ក្រុមហ៊ុនម៉ាឡេស៊ី ស្វែងរកឱកាសវិនិយោគគម្រោងសណ្ឋាគារ ២ពាន់បន្ទប់ តម្លៃ ៤ ពាន់ លានដុល្លារ នៅកម្ពុជា

នៅមុនថ្ងៃ នៃដំណើរទស្សនកិច្ចរបស់នាយករដ្ឋមន្ត្រីម៉ាឡេស៊ី មកកម្ពុជា ឯកអគ្គរាជទូតម៉ាឡេស៊ីប្រចាំកម្ពុជា លោក Eldeen Husaini Mohd Hashim បានថ្លែងប្រាប់អ្នកសារព័ត៌មានម៉ាឡេស៊ីថា មានក្រុមហ៊ុនម៉ាឡេស៊ីកាន់តែច្រើន បាននិងកំពុងចាប់ផ្ដើម និងផ្ដោតការវិនិយោគនៅក្នុងប្រទេសកម្ពុជា។ លោកបន្ថែមទៀតថា ក្នុងដំណើរទស្សនកិច្ចនេះដែរ ក៏នឹងមានការចុះហត្ថលេខាលើឯកសារសំខាន់ៗដែលនឹងជំរុញដល់ការធ្វើពាណិជ្ជកម្ម និងវិនិយោគរវាងប្រទេសទាំងពីរផងដែរ។

នាយករដ្ឋមន្ត្រីម៉ាឡេស៊ី លោក Tun Ma Mahathir Mohamad មកទស្សនកិច្ច៣ ថ្ងៃនៅកម្ពុជា (ថ្ងៃទី២ ដល់ថ្ងៃទី៤ ខែកញ្ញា ២០១៩) [រូបភាព៖ https://www.thesundaily.my)

សារព័ត៌មានម៉ាឡេស៊ី Bernama ដែលបានស្រង់ប្រសាសន៍របស់ឯកអគ្គរាជទូតម៉ាឡេស៊ីប្រចាំកម្ពុជា បានឲ្យដឹងថា ក្នុងរយៈពេល ៣ខែ ដំបូងនៅឆ្នាំ២០១៩នេះ ស្ថានទូតម៉ាឡេស៊ីប្រចាំកម្ពុជាបានទទួលសំណើសុំពីក្រុមហ៊ុនម៉ាឡេស៊ីដើម្បីវិនិយោគនៅកម្ពុជាចំនួន២០ ក្រុមហ៊ុន ក្នុងនោះ រួមមានគម្រោងសណ្ឋាគារ២ពាន់បន្ទប់ ដែលមានតម្លៃទុនវិនិយោគសរុបប្រមាណ ៤ ពាន់លានដុល្លារអាមេរិកផងដែរ។ ទោះយ៉ាងណា ឯកអគ្គរាជទូតរូបនេះ មិនបានបញ្ជាក់ឈ្មោះក្រុមហ៊ុននោះជាសាធារណៈនោះទេ។

ចំពោះដំណើរទស្សនកិច្ចនៅកម្ពុជារយៈពេល៣ថ្ងៃ (ថ្ងៃទី២ ដល់ថ្ងៃទី៤ កញ្ញា ឆ្នាំ២០១៩) របស់នាយករដ្ឋមន្ត្រីម៉ាឡេស៊ី លោក Tun Ma Mahathir Mohamad នៅលើកនេះ ត្រូវបានឯកអគ្គរាជទូតម៉ាឡេស៊ីលោក Eldenn Husaini បានគូសបញ្ជាក់ទៀតថា គឺនឹងមានការចុះហត្ថលេខាលើកិច្ចព្រមព្រៀងសំខាន់ៗមួយចំនួនពិសេសគឺ ទាក់ទងនឹងការបញ្ជៀសការយកពន្ធត្រួតគ្នា (DTA) រវាងប្រទេសទាំងពីរ។

ឯកអគ្គរាជទូតម៉ាឡេស៊ីប្រចាំកម្ពុជា លោក Eldeen Husaini Mohd Hashim (រូបភាព៖ http://bernama.com)

