ឯកឧត្តមរដ្ឋមន្ត្រីក្រសួងកសិកម្ម បានថ្លែងដូច្នេះ នៅក្នុងពិធីចុះកិច្ចសន្យាផលិតកម្មកសិកម្មស្តីពី ការទិញ លក់ ចែកចាយផលិតផលកសិកម្ម រវាងក្រុមហ៊ុន លីលី ហ្វ៊ូត លីលី ខាមេដា ជាមួយក្រុមផលិត ផ្គត់ផ្គង់ ចែកចាយផលិតផលកសិកម្ម។
ឯកឧត្តម វេង សាខុនមានប្រសាសន៍ថា «ការចូលរួមយ៉ាងសកម្មពីដៃគូឯកជន គឺប្រាកដបានជួយ លើកស្ទួយវិស័យ កសិកម្មតាមរយ:ការបន្តជំរុញការធ្វើពាណិជ្ជូបនីយកម្ម និងការអភិវឌ្ឍវិស័យកសិ-ឧស្សាហកម្មដែលនឹងជួយបង្កើនតម្លៃបន្ថែមលើកសិផល រក្សានិរន្តរភាពនៃការផលិត ការផ្គត់ផ្គង់ និងបន្តចូលរួមបង្កើនចំណូលដល់គ្រួសារ ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ គឺត្រូវជំរុញការនាំចេញទំនិញកែច្នៃកសិកម្មឱ្យបាន១២% នៃបរិមាណនាំចេញសរុបនៅឆ្នាំ២០២៥ និងជាពិសេសស្របតាមផែនការយុទ្ធសាស្ត្រអភិវឌ្ឍន៍វិស័យកសិកម្ម ២០១៩-២០២៣ »។
លោកជំទាវឧកញ៉ា កែវ មុំ នាយកក្រុមហ៊ុន លីលី ហ្វ៊ូត បានឲ្យដឹងថា បច្ចុប្បន្នក្រុមហ៊ុន មានខ្សែច្រវាក់ផលិតកម្ម ដែលមានស្តង់ដារផលិតកម្ម មានកិច្ចសហប្រតិបត្តិការ ការប្រើប្រាស់វត្ថុធាតុដើម និងការនាំចេញផលិតផលទៅកាន់ទីផ្សារអន្តរជាតិចំនួន ១៣ប្រទេសរួចហើយ។ ថ្មីៗនេះ ដោយសារអង្ករកម្ពុជាជាប់លំដាប់ថ្នាក់លេខ១ បានទាក់ទាញក្រុមហ៊ុនជប៉ុន "ខាមេដា" មកចូលរួមសហការវិនិយោគផលិតនំស្រួយដោយប្រើអង្ករខ្មែរ រួចធ្វើការនាំចេញទៅកាន់ប្រទេសអូស្ត្រាលី និងនូវែលហ្សេឡង់ផងដែរ។
អត្ថបទទាក់ទង!
បើតាមលោកជំទាវឧកញ៉ា កែវ មុំ ជារៀងរាល់ឆ្នាំក្រុមហ៊ុនបានប្រើប្រាស់វត្ថុធាតុដើមជាអង្ករ ពោត និងដំឡូងមីសរុបចំនួន ៤០០០តោន ដោយឡែកក្រុម ហ៊ុន លីលីខាមេដា ប្រើអង្ករ ៣០០០តោន។
សូមជម្រាបថា បច្ចុប្បន្ន នំស្រួយលីលីក្រោមការដឹកនាំរបស់លោកជំទាវឧកញ៉ា កែវ មុំ អាចមានសមត្ថភាពផលិតបាន ១០តោនក្នុងមួយថ្ងៃ ដើម្បីចរាចរក្នុងទីផ្សារកម្ពុជា និងនាំចេញទៅប្រទេសចំនួន១០ រួមមាន៖ សហរដ្ឋអាមេរិក កាណាដា អ៊ីតាលី អូស្ត្រាលី វៀតណាម ថៃ មីយ៉ាន់ម៉ា កូរ៉េខាងត្បូង និងម៉ាឡេស៊ីជាដើម នឹងគ្រោងនាំចេញទៅប្រទេសឥណ្ឌូនេស៊ីនៅឆ្នាំក្រោយនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
