ការិយាល័យស្ថិតិទូទៅវៀតណាម បានគូសបញ្ជាក់ថា ការចុះទាបនៃ GDP វៀតណាម មិនធ្លាប់មានតាំងពីឆ្នាំ ២០១១មក គឺដោយសារតែបញ្ហាមេរោគកូវីដ១៩ ដែលបានជះឥទ្ធិពលអាក្រក់ដល់ប្រទេសមហាអំណាចសេដ្ឋកិច្ចអាមេរិក ជប៉ុន និងសហភាពអឺរ៉ុប ជាដើម ជាហេតុនាំឲ្យមានការកាត់ផ្តាច់ខ្សែចង្វាក់ផ្គត់ផ្គង់ ការធ្លាក់ចុះនូវតម្លៃប្រេង ជាពិសេស គឺបង្កើនអត្រាគ្មានការងារធ្វើ។
យ៉ាងណាក៏ដោយ វៀតណាមអះអាងថា ខ្លួននៅតែធ្វើបានល្អជាងបណ្តាប្រទេសមួយចំនួនក្នុងតំបន់ និងលើសកលលោក ដោយក្នុងឆមាសទី១ ដើមឆ្នាំនេះ វិស័យឧស្សាហកម្មផលិត និងសំណង់ ដែលកាន់កាប់ចំណែក ៧៣% នៃ GDP សរុប គឺមានការកើនឡើងជិត ៣% ខណៈវិស័យកសិកម្ម មានកំណើន១% និងវិស័យសេវាកម្ម កើនឡើង ០.៥%ផងដែរ។
អត្ថបទទាក់ទង
ដោយឡែក គិតចាប់ពីមករា ដល់ខែមិថុនានេះ ចំនួនក្រុមហ៊ុនដែលបានប្រកាសផ្អាកដំណើរការអាជីវកម្ម មានជាង ៣ម៉ឺនក្រុមហ៊ុន ដែលមានការកើនឡើង ៣៨% ធៀបនឹងពេលដូចគ្នាកាលពីឆ្នាំមុន ហើយក៏មានក្រុមហ៊ុនជិត ២ម៉ឺនស្ថាប័ន បានឈប់ដំណើរការ និងរង់ចំាបញ្ចប់នីតិវិធីរំលាយក្រុមហ៊ុនតែម្តង។
ទោះយ៉ាងណា សម្រាប់ពាក់កណ្តាលឆ្នាំនេះ នៅទូទាំងប្រទេសវៀតណាម គឺមានក្រុមហ៊ុនចុះបញ្ជីជាង ៦ម៉ឺនក្រុមហ៊ុន ដែលមានទុនចុះបញ្ជីសរុបជិត ៣០ពាន់លានដុល្លារអាមេរិក ធ្លាក់ចុះ ៧% បើធៀបនឹងពេលដូចគ្នា កាលពីឆ្នាំ២០១៩ កន្លងទៅ។
សូមជម្រាបដែរថា ល្បឿនកំណើនសេដ្ឋកិច្ចយឺតបែបនេះ ពុំអាចធ្វើឲ្យវៀតណាមសម្រេចគោលដៅតាមការកំណត់របស់រដ្ឋាភិបាល សម្រាប់ឆ្នាំ២០២០នេះឡើយ ប៉ុន្តែ ទោះយ៉ាងណា រដ្ឋសភាវៀតណាមនៅតែរក្សាគោលដៅកំណើន GDP រង្វង់ ៦,៨% ដដែល សម្រាប់ឆ្នាំ២០២០នេះ៕
