កិច្ចព្រមព្រៀងផ្តល់ជំនួយនេះត្រូវបានចុះហត្ថលេខានៅថ្ងៃទី ២២ ខែកុម្ភៈ រវាង ឯកឧត្តម MIKAMI Masahiro ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំនៅព្រះរាជាណាចក្រកម្ពុជា និងលោកស្រី Claire CONAN ជាតំណាង និង ជានាយកប្រចាំប្រទេសនៃកម្មវិធីស្បៀងអាហារពិភពលោក ក្រោមអធិបតីភាពនិងការចូលរួមជាសាក្សីដោយ ឯកឧត្តម ង៉ាន់ ចំរើន រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប)។
ឯកឧត្តម Mikami Masahiro ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំក្រកម្ពុជាមានប្រសាសន៍ថា «កាលពីឆ្នាំមុន ប្រទេសកម្ពុជាបានទទួលរងនូវភ្លៀងធ្លាក់យ៉ាងខ្លាំងជាបន្តបន្ទាប់ ដែលប៉ះពាល់ដល់ប្រជាជនមួយចំនួនធំ ក៏ដូចជាបង្កឲ្យមានការបាត់បង់ជីវិត និងការខូចខាតផ្នែករូបវ័ន្តទៅលើទ្រព្យសម្បត្តិជាច្រើន។ ខ្ញុំមានក្ដីសង្ឃឹមដោយស្មោះថា គម្រោងនេះនឹងកាត់បន្ថយផលប៉ះពាល់ទៅលើសន្តិសុខស្បៀងរបស់ក្រុមគ្រួសារនិងសហគមន៍ដែលរងគ្រោះដោយទឹកជំនន់»។
អត្ថបទទាក់ទង!
នៅក្នុងគម្រោងនេះ កម្មវិធីស្បៀងអាហារពិភពលោកនឹងសហការយ៉ាងជិតស្និទ្ធជាមួយ គ.ជ.អ.ប និងដៃគូនានា ដើម្បីធ្វើការវាយតម្លៃគ្រប់ជ្រុងជ្រោយទៅលើសន្តិសុខស្បៀងនិងអាហារូបត្ថម្ភនៅក្នុងតំបន់រងគ្រោះដោយទឹកជំនន់និងគាំទ្រដល់ការស្តារសហគមន៍ឡើងវិញតាមរយៈការស្តារហេដ្ឋារចនាសម្ព័ន្ធដែលខូចខាត និងការពង្រឹងសមត្ថភាពធ្វើផែនការ និងចំណេះដឹងមូលដ្ឋានស្តីពីសន្តិសុខស្បៀង ការត្រៀមបង្ការ និងការកាត់បន្ថយគ្រោះមហន្តរាយ។ គម្រោងនេះបានកំណត់គោលដៅនៅក្នុងឃុំចំនួន១៦ នៅក្នុងខេត្តបាត់ដំបង ពោធី៍សាត់ កំពង់ឆ្នាំង និងកំពង់ធំ។
លោកស្រី Claire CONAN តំណាងកម្មវិធីស្បៀងអាហារពិភពលោកប្រចាំនៅកម្ពុជាបានលើកឡើងថា «យើងខ្ញុំសូមថ្លែងអំណរគុណដល់រដ្ឋាភិបាលជប៉ុនដែលបានគាំទ្រដល់កិច្ចការកាត់បន្ថយផលប៉ះពាល់ដោយសារទឹកជំនន់កាលពីឆ្នាំមុន។ ជំនួយនេះមានសារៈសំខាន់ណាស់សម្រាប់ក្រុមគ្រួសារងាយរងគ្រោះដែលរស់នៅក្នុងសហគមន៍ដែលងាយជន់លិចដោយទឹកជំនន់ ដែលប៉ះពាល់ទៅលើជីវភាព និងប្រព័ន្ធស្បៀងរបស់ពួកគាត់ ហើយជំនួយនេះនឹងជួយការពារពួកគាត់ពីវិបត្តិនាពេលអនាគត» ។
ក្នុងអំឡុងពេលមួយទសវត្សកន្លងមកនេះ ប្រទេសកម្ពុជាបានរងផលប៉ះពាល់ដោយសារទឹកជំនន់ធ្ងន់ធ្ងរចំនួន៤លើក។ លើកចុងក្រោយបង្អស់នៅក្នុងខែតុលាឆ្នាំមុន ទឹកជំនន់បានបង្កឱ្យក្រុមគ្រួសារចំនួន១៤.២៩៩គ្រួសារផ្លាស់ប្ដូរទីលំនៅ និងប៉ះពាល់ដោយផ្ទាល់ទៅលើក្រុមគ្រួសារចំនួន១៧៦.០០០គ្រួសារ (ជិត ៨០០.០០០ នាក់) ក្នុងខេត្តចំនួន១៤។ លំនៅដ្ឋាន ហេដ្ឋារចនាសម្ព័ន្ធ និងដីកសិកម្មរងការជន់លិចនិងខូចខាតយ៉ាងដំណំ។ ប្រទេសកម្ពុជាជាប់ចំណាត់ថ្នាក់ទី១៦ ក្នុងចំណោមប្រទេសទាំង១៨១ នៅក្នុងសន្ទស្សន៍ហានិភ័យពិភពលោកឆ្នាំ២០២០ ដែលកំណត់ទៅលើភាពងាយរងគ្រោះខ្ពស់ដោយសារគ្រោះមហន្តរាយធម្មជាតិ។ វិបត្តិផ្នែកអាកាសធាតុដូចជាទឹកជំនន់ និងគ្រោះរាំងស្ងួតកើតមានជាញឹកញាប់នៅតាមសហគមន៍ ហើយកំណើននិងកម្រិតនៃគ្រោះមហន្តរាយនេះទំនងជានឹងកើនឡើងនាពេលអនាគត ដោយសារឥទ្ធិពលនៃការផ្លាស់ប្តូរអាកាសធាតុនិងការបាត់បង់ធនធានធម្មជាតិ ដែលប៉ះពាល់ដល់សហគមន៍ក្រីក្រមួយចំនួន។
ចាប់តាំងពីឆ្នាំ១៩៩៨មក រដ្ឋាភិបាលជប៉ុនគឺជាដៃគូដ៏សំខាន់របស់កម្មវិធីស្បៀងអាហារពិភពលោក ដែលបានចូលរួមវិភាគទានចំនួន២២លានដុល្លារអាមេរិកក្នុងអំឡុងពេល១០ឆ្នាំកន្លងមកនេះតាមរយៈជំនួយជាសម្ភារៈ (អង្ករ និងត្រីកំប៉ុង) និងជំនួយជាទឹកប្រាក់ ក្នុងការគាំទ្រលើវិស័យសន្តិសុខស្បៀងនិងអាហារូបត្ថម្ភ។ នៅឆ្នាំ២០១៩ ប្រទេសជប៉ុនបានចូលរួមវិភាគទានចំនួន២,៧លានដុល្លារអាមេរិកដល់កម្មវិធីស្បៀងអាហារពិភពលោក ដើម្បីលើកកម្ពស់កសាងភាពធន់របស់សហគមន៍នៅកម្ពុជាដើម្បីទប់ទល់នឹងវិបត្តិ និងកសាងសមត្ថភាពស្ថាប័នក្នុងការត្រៀមលក្ខណៈទប់ទល់នឹងគ្រោះអាសន្ន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
