នៅក្នុងសេចក្តីជូនព័ត៌មានប្រចាំថ្ងៃស្តីពីការរកឃើញករណីថ្មីៗនៃអ្នកឆ្លងCovid-19 របស់ក្រសួងសុខាភិបាល ដែលបានចេញនៅថ្ងៃទី២៩ ខែមីនានេះ បានបន្ថែមនូវខ្លឹមសារ ដែលជាអំពាវនាវដល់សាធារណៈជនទាំងអស់ កុំឲ្យប្រើប្រាស់ឧបករណ៍តេស្តរកមេរោគCovid-19ដោយខ្លួនឯង ។ក្រសួងបានបញ្ជាក់ថា បច្ចុប្បន្នមានការផលិតឧបករណ៍ធ្វើតេស្តរហ័សច្រើន តែរហូតមកទល់នឹងពេលនេះ មិនទាន់មានឧបករណ៍ធ្វើតេស្តរហ័សរកមេរោគCovid-19 ប្រភេទណាមួយ ដែលមានការបញ្ជាក់ទទួលស្គាល់ពីអង្គការសុខភាពពិភពលោក នូវភាពត្រឹមត្រូវ និងប្រសិទ្ធភាពនៃការធ្វើតេស្តរកមេរោគCovid-19 នៅឡើយទេ ជាពិសេសប្រសិទ្ធភាពនៃការធ្វើតេស្តរហ័សនេះ គឺនៅទាបណាស់។ ហេតុដូចនេះក្រសួងក៏បានអំពាវនាវដល់អាជ្ញាធរពាក់ព័ន្ធទាំងអស់ ចូលរួមចាត់វិធានការតាមច្បាប់ជាធរមានយ៉ាងម៉ឺងម៉ាត់ជាទីបំផុត ចំពោះបុគ្គលឬក្រុមហ៊ុនណាដែលធ្វើការផ្សព្វផ្សាយឧបករណ៍ធ្វើតេស្តរកមេរោគCovid-19 ដោយមិនមានការអនុញ្ញាពីក្រសួងសុខាភិបាល។
អត្ថបទគួរអាន
គួរបញ្ជាក់ថា ក្រសួងមានការអំពាវនាវម្តងហើយម្តងទៀតដូច្នេះ ក្រោយពេលមានការបង្ហោះពីសំណាក់បុគ្គល និងផេកមួយចំនួនអំពីការនាំចូលចែកចាយឧបករណ៍ធ្វើតេស្តរកមេរោគCovid-19 នៅលើបណ្តាញសង្គមនាពេលកន្លងមក នាំអោយសាធារណៈជនមានការភ័ន្តច្រលំហើយទិញយកមកប្រើប្រាស់ដោយខ្លួនឯង នាំអោយខាតបង់ថវិការ និងកើតមានបញ្ហាផ្សេងៗជាច្រើនទៀត។
សូមជម្រាបដែរថា គិតត្រឹមថ្ងៃទី២៩ ខែមីនាឆ្នាំ២០២០នេះ ករណីវិជ្ជមានវីរុសកូវីដ១៩ ដែលបានរកឃើញទាំងអស់នៅទូទាំងប្រទេស មានចំនួន ១០៣នាក់ ក្នុងនេះអ្នកដែលកំពុងសម្រាកព្យាបាលមាន៨២នាក់ (ស្រី ២៦នាក់ និងប្រុស ៥៦នាក់)។ ករណីព្យាបាលជាសះស្បើយ មានចំនួន ២១នាក់ ក្នុងនោះរួមមាន បុរសជនជាតិខ្មែរ ១៦នាក់ បុរសជនជាតិចិន ០១នាក់ បុរសនិងស្ត្រីជនជាតិអង់គ្លេស ០៣នាក់ និងបុរសជនជាតិបារាំង០១នាក់៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