ឯកអគ្គរាជទូតម៉ាឡេស៊ីប្រចាំកម្ពុជាជឿជាក់ថា វានឹងជាផ្នែកមួយជួយជំរុញដល់ការពង្រឹងបន្ថែមនូវទំនាក់ទំនងពាណិជ្ជកម្មទ្វេភាគីរវាងម៉ាឡេស៊ី និងកម្ពុជាកាន់តែប្រសើរឡើងមួយកម្រិតទៀត។

លើសពីនេះទៀត តាមរយៈដំណើរទស្សនកិច្ចផ្លូវការនេះដែរ បើតាមការបញ្ជាក់របស់ឯកអគ្គរាជទូតម៉ាឡេស៊ីនៅក្នុងសារព័ត៌មានម៉ាឡេស៊ី បានឲ្យដឹងថា ថ្នាក់ដឹកនាំម៉ាឡេស៊ី និងកម្ពុជាក៏រំពឹងថា នឹងមានការពិភាក្សាគ្នាបន្ថែម ទាក់ទងនឹងការធ្វើពាណិជ្ជកម្ម វិនិយោគនិងកិច្ចសហការក្នុងវិស័យកសិកម្មរួមទាំងការការពារ និងអភិវឌ្ឍវិស័យឧស្សាហកម្មហាឡាល់ ផងដែរ។

បើនិយាយពីការវិនិយោគវិញ គិតនៅត្រឹមឆមាសទី១ ឆ្នាំ២០១៩នេះ កម្ពុជាទទួលបានការវិនិយោគពីប្រទេសម៉ាឡេស៊ីក្នុងចំនួនជាទឹកប្រាក់ ប្រមាណតែជិត១០ លានដុល្លារអាមេរិកប៉ុណ្ណោះ ដែលបានធ្វើឲ្យម៉ាឡេស៊ី ជាប់ចំណាត់ថ្នាក់លេខ៨ ក្នុងចំណោមប្រទេសវិនិយោគចូលក្នុងប្រទេសកម្ពុជាច្រើនជាងគេ។ នេះបើតាមតួលេខដែលផ្ដល់ដោយក្រុមប្រឹក្សាអភិវឌ្ឍន៍កម្ពុជា (CDC)។

ដោយឡែក ចំពោះវិស័យទេសចរណ៍ បើតាមរបាយការណ៍ពីក្រសួងទេសចរណ៍ បង្ហាញថា គិតត្រឹមឆមាសទី ១ ដើមឆ្នាំ ២០១៩នេះ ប្រទេសកម្ពុជា ទទួលបានភ្ញៀវទេសចរម៉ាឡេស៊ី ជាង ៩ម៉ឺននាក់ ដែលមានកំណើន ៧ភាគរយ ធៀបនឹងរយៈពេលដូចគ្នា កាលពីឆ្នាំមុន ពោលគឺមានចំណែកប្រមាណ ២,៨% នៃចំនួនភ្ញៀវទេសចរបរទេសសរុប។

សូមជម្រាបថា បើតាមទិន្នន័យពីសារព័ត៌មានម៉ាឡេស៊ី Bernama បានឲ្យដឹងថា ទំហំពាណិជ្ចកម្ម រវាងកម្ពុជា និងម៉ាឡេស៊ី កាលពីឆ្នាំ២០១៨ សម្រេចបាន៥៥៨ លានដុល្លារអាមេរិក ខណៈដែលនៅ៦ ខែឆ្នាំ២០១៩នេះ សម្រេចបាន ជាង៤២២ លានដុល្លារ កើនឡើងជាង៣៩% ធៀបនឹងរយៈពេលដូចគ្នាកាលពីឆ្នាំមុន។ កម្ពុជា គឺជាប្រទេសដៃគូពាណិជ្ជកម្មធំបំផុតទី ៨ របស់ម៉ាឡេស៊ី នៅក្នុងតំបន់អាស៊ាន ហើយជាប្រទេសដៃគូពាណិជ្ជកម្មទី៥០ នៅទូទាំងពិភពលោក៕