លោកជំទាវឧកញ៉ា កែវ មុំ ម្ចាស់ក្រុមហ៊ុនផលិតនំស្រួយលីលី បានឲ្យដឹងថា បច្ចុប្បន្នក្រុមហ៊ុនរបស់លោកជំទាវ កំពុងតែជួបប្រទះការលំបាកយ៉ាងខ្លាំង ដោយសារតែការរីករាលដាលនៃព្រឹត្តិការណ៍សហគមន៍ ធ្វើផលិតផលនំស្រួយលីលីលក់មិនសូវដាច់ និងមានការថយចុះចំណូលដល់ទៅប្រមាណពី៣០%ទៅ៤០%។
លោកជំទាវឧកញ៉ា កែវ មុំ បានបញ្ជាក់ថា ៖«រឿងបញ្ហា គឺវាបញ្ហាហើយ គឺលក់មិនដាច់រឿងចំណាយវាថេរ ហើយការលក់ធ្លាក់ចុះ អ៊ីចឹងថ្លៃដើមវាស្មើនឹងកើនឡើងធ្វើឲ្យយើងខាតដែរហ្នឹង មិនស្មើដើមហើយវាខាតទៅទៀតក្នុងដំណាក់កាលនេះ ដោយសារការលក់វាតិចពេក យើងរត់អត់រួចដែរបញ្ហាហ្នឹងធ្វើឲ្យក្រុមហ៊ុនខាតដែរហ្នឹងក្នុងមួយរយៈពេលហ្នឹង ៣វិច្ឆកា ២៨វិច្ឆកាហ្នឹង ស្ងាត់មួយភ្លែតទេ ក្រោយមកយើងលក់ឡើងវិញធម្មតា តែដល់២០កុម្ភៈនេះ គឺស្ងាត់ទៅៗតែម្តង»។
ដើម្បីជួយដោះស្រាយបញ្ហាទាំងនេះ រាជរដ្ឋាភិបាលបានដាក់វិធានការ៧ជុំរួចមកហើយ តែម្ចាស់ក្រុមហ៊ុនផលិតនំស្រួយលីលី លោកជំទាវឧកញ៉ា កែវ មុំបញ្ជាក់ថា សហគ្រាសខ្នាតតូចនិងមធ្យមមួយចំនួន មិនទាន់អាចបំពេញគ្រប់លក្ខខណ្ឌតម្រូវនានាដើម្បីទទួលបាន ការជួយពីវិធានការណ៍រាជរដ្ឋាភិបាលបានដាក់ចេញមក ដូចនេះ គឺភាគច្រើនមិនទាន់ទទួលបានជំនួយទាំងអស់នោះនៅឡើយទេ។
អត្ថបទទាក់ទង!
លោកជំទាវឧកញ៉ា
កែវ មុំ បានស្នើថា៖«រឿងវិស័យឯកជន គឺពិតជាត្រូវការ រាជរដ្ឋាភិបាលជួយខ្លាំងមែនទែនតែម្តង
បើសិនជារាជរដ្ឋាភិបាលមិនជួយទេហ្នឹង វិស័យSME គឺពិតជាយ៉ាប់មែនទែនហើយក្នុងសម័យនេះ។ហើយរឿងវិធានការរាជរដ្ឋាភិបាលឲ្យដាក់គោលការណ៍ជួយSME
នោះធ្វើយ៉ាងណាឲ្យSME ទទួលយកបាន ដូចជាបង្កលក្ខណៈងាយស្រួល
សម្រាប់ការរៀបចំបែបបទ ឯកសារ ការស្នើសុំ ដើម្បីទទួលបានជំនួយរាជរដ្ឋាភិបាល
ព្រោះថា SMEមិនមានធនធានមនុស្សគ្រប់គ្រាន់ក្នុងការធ្វើការងារនេះនោះទេ
អ៊ីចឹងស្នើសុំបើសិនជាគាត់ជួយ SME នៅក្នុងស្រុកហ្នឹង
គឺសូមជួយសម្រួលបែបបទឯកសារ ដើម្បីទទួលបានហិរញ្ញប្បទាន ក៏ដូចជាជំនួយអីផ្សេងៗហ្នឹងឲ្យងាយស្រួលបន្តិចទៅ»។
បើតាមអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ថ្វីត្បិតវិធានការជួយស្តារ និងជំរុញកំណើនសេដ្ឋកិច្ចកម្ពុជា ជុំទី៨ មិនដឹងថានឹងដាក់ចេញនៅពេលណាក៏ពិតមែនថា តែលោកបញ្ជាក់ថា ថវិកា ជាង ១.១០០លានដុល្លារ បានត្រៀមរួចជាស្រេច ដើម្បីជួយសង្គ្រោះបន្ថែមដល់វិស័យដែលរងផលប៉ះពាល់ពីកូវីដ១៩ នៅក្នុងនោះថវិកាសម្រាប់ជួយដល់វិស័យសហគ្រាសខ្នាតតូច និងមធ្យមក៏ស្ថិតនៅក្នុងកញ្ចប់ថវិកានេះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
