ថ្លែងប្រាប់អ្នកសារព័ត៌មាន នៅថ្ងៃរម្លឹកខួបលើកទី៦០ឆ្នាំនៃឱសថគីណាល់ លោកឧកញ៉ាឱសថបណ្ឌិត ហៃ លីអ៊ាង អគ្គនាយកក្រុមហ៊ុនផលិតឱសថ PPM ដ៏ធំជាងគេនៅកម្ពុជា បានមានប្រសាសន៍ថា បញ្ហាប្រឈមដែលកំពុងកើតឡើងនៅក្នុងអាជីវកម្មផលិតឱសថនៅកម្ពុជាគឺការនាំចូលឱសថពីក្រៅប្រទេសយ៉ាងច្រើនសន្ធឹកសន្ធាប់ ដែលធ្វើឲ្យពិបាកក្នុងការគ្រប់គ្រង និង អ្វីដែលគួរឲ្យកត់សម្គាល់ជាពិសេសទៅទៀតនោះ គឺតម្លៃប្រកួតប្រជែងមិនស្មើភាពគ្នា។
លោកឧកញ៉ាឱសថបណ្ឌិត បានលើកឡើងទៀតថា ផលិតកម្មផលិតឱសថរបស់ ក្រុមហ៊ុន PPM មានកំណើនជារៀងរាល់ឆ្នាំ ហើយតម្រូវការទីផ្សារនាំចេញក៏បានកើនឡើងទៅតាមនោះដែរ។ ជាក់ស្តែង ក្នុងចំណោម២០ប្រទេសដែលក្រុមហ៊ុនបាននាំចេញឱសថនោះ ឃើញថា ប្រទេសនៅក្នុងតំបន់អាហ្វ្រិក មានដូចជាប្រទេស ស៊ីណេហ្គាល់ និង ប្រទេសកូឌីវ័រ មានតម្រូវការផលិតផលឱសថពីក្រុមហ៊ុន PPM ច្រើនជាងគេ។ ចំពោះតម្រូវការទីផ្សារក្នុងស្រុកវិញ គឺ ក្រុមហ៊ុនផលិតឱសថ PPM តែងតែពង្រីកច្រវ៉ាក់ផលិតកម្មផលិតជារៀងរាល់ឆ្នាំ តែលទ្ធភាពនៃការពង្រីក ធៀបនឹងអ្នកនាំចូលគឺនៅតូចជាងគេខ្លាំងណាស់។
លោកឧកញ៉ា ហៃ លី អ៊ាង (ស្ដាំ) និងសម្ដេច សាយ ឈុំ (ឆ្វេង)
លោកឧកញ៉ាឱសថបណ្ឌិត ហៃ លីអ៊ាង បានលើកឡើងពីតួលេខនៃការនាំចូលឱសថដែលក្នុងមួយឆ្នាំៗ កម្ពុជាបាននាំចូលឱសថក្នុងរង្វង់ ៣០០លានដុល្លារ ដោយរាប់បញ្ចូលទាំងតម្រូវការរដ្ឋ និងឯកជន និងបើគិតពីចំណែកទីផ្សារ ស្មើនឹង៩០ ភាគរយ សុទ្ធសឹងតែជាផលិតផលឱសថនាំចូល។
លោកឧកញ៉ាឱសថបណ្ឌិត បានបន្ថែមទៀតថា អាជីវកម្មផលិតឱសថនៅកម្ពុជា មួយចំនួនភាគច្រើន ផ្តោតសំខាន់ទៅលើ ទីផ្សារអន្តរជាតិ ដែលមានភាពទូលំទូលាយជាង ទីផ្សារឱសថនៅកម្ពុជា តួយ៉ាងដូចជា ក្រុមហ៊ុនផលិតឱសថ PPM បានផលិតឱសថជាច្រើនប្រភេទ ពិសេស ឱសថ គីណាល់ ដែលមានលក្ខណៈជាតិ និង ត្រូវបានទទួលស្គាល់ជាអន្តរជាតិ អស់រយៈពេលជាច្រើនឆ្នាំមកហើយ។
អត្ថបទគួរអាន!
ថ្លែងនៅក្នុងពិធីអបអរសាទរខួបលើកទី ៦០ឆ្នាំនៃឱសថគីណាល់ នេះដែរ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានកោតសរសើរចំពោះឱសថគីណាល់ ដែលផលិតដោយកូនខ្មែរ នៅស្រុកខ្មែរ និងមានឈ្មោះបោះសំឡើងនៅលើទីផ្សារជាតិ និង អន្តរជាតិតាំងពីឆ្នាំ ១៩៦០ រហូតមកដល់បច្ចុប្បន្ននេះ។ នេះគឺជាមោទនៈភាពរបស់ប្រទេសកម្ពុជាដែលបង្កើតឱសថគីណាល់នេះឡើងដើម្បីជាតិខ្មែរ និង ដើម្បីសុខភាពប្រជាជនខ្មែរ។
សម្តេច សាយ ឈុំ បានបញ្ជាក់អះអាងថា ក្រុមហ៊ុនផលិតឱសថ បានចូលរួមចំណែកយ៉ាងសំខាន់ក្នុងការបង្កើនផលិតផលក្នុងស្រុក ដើម្បីជាការចូលរួមចំណែកអភិវឌ្ឍសេដ្ឋកិច្ចជាតិ និង សង្គមផងដែរ។
ពិធីអបអរសាទរខួបលើកទី ៦០ឆ្នាំនៃឱសថគីណាល់
គួរបញ្ជាក់ផងដែរថា បច្ចុប្បន្នក្រុមហ៊ុនផលិតឱសថ PPM បាននិងកំពុងផលិតឱសថជាង ២០០មុខ សម្រាប់ទីផ្សារក្នុងស្រុក និងមានផលិតផលនាំចេញជាង ៥០មុខផង សម្រាប់ប្រកួតប្រជែងនៅលើឆាកអន្តរជាតិ ដូចជាទីផ្សារអាហ្រ្វិក ឡាវ មីយ៉ាន់ម៉ា នឹងរំពឹងឈានជើងចូលទីផ្សារបារំាង អាមេរិក និងជប៉ុន នាពេលឆាប់ៗខាងមុខផងដែរ៕
