វិស័យវាយនភណ្ឌរបស់វៀតណាម មានកំណើននាំចេញល្អប្រសើរ បន្ទាប់ពីក្រុមហ៊ុនចិន បានផ្លាស់ប្តូរមូលដ្ឋានផលិតកម្មមកកាន់វៀតណាម ដោយសារតែតម្លៃពលកម្មនៅក្នុងប្រទេសចិនបន្តកើនឡើងខ្ពស់។
តួយ៉ាង កាលពីឆ្នាំ ២០១៥ វៀតណាមកាន់កាប់ចំណែក ៥,៩% នៃការនាំចេញផលិតផលវាយនភណ្ឌសរុប ទូទាំងសកលលោកតែម្តង ហើយវាបានកើនឡើងខ្ពស់មកដល់ ៨,៩% កាលពីឆ្នាំ ២០១៩កន្លងទៅ ផ្ទុយទៅវិញ ចិន ដែលធ្លាប់តែកាន់កាប់ចំណែក ៣៨% នៃការនាំចេញផលិតផលវាយនភណ្ឌសរុបនោះ បានធ្លាក់មកនៅត្រឹម ២៩% កាលពីឆ្នាំ ២០១៩។
របាយការណ៍ដដែលនេះ បញ្ជាក់ទៀតថា បណ្តាប្រទេសក្នុងតំបន់អាស៊ីអាគ្នេយ៍ ក៏អាចទទួលបាននូវ ឥទ្ធិពលនេះដែរ រួមមានប្រទេសកម្ពុជា បង់ក្លាដែស ឥណ្ឌូនេស៊ី និងម៉ាឡេស៊ីជាដើម ដែលអាចមានកំណើននាំចេញច្រើន ក្នុងប៉ុន្មានឆ្នាំចុងក្រោយនេះ។
អត្ថបទទាក់ទង!
លើសពីនេះទៅទៀត ទំនោរនៃការផ្លាស់ប្តូរមូលដ្ឋានផលិតកម្មចេញពីប្រទេសចិន គឺនៅតែអាចបន្តទៅមុខទៀត ដោយសារតែជម្លោះពាណិជ្ជកម្មរវាង អាមេរិក និងចិន ហើយវិបត្តិកូវីដ-១៩ ធ្វើឲ្យក្រុមហ៊ុនចិន ធ្វើពិពិធកម្មខ្សែច្រវាក់ផ្គត់ផ្គង់របស់ពួកគេ។
សូមជម្រាបថា ផលិតផលដែលចិនគ្រោងនឹងបង្កើនផលិតកម្ម នៅក្រៅប្រទេសរបស់ខ្លួននោះគឺ ផលិតផលគ្រឿងអេឡិចត្រូនិក ហើយវៀតណាម ក៏ជាប្រទេសទទួលបានផលប្រយោជន៍ច្រើនជាងគេ អំពីរឿងនេះ ជាក់ស្តែងក្រុមហ៊ុនបច្ចេកវិទ្យាយក្សៗ ដូចជា ក្រុមហ៊ុន Apple, Google, និង Microsoft ជាដើម គ្រោងនឹងចាប់ផ្តើមបើកផលិតកម្មរបស់ខ្លួននៅក្នុងឆ្នាំនេះហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
