យោងតាមប្រសាសន៍លោក វី សំណាង អភិបាលខេត្តកំពង់ស្ពឺដែលបានផ្ដល់បទសម្ភាសន៍ជាមួយ Newsroom Cambodia តាមទូរស័ព្ទនៅថ្ងៃទី១៨ ខែមីនាថា ដីជាង២៦៦ហិកតានោះស្ថិតក្នុងភូមិសាស្រ្តឃុំតាសាល និងឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
លោកថាលោកមិនដឹងថាជនណាជាអ្នកកាន់កាប់នោះទេ ប៉ុន្តែលោកថាមន្រ្តីរបស់លោកបានចុះល្បាតក្នុងព្រៃក៏បានឃើញគេបោះបង្គោល ឈូសឆាយ និងហ៊ុំព័ទ្ធនិងត្រាយកូនឈើ ទើបអាជ្ញាធរឃើញ ហើយដកហូតយកមកវិញ។
«ដកហូតមកវិញហ្នឹងគឺមានន័យថាយើងមិនបន្តឱ្យមានជនណាមកកាប់រុករានទ្ទ្រានឬក៏អាស្រ័យលើដីទាំងនោះទៀតទេ»។
លោកបន្ថែមថា តាមច្បាប់ ប្រសិនបើរកឃើញថាអ្នកណាជាអ្នកបំផ្លាញ និងកាន់កាប់នោះអាជ្ញាធរនឹងកសាងសំណុំរឿងបញ្ជូនទៅតុលាការដោយផ្ដន្ទាទោសតាមច្បាប់កម្រិតព្រហ្មទណ្ឌជាពន្ធនាគារ ឬក៏រដ្ឋប្បវេណី ដូចជាដាំដុះ ឬសងការខូចខាតលើសម្បត្តិព្រៃឈើដែលបានបាត់បង់។ លោកថា រដ្ឋគ្មានគម្រោងអភិវឌ្ឍន៍អ្វីបន្ថែមលើដីទាំងនោះទេ។
លោកបញ្ជាក់ថា៖ «គម្រោងសម្រាប់រដ្ឋនឹងយើងមានរួចស្រេចហើយដោយសារដីហ្នឹងស្ថិតក្នុងតំបន់អភិរក្សគេទុកវាជាកន្លែងថែររក្សាព្រៃឈើសត្វព្រៃ»។
លោក ស៊ឹង សែនករុណា អ្នកនាំពាក្យសមាគមអាដហុក ប្រាប់ Newsroom Cambodia ថាលោកមិនទាន់ហ៊ានសន្និដ្ឋានលើករណីនេះថាយ៉ាងណានៅឡើយដោយសារខាងសមាគមមិនទាន់បានស៊ើបអង្កេតថាជាដីដែលមានគេលួចកាន់កាប់ដោយបំពានច្បាប់ពិតមែន ឬក៏មានប្លង់កម្មសិទ្ធិត្រឹមត្រូវ។
«បើសិនជាដីព្រៃរបស់រដ្ឋហើយបានការចូលកាន់កាប់ទន្ទ្រាននោះខ្ញុំមិនគាំទ្រទេព្រោះអាហ្នឹងវាជារឿងខុសច្បាប់»។
លោកបន្ថែមថា ប្រសិនបើដីនោះមានប្រជាជនរស់នៅ និងបង្កបង្កើនផលហើយមើលទៅលែងឃើញមានព្រៃនោះអាជ្ញាធរគួរតែមានវិធានការឲ្យដីទៅពួកគាត់វិញដើម្បីឲ្យពួកគាត់បង្កបង្កើនផល និងជួយជីវភាព។
«អាហ្នឹងខ្ញុំនិយាយពីរផ្លូវហ្នឹង ប៉ុន្តែបើរឿងនឹងវាសុទ្ធតែដីព្រៃទាំងអស់ហើយពួកគាត់ទៅកាប់ទន្ទ្រានយកមកកាន់កាប់ដោយខុសច្បាប់ដោយមិនមានការបែងចែកត្រឹមត្រូវតាមច្បាប់ អាហ្នឹងខ្ញុំអត់មានការគាំទ្រទេ។ ប៉ុន្តែបើដីនឹងមានការដឹងឮពីអាជ្ញាធរ ហើយមានការដាំដុះរបស់គាត់ហើយលំនៅដ្ឋានគាត់មានភាពរឹងមាំហើយមិនមានព្រៃហ៊ុំព័ទ្ធអីទេ គួរតែមានការពិចារណាដើម្បីផ្ដល់ជាកម្មសិទ្ធិស្របច្បាប់ដល់ពួកគាត់ព្រោះធម្មតាទេពលរដ្ឋត្រូវការដីប្រើប្រាស់ដើម្បីចិញ្ចឹមជីវិត»។
គួររំឮកថា ការលួចកាប់ឆ្ការព្រៃ ដុតព្រៃ និងបរបាញ់សត្វព្រៃក្នុងតំបន់អភិរក្សគឺជាការរំលោភបំពានច្បាប់ដែលមានចែងក្នុងប្រទេសកម្ពុជា៕
អត្ថបទដោយ៖ សារុំ ស្រីណាត សិក្ខាកាមវគ្គបណ្ដុះបណ្ដាលសារព័ត៌មាន នៃគម្រោង Newsroom Cambodia។
