លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា ថ្មីៗនេះ ខាងមន្ទីរទេសចរណ៍ខេត្តកំពតបានបើកយុទ្ធនាការ ដោយអនុវត្តទៅតាមវិធានដែលក្រសួងទេសចរណ៍បានដាក់ចេញមក ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ដោយបានសហការជាមួយនឹងក្រសួងសុខាភិបាល ក្នុងនោះ មានសេវាកម្មទេសចរណ៍ចំនួន៦ ដែលក្រសួងបានដាក់ចេញ។
លោកបានឲ្យដឹងថា « សេវាកម្មទាំង៦នោះរួមមាន សេវាកម្មហូបចុក សេវាកម្មស្នាក់នៅ សេវាកម្មដឹកជញ្ជូនផ្លូវទឹក និងផ្លូវគោក សេវាកម្មរមណីយដ្ឋាន និងសហគមន៍ទេសចរណ៍ អញ្ចឹងមានន័យថា ឥឡូវនេះ យើងមានក្រមនានា ដែលអនុវត្តទៅលើសេវាកម្មទាំង៦ហ្នឹង ហើយមកទល់នឹងពេលនេះ ក្រុមការងាររបស់ខ្ញុំមានប្រមាណជា ៦០០នាក់ហើយ ដែលបានធ្វើការងារនេះ ជាងមួយសប្តាហ៍ហើយ បានប្រមាណជា៥០%ហើយ ហើយកំពុងតែចុះអប់រំផ្សព្វផ្សាយជាបន្តទៀត»។
អត្ថបទទាក់ទង!
លោកបានបន្តថា «អ្នកដែលអនុវត្តបានល្អតាមក្រមនេះ គាត់នឹងទទួលបានឡាបែល(លិខិតបញ្ជាក់) មួយ ដែលបញ្ជាក់ថា ទីតាំងរបស់គាត់មានសុវត្ថិភាព ដើម្បីឲ្យភ្ញៀវទេសចរណ៍ជឿទុកចិត្ត ហើយទៅកន្លែងគាត់។ ហើយបងប្អូនមួយចំនួនដែលមិនអនុវត្តតាម ដំបូងយើងធ្វើការណែនាំគាត់ អប់រំគាត់ ហើយឲ្យគាត់ផ្អាកលក់បណ្តោះអាសន្ន តែនៅក្នុងករណីដែលគាត់នៅតែមិនអនុវត្តទៀត វិធានការរបស់យើងឈានដល់ព្យួរអាជ្ញាបណ្ណ ៣ខែបណ្តោះ ឬយូរជាងនេះ»។
អ្នកស្រី ចែម សារូ អាជីវករបើកជួលកញ្ចុះសម្រាប់ភ្ញៀវទេសចរអង្គុយលេងនៅរមណីយដ្ឋានទឹកឈូរ ខេត្តកំពត បានប្រាប់ថា ចាប់តាំងពីមានជំងឺកូវីដ-១៩ ខាងមន្ទីរទេសចរណ៍ខេត្តបានចុះមកណែនាំ ដល់គាត់ ក៏ដូចជាអាជីវករដទៃទៀតនៅក្នុងតំបន់រមណីយដ្ឋានទឹកឈូរនេះ ឲ្យអនុវត្តឲ្យបានត្រឹមត្រូវនូវវិធានការសុវត្ថិភាពនានា ជាពិសេសប្រើប្រាស់វិធីការពារដល់ភ្ញៀវពីជំងឺកូវីដ-១៩ផងដែរ។
អ្នកស្រីថា « ខាងទេសចរណ៍គេចុះប្រាប់តែរហូតហ្នឹង រឿងម្ហូបអាហាកុំឲ្យលក់ថ្លៃ រឿងកំណត់ថ្លៃជួលតូប និងប្រាប់ឲ្យដាក់អាកុលតាមតូបសម្រាប់ឲ្យភ្ញៀវលាងដៃ និងពាក់ម៉ាសអីដែរ គេថាបើមិនធ្វើតាមគេ គេនឹងផាក»។
បើតាមលោកប្រធានមន្ទីរទេសចណ៍ខេត្តកំពត នៅក្នុងរយៈពេលប៉ុន្មានសប្តាហ៍ចុងក្រោយនេះ ខេត្តកំពតបានទទួលភ្ញៀវទេសចរក្នុងវង្វង់ ៤ម៉ឺននាក់ ដែលភាគច្រើនលើសលុប គឺជាភ្ញៀវជាតិ ដោយក្នុងនោះ ភ្ញៀវទេសចរជាង ៥០% បានទៅលេងនៅរមណីយដ្ឋានទឹកឈូរ ជាង៣០%ទៀតបានទៅកាន់ឧទ្យានជាតិព្រះមុនីវង្សបូកគោ ក្រៅពីនេះគឺទៅតាមរមណីយដ្ឋានផ្សេងៗទៀតនៅក្នុងខេត្តកំពត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
