ជាក់ស្តែង បើក្រឡេកទៅមើលតាមរបាយការណ៍ក្រសួងការងារ និងបណ្តុះបណ្តាលវិជ្ជាជីវៈ ដែលទើបតែផ្សព្វផ្សាយជាសាធារណៈ បង្ហាញថា នៅឆ្នាំ២០១៨ កន្លងមកនេះ ចំនួនពលករកម្ពុជាទៅធ្វើការនៅក្រៅប្រទេសបានកើនដល់ជាង ១លាន ២សែននាក់ និង បានផ្ញើប្រាក់ត្រឡប់មកស្រុកកំណើតវិញប្រមាណ ជាង ២ពាន់លានដុល្លារអាមេរិក ក្នុងនោះពលករធ្វើការនៅក្នុងប្រទេសថៃ និង ប្រទេសកូរ៉េខាងត្បូងបានផ្ញើប្រាក់មកស្រុកកំណើតបានច្រើនជាងគេ។
របាយការណ៍រដ្ឋាភិបាលដដែលបានឲ្យដឹងថា ការផ្ញើប្រាក់មកកាន់គ្រួសារក្នុងប្រទេសកម្ពុជា ចេញពីប្រទេសស ថៃមានចំណែក ៦៨ភាគរយ ប្រទេសកូរ៉េខាងត្បូងមានជាង ២១ ភាគរយ ប្រទេសជប៉ុនមាន ៣ភាគរយ និង ប្រទេសម៉ាឡេស៊ីជាង ២ភាគរយ។
អត្ថបទទាក់ទង!
តួលេខដែលបានបង្ហាញនៅក្នុងរបាយការណ៍បញ្ជាក់ថា ចំនួនពលករខ្មែរដែលបានទៅធ្វើការនៅប្រទេសថៃ មានប្រមាណជាង ១លាននាក់ កូរ៉េខាងត្បូងមានប្រមាណជិត ៥ម៉ឺននាក់ ប្រទេសជប៉ុនមានជាង ៩ពាន់នាក់ ប្រទេស ម៉ាឡេស៊ី ជាង ៣ម៉ឺន នាក់ និង ប្រទេស សឹង្ហបុរីជាង ៨០០នាក់ គឺ បានផ្ញើប្រាក់យ៉ាងហោចណាស់ក្នុងមួយឆ្នាំៗ ២.៣០០ លានដុល្លារអាមេរិកឯណោះ។
យ៉ាងណាមិញ បើក្រឡេកទៅមើល របាយការណ៍ពីធនាគារជាតិនៃកម្ពុជា បានបង្ហាញឲ្យដឹងថា ការផ្ទេរប្រាក់ពីក្រៅប្រទេស តាមប្រព័ន្ធធនាគារ និង ហិរញ្ញវត្ថុនៅកម្ពុជា ក៏បានបង្ហាញពីតួលេខកើនឡើងផងដែរ ដែលមានចំនួនជាង ៤ពាន់លានដុល្លារអាមេរិក ខណៈដែលការផ្ទេរប្រាក់ចូលតាមប្រព័ន្ធធនាគារវិញ មានត្រឹម ៥២៧ លានដុល្លារ ប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
