តាមពិតទៅក្រៅពីចុះកុងត្រាទិញស្វាយរបស់កសិករដើម្បីដឹកតាមយន្តហោះទៅកាន់ទីផ្សារអឺរ៉ុបនោះ លោកឧកញ៉ា ហៃ លីអ៊ាង ក៏ត្រៀមចុះកុងត្រាជាមួយកសិករខ្មែរដទៃទៀត ដែលដាំផ្លែមៀន និងផ្លែផាសិន ដើម្បីធ្វើការនាំចេញទៅទីផ្សារអឺរ៉ុបផងដែរ។
លោកឧកញ៉ាមានប្រសាសន៍យ៉ាងដូច្នេះថា៖ «ការនាំចេញកសិផលខ្មែរជាបន្តបន្ទាប់នេះ គឺដើម្បីធ្វើឲ្យយើងមានទីផ្សារដោយផ្ទាល់ យើងមិនពឹងផ្អែកលើទីផ្សារគេ ព្រោះ វាមានហានីភ័យធំសម្រាប់កសិករនិងកសិកម្មរបស់យើង។ សំខាន់មួយទៀត គឺយើងបានបង្ហាញមុខមាត់ប្រទេសកម្ពុជាយើង និងផលិតផលយើងនៅលើទីផ្សារអន្តរជាតិ។ កន្លងមក ផលិតខ្មែរ នាំចេញច្រើនណាស់ ដូចជា អង្ករ ស្វាយចន្ទី…ប៉ុន្ដែ វាអត់មានឈ្មោះខ្មែរយើង ដោយសារ យើងមិនបាននាំចេញដោយផ្ទាល់។ ដូច្នេះនៅទីផ្សារអឺរ៉ុប គេស្មានថា ជាផលិតផលមកពីប្រទេសគេ មិនមែនមកពីប្រទេសយើង។ សព្វថ្ងៃនេះ ស្វាយចន្ទី យើងផលិតច្រើន តែអត់ដែលមានឈ្មោះខ្មែរយើងទេ»។
គួរបញ្ជាក់ថា ឧកញ៉ាឱសថវេជ្ជបណ្ឌិត ហៃ លីអ៊ាង គឺជាប្រធានសហគ្រាសផលិតឱសថ បេ បេ អឹម ដែលនាំចេញឱសថទៅកាន់ទីផ្សារពិភពលោក។
ក្រៅពីនាំចេញឱសថ សហគ្រិនជើងចាស់រូបនេះ ក៏ជាស្ថាបនិកក្រុមហ៊ុន Confirel ដែលល្បីល្បាញក្នុងការនាំចេញផលិតផលកសិកម្មជាច្រើនទៅកាន់ទីផ្សារអន្តរជាតិ ដូចជា ផលិតផលម្រេច ផលិតផលផលិតចេញពីត្នោត និងស្វាយជាដើម៕
