នុងក្រុមហ៊ុនមួយចំនួនរបស់លោកទៅឱ្យនាយកប្រតិបត្តិកំពូលផ្សេងទៀតផងដែរ ក្នុងនោះ បុគ្គលដែលបានដឹងពីបញ្ហានេះបាននិយាយថា លោក Jack Ma មិនមានតំណែងគ្រប់គ្រងនៅក្រុមហ៊ុន Ant Group ទៀតនោះទេ ហើយការបោះបង់ការគ្រប់គ្រងក្រុមហ៊ុននឹងធ្វើឱ្យមានការរំខានតិចតួចប៉ុណ្ណោះសម្រាប់ប្រតិបត្តិការប្រចាំថ្ងៃ ដោយសារតែលោកមិនមានទំនាក់ទំនងស៊ីជម្រៅអស់រយៈពេលជាច្រើនឆ្នាំមកហើយ។
គួរជម្រាបថា ការសម្រេចចិត្តរបស់លោក Jack Ma នៅពេលនេះអាចជាមធ្យោបាយមួយដើម្បីស្របតាមចក្ខុវិស័យរបស់លោកប្រធានាធិបតីលោក Xi Jinping ក្នុងការសម្រេចបាននូវវិបុលភាពរួម។ ក្រុមហ៊ុនរបស់លោកកំពុងព្យាយាមបំពេញតាមតម្រូវការរបស់អ្នកឃ្លាំមើលរបស់ប្រទេសចិន ដែលបានសន្យាថានឹងទប់ស្កាត់ការពង្រីកក្រុមហ៊ុនបច្ចេកវិទ្យា ដែលមិនប្រុងប្រយ័ត្ន។ ជំហររបស់បក្សកុម្មុយនិស្តចិន ចំពោះវិស័យឯកជនបានក្លាយជាការអភិវឌ្ឍមួយ ដែលត្រូវបានឃ្លាំមើលយ៉ាងតឹងរ៉ឹងបំផុតនៅក្នុងទីផ្សារពិភពលោកក្នុងរយៈពេលប៉ុន្មានឆ្នាំចុងក្រោយនេះ ដោយអ្នកសង្កេតការណ៍មួយចំនួនបានឈានទៅដល់ការហៅវិស័យអ៊ីនធើណែតដ៏ធំទូលាយរបស់ប្រទេសចិនថា មិនអាចវិនិយោគបាន៕
