ថ្មីៗនេះ ខណៈដែលមកទស្សនកិច្ចការិយាល័យក្រុមហ៊ុន អេហ្គ្រីបាឌី ប្រចាំកម្ពុជា ជាក្រុមហ៊ុនកសិកម្មមួយដែលលោកបានចូលរួមបោះទុនវិនិយោគ លោក កេស៊ូកិ ហុងដា បានប្រាប់អ្នកសារព័ត៌មាន ខេមបូណូមីស ថា លោកស្រលាញ់ប្រទេសកម្ពុជា និងប្រជាជនកម្ពុជា និងថា ហេតុដែលលោកបោះទុនវិនិយោគលើវិស័យកសិកម្ម ជាមួយក្រុមហ៊ុន អេហ្គ្រីបាឌី គឺដោយសារលោកចង់ចូលរួមដោះស្រាយបញ្ហាភាពក្រីក្ររបស់ប្រជាជន។
លោក កេស៊ូកិ ហុងដា បាននិយាយយ៉ាងដូច្នេះ ៖ «ពេលខ្ញុំជួបលោក Kengo [លោក Kengo Kitaura ជាស្ថាបនិកក្រុមហ៊ុន Agribuddy] ដំបូង ខ្ញុំបានឮគាត់និយាយថា គាត់មានទស្សនវិស័យចង់ជួយដោះស្រាយបញ្ហាកសិកម្មនៅអាស៊ី ជាពិសេស នៅប្រទេសកម្ពុជា ហើយខ្ញុំក៏មានក្ដីសុបិនចង់ជួយដោះស្រាយបញ្ហាភាពក្រីក្ររបស់ប្រជាជន ដែលមិនអាចសម្រេចក្ដីសុបិនរបស់ពួកគេបាន ឧទាហរណ៍ កុមារចង់ក្លាយជាកីឡាករបាល់ទាត់នៅពេលអនាគត ប៉ុន្តែ ពួកគេត្រូវបោះបង់ក្ដីសុបិននោះចោល ដោយសារតែស្ថានភាពសេដ្ឋកិច្ច។ ដូច្នេះ ខ្ញុំគិតថា អេហ្គ្រីបាឌី (Agribuddy) ដែលជាក្រុមហ៊ុនថ្មីថ្មោងដែលធ្វើការលើវិស័យកសិកម្ម អាចជួយដោះស្រាយបញ្ហារបស់ខ្ញុំបាន ... ដូច្នេះ ខ្ញុំក៏គិតថា ខ្ញុំចង់ជួយគាត់»។
លោក កេស៊ូកិ ហុងដា (Keisuke Honda) ថតរូបអនុស្សាវរីយ៍ជាមួយកសិករ សហគ្រិនឆ្នើម និងបុគ្គលិករបស់ អេហ្គ្រីបាឌី។
អត្ថបទទាក់ទង
លោក កេស៊ូកិ ហុងដា គឺជាវិនិយោគិនមួយរូប ហើយក៏ជាទូតសុច្ឆន្ទៈរបស់ក្រុមហ៊ុនអេហ្គ្រីបាឌី ជាក្រុមហ៊ុនជប៉ុន ដែលធ្វើប្រតិបត្តិការក្នុងបំណងលើកកម្ពស់ស្ថានភាពសេដ្ឋកិច្ចគ្រួសារ និងកម្រិតជីវភាពរស់នៅរបស់កសិករខ្នាតតូចក្នុងប្រទេសកម្ពុជា និងឥណ្ឌា។
បច្ចុប្បន្ន អេហ្គ្រីបាឌី ស្ថិតក្នុងចំណោមក្រុមហ៊ុនចំនួនពីរ ដែលទទួលបានការវិនិយោគច្រើនជាងគេបំផុតពីមូលនិធិអ្នកវិនិយោគ KSK ដែលជាមូលនិធិវិនិយោគមួយបង្កើតឡើងដោយ លោក កេស៊ូកិ ហុងដា (Keisuke Honda) ផ្ទាល់។
គួរជម្រាបថា អេហ្គ្រីបាឌី គឺជាក្រុមហ៊ុនបច្ចេកវិទ្យាកសិកម្មមួយ ដែលគិតត្រឹមពាក់កណ្ដាលឆ្នាំ២០១៩ បានធ្វើការងារជាមួយនឹងកសិកររាប់ពាន់នាក់ ដោយបានសម្របសម្រួលទុនដល់កសិករដែលត្រូវការទុន សម្រាប់ការងារផលិតកម្មកសិកម្ម និងសម្របសម្រួលទីផ្សារសម្រាប់កសិផលរបស់ពួកគាត់ តាមរយៈការសហការជាមួយនឹងរោងម៉ាស៊ីនកិនស្រូវ និងអ្នកទិញកសិផលនានា។
អេហ្គ្រីបាឌី ដែលកំពុងធ្វើប្រតិបត្តិការនៅក្នុងបណ្ដាខេត្តចំនួន ៧ គឺ ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប និងកំពង់ធំ ដោយផ្ដោតលើដំណាំស្រូវ ពោត និងដំឡូងមី៕
