រោងចក្រថ្មីទី២របស់ Hyundai នៅប្រទេសវៀតណាមនេះ គ្របដណ្តប់លើទំហំផ្ទៃដី ៥០ហិចតា មានទីតាំងស្ថិតនៅក្នុងខេត្ត Ninh Binh ដោយមានសមត្ថភាពផលិតរថយន្តប្រមាណ ១០ម៉ឺនគ្រឿងក្នុង១ឆ្នាំ។ បើរួមបញ្ចូលទាំងរោងចក្រទីមួយដែលមានស្រាប់កំពុងដំណើរការនោះ គឺត្រូវបានរំពឹងថា ការផលិតអាចឈានដល់ ១៨ម៉ឺនគ្រឿងឯណោះក្នុងមួយឆ្នាំ ត្រឹមឆ្នាំ២០២៥។
សម្រាប់រោងចក្រទីពីរថ្មីនេះ គឺនឹងផលិតរថយន្តសម្រាប់នាំចេញទៅកាន់ប្រទេសនានាក្នុងតំបន់ និងសម្រាប់បន្ថែមក្នុងទីផ្សារក្នុងស្រុកផងដែរ។
លោក Nguyen Anh Tuan ប្រធានក្រុមហ៊ុន Thanh Cong បាននិយាយថា រោងចក្រថ្មីនេះ នឹងផលិតរថយន្តដែលប្រើបច្ចេកវិទ្យាចុងក្រោយបំផុតរបស់កូរ៉េខាងត្បូង ដែលមិនប៉ះពាល់បរិស្ថាន និងសន្សំសំចៃសាំង
អត្ថបទគួរអាន
សូមជម្រាបថា ក្រុមហ៊ុន Hyundai បានចូលទីផ្សារវៀតណាម ក្នុងឆ្នាំ២០០៩ ដោយចូលរួមទុនជាមួយក្រុមហ៊ុន Thanh Cong។ ក្នុងឆ្នាំ២០២១ Hyundai បានលក់រថយន្តក្នុងប្រទេសអាស៊ានមួយនេះ បានប្រហែល ៧ម៉ឺនគ្រឿង ពោលគឺវ៉ាដាច់ក្រុមហ៊ុន Toyota ទៀតផង ដែលគេជឿជាក់ថា វាជាចំនួនច្រើនជាងគេបំផុតក្នុងប្រទេសនេះ។
យោងតាមសមាគមផលិតរថយន្តវៀតណាម បានឱ្យដឹងថា ការលក់រថយន្តនៅក្នុងខែតុលាកន្លងទៅ មានចំនួនជាង ៣ម៉ឺន ៦ពាន់គ្រឿង កើនឡើងជិត២៣% បើប្រៀបធៀបនឹងខែតុលា ឆ្នាំមុន។ បើគិតក្នុងរយៈពេល ១០ខែនៃឆ្នាំ២០២២នេះ ការលក់រថយន្តសរុបក្នុងប្រទេសវៀតណាម មានចំនួនជិត៤០ម៉ឺនគ្រឿង កើនឡើង ៥២% បើប្រៀបធៀបនឹងឆ្នាំ២០២១។ លើសពីនេះ បើបូកបន្ថែមទាំងការលក់របស់ Hyundai និង VinFast ដែលមិនមែនជាសមាជិកសមាគមនេះ គឺអាចឈានដល់ជាង ៤០ម៉ឺនគ្រឿងឯណោះ៕
អត្ថបទ៖ នៅ សំភី
