ក្រសួងសុខាភិបាលស្នើឲ្យអាជ្ញាធរចាត់ការតាមផ្លូវច្បាប់ លើអ្នកប្រឌិតផ្សាយព័ត៌មានថា វ៉ាក់សាំងចិនអាចបង្កជាជំងឺមហារីកគ្រាប់ឈាម

ការព្រមានឡើងពីក្រសួងសុខាភិបាលយ៉ាងដូច្នេះ គឺបន្ទាប់ពីពេលថ្មីៗនេះក្រសួងសុខាភិបាលបានតសង្កេតឃើញថា មានការចែកចាយបន្តគ្នាជាច្រើនក្នុងបណ្តាញសង្គម TikTok ទាក់ទងនឹងព័ត៌មានមិនពិតដែលថា «ចិនប្រកាសថាវ៉ាក់សាំងកូវីដរបស់ខ្លួនអាចបង្កជាជំងឺមហារីកគ្រាប់ឈាម»។

ក្រសួងសុខាភិបាល បានធ្វើការច្រានចោលការចុះផ្សាយព័ត៌មានមិនពិតនេះ ហើយក្រសួងក៏បានស្នើឲ្យ បងប្អូនប្រជាពលរដ្ឋបញ្ឈប់នូវការចែកចាយបន្តនូវព័ត៌មានប្រឌិតនេះជាបន្ទាន់ និងសូមអាជ្ញាធរមានសមត្ថកិច្ចមេត្តាជួយចាត់ការតាមផ្លូវច្បាប់ផង។

សូមបញ្ជាក់ថា ក្នុងចំណោមវ៉ាក់សាំងដែល កម្ពុជាបានប្រើប្រាស់សម្រាប់ចាក់ជូនប្រជាជន គឺវ៉ាក់សាំងចិន Sinovac និង Sinopharm ត្រូវបានប្រើប្រាស់ច្រើនជាងគេ។ បន្ថែមពីនេះ កម្ពុជាក៏មានប្រើប្រាស់វ៉ាក់សាំងអាមេរិកប្រភេទ Pfizer, Johnson & John Son, និងវ៉ាក់សាំងអង់គ្លេស AstraZeneca និងវ៉ាក់សាំង Covishield ផលិតនៅឥណ្ឌាផងដែរ។

គិតមកត្រឹមថ្ងៃទី០៩ ខែមីនា កម្ពុជាសម្រេចបានការចាក់វ៉ាក់សាំងធៀបនឹងចំនួនប្រជាជនសរុប១៦លាននាក់ មានជាង៨២%ហើយ៕

អត្ថបទ សោម ស្រីពេជ្រ