លោក ស៊ិន ចាន់សិរីវុត្ថា បានអះអាងថា តំបន់ភាគឦសាននៃប្រទេសកម្ពុជា ដែលរួមមានខេត្តមណ្ឌលគិរី រតនគិរី ស្ទឹងត្រែង និងក្រចេះ គឺមានសក្តានុពលខ្ពស់ សម្រាប់វិស័យទេសចរណ៍ តែយ៉ាងណា ការអភិវឌ្ឍ ហេដ្ឋារចនាសម្ព័ន្ធទេសចរណ៍ គឺជារឿងដែលចាំបាច់ជាងគេ ដើម្បីទាក់ទាញភ្ញៀវទេសចរណ៍ឲ្យបានច្រើន ហើយនៅពេលនោះ ព្រលានយន្តហោះ នឹងដើរតួសំខាន់ ក្នុងការសម្រួលដល់ការធ្វើដំណើរ និងទំនាក់ទំនងនានា។
លោកបន្តថា គម្រោងព្រលានយន្តហោះខ្នាតតូច នៅខេត្តមណ្ឌលគិរី អាចជាការចាប់ផ្តើមអភិវឌ្ឍន៍មុនគេ ដើម្បីឲ្យការធ្វើដំណើរ កាន់តែឆាប់រហ័ស និងងាយស្រួល ក៏ប៉ុន្តែ ទាមទារឲ្យមានការសិក្សាលម្អិតជាមុនសិន ពីតម្រូវការប្រើប្រាស់ជើងហោះហើរ។
អត្ថបទទាក់ទង!
ទាក់ទងទៅនឹងទំហំទឹកប្រាក់វិនិយោគលើគម្រោងព្រលានយន្តហោះនេះ គឺមិនទាន់បានបញ្ជាក់នៅឡើយនោះទេ ហើយសម្រាប់ទីតាំង ក៏អាចមានការផ្លាស់ប្តូរចេញពី ទីតាំងចាស់នៅជាប់សាលាស្រុកផងដែរ។
គួររម្លឹកដែរថា កាលពីពេលថ្មីៗនេះ រាជរដ្ឋាភិបាលកម្ពុជា បានបង្ហាញពីផែនការមេអភិវឌ្ឍខេត្តមណ្ឌលគិរី ឱ្យទៅជាតំបន់ទេសចរណ៍សមាហរណកម្មពិសេស ដោយក្នុងនោះ ក៏មានគម្រោងសាងសង់ព្រលានយន្តហោះខ្នាតតូច ដើម្បីលើកកម្ពស់ដល់ វិស័យទេសចរណ៍ និងវិស័យដឹកជញ្ជូន។
លើសពីនេះទៅទៀត ដោយសារតែ ខេត្តមណ្ឌលគិរី ជាខេត្តមានសក្តានុពលអេកូទេសចណ៍ និងមានលក្ខខណ្ឌអាកាសធាតុល្អប្រសើរ ហើយការសម្រេចផែនការ នឹងធ្វើឲ្យកម្ពុជា ចំណេញច្រើន ក្នុងការកាត់បន្ថយការធ្លុះធ្លាយសេដ្ឋកិច្ច ក្នុងវិស័យទេសចរណ៍៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
