ពេលដែលអ្នកសារព័ត៌មានសួរថា ហេតុអ្វីបានជាការលាប់ឡើងនៃវីរុសនេះ តើមានលក្ខណៈបច្ចេកនៃការលាប់ឡើងវិញយ៉ាងណាខ្លះ ត្រូវបានលោកជំទាវ ឱ វណ្ណឌីន ឆ្លើយតបថា «អ្នកជំងឺ កាលណាមានអវិជ្ជមានតេស្ត២ដងហើយ តាមគោលការណ៍ប្រតិបត្តិរបស់អង្គការសុខភាពពិភពលោក គឺមានន័យថា គាត់មានការជាសះស្បើយ ហើយអាចទៅផ្ទះសម្បែងវិញ ក៏ប៉ុន្តែ ស្ថិតនៅក្រោមការតាមដាន និងឲ្យដាច់ដោយឡែកដដែលទេ ក្នុងរយៈពេល១៤ថ្ងៃបន្តក្រោយពីហ្នឹងទៀត»។
លោកជំទាវបានបន្ថែមថា «អញ្ចឹងករណីនេះ យើងអនុវត្តយ៉ាងខ្ជាប់ខ្ជួន តាមគោលការណ៍ប្រតិបត្តិនេះ ហើយក្រុមគ្រូពេទ្យលោកក៏បានការតាមដានជាហូរហែរជាមួយនឹងបុគ្គលរូបនេះ រហូតដល់ថ្ងៃទី១៤ មុននឹងយើងកំណត់ថា គាត់រួចចាកផុតពីរយៈពេលនៃការធ្វើចត្តាឡីស័កនេះ(ការដាក់ឲ្យនៅដាច់ដោយឡែក) ក្រុមគ្រូពេទ្យក៏បានធ្វើតេស្តម្តងទៀត ដើម្បីបញ្ជាក់ពីភាពអវិជ្ជមាននៃវីរុសកូវីដ-១៩នៅក្នុងភ្នាស ទឹករំអិលផ្លូវដង្ហើម នៅច្រមុះនិងបំពង់កររបស់គាត់ ហើយក៏ឃើញថា គាត់ក៏មានវិជ្ជមាននូវវីរុសកូវីដ១៩នេះវិញ។ អញ្ចឹងការមកវិញនេះ ភាសាខ្មែរយើងហៅថា លាប់មានន័យថា ការឆ្លងឡើងវិញ (Reinfection) តាមភាសាបច្ចេកទេស»។
អត្ថបទទាក់ទង
លោកជំទាវបានបន្តថា ការលាប់ ឬការឆ្លងឡើងវិញ(Reinfection)នេះ មិនមែនមាននៅតែកម្ពុជាមួយទេ គឺមាននៅតាមបណ្តាប្រទេសមួយចំនួនទៀត ដូចជា ចិន នៅកូរ៉េខាងត្បូង និងតាមបណ្តាប្រទេសមួយចំនួនទៀត ក៏មានករណីលាប់ឡើងវិញនេះដែរ។
ហើយចំពោះមូលហេតុជាក់លាក់សម្រាប់វីរុសកូវីដ-១៩នេះ ត្រូវបានលោកជំទាវបញ្ជាក់ថា «សម្រាប់វីរុសកូវីដ១៩នេះ កាសិក្សាមួយត្រូវតែធ្វើ ពីព្រោះយើងដឹងហើយថា នេះជាប្រភេទវីរុសថ្មីសន្លាងតែម្តង ហើយជាវីរុសមួយ ដែលមានការចម្លង លឿនមែនទែន ពីមនុស្សម្នាក់ទៅមនុស្សម្នាក់ អញ្ចឹងអត្តចរិតរបស់វីរុសនេះ អ្នកវិទ្យាសាស្ត្រនៅរាប់មិនអស់នៅឡើយនោះទេ គ្រាន់តែការសិក្សាទៅឃើញថា មានលក្ខណៈប្រហាក់ប្រហែលគ្នាជាមួយនឹងវីរុស សាស៍ និងវីរុសមើស៍ ក៏ប៉ុន្តែការសិក្សាបញ្ជាក់ថា វាមានភាពស្រដៀងគ្នាជាមួយនឹងវីរុសសាស៍ ច្រើនជាងមើស៍«។
ទោះបីជាអ្នកដែលជាសះស្បើយហើយ អាចមានវិជ្ជមានជំងឺនេះម្តងទៀតក្តី ក៏អ្នកនាំពាក្យក្រសួងសុខាភិបាលរូបនេះបញ្ជាក់បន្ថែមថា លទ្ធភាពនៃការចម្លងរបស់បុគ្គលដែលជាសះស្បើយហើយឆ្លងវិញឡើងវិញ ដែលអាចចម្លងទៅបុគ្គលដទៃទៀតគឺមានតិចតួចបំផុត លុះត្រាតែបុគ្គលផ្សេងម្នាក់ទៀតនោះមានបញ្ហាសុខភាព ទើបអាចងាយឆ្លងបាន។
សូមជម្រាបដែរថា នៅថ្ងៃនេះ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលកម្ពុជា បានបញ្ជាក់នៅលើបណ្ដាញហ្វេសប៊ុកផ្លូវការរបស់ខ្លួនថា កម្ពុជាពុំបានរកឃើញករណីឆ្លងថ្មីមេរោគ COVID-19 នោះទេ ខណៈករណីឆ្លងសរុប នៅរក្សាត្រឹមចំនួន ១២២ករណីដដែល។ អំឡុងពេលជាមួយគ្នានេះ ក៏គ្មានករណីជាសះស្បើយថ្មីដែរ និងពុំមានអ្នកស្លាប់បាត់បង់ជីវិតនោះដែរ ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
